ମହଙ୍ଗା ପଡୁଛି ନିର୍ବାଚନରେ ପ୍ରତିଦ୍ବନ୍ଦିତା କରିବାର ମୋହ, ୩ଟି ସାଧାରଣ ନିର୍ବାଚନରେ ୪୬ କୋଟି ଟଙ୍କା ବାଜ୍ୟାପ୍ତି

ନୂଆଦିଲ୍ଲୀ: ମହଙ୍ଗା ପଡୁଛି ନିର୍ବାଚନରେ ପ୍ରତିଦ୍ବନ୍ଦିତା କରିବାର ମୋହ। ଆବଶ୍ୟକତା ନଥିବା ସହ ଜନ ସମର୍ଥନ ନଥିବା ସତ୍ତ୍ବେ ନିର୍ବାଚନରେ ପ୍ରତିଦ୍ବନ୍ଦିତା କରି ବିଫଳ ହେବା ଉଦାହରଣକୁ ନେଇ ପ୍ରକାଶ ପାଇଛି ରିପୋର୍ଟ। ଗତ ତିନୋଟି ସାଧାରଣ ନିର୍ବାଚନରେ ୨୧ ହଜାର ପ୍ରାର୍ଥୀଙ୍କ ପ୍ରାୟ ୪୬ କୋଟି ଟଙ୍କା ବାଜ୍ୟାପ୍ତି ହୋଇଛି। ୨୦୦୯, ୨୦୧୪, ୨୦୧୯ ନିର୍ବାଚନର ଏହି ତଥ୍ୟ ପଦାକୁ ଆସିଛି।

ଭାରତୀୟ ନିର୍ବାଚନ କମିଶନ ନିୟମାବଳୀ ଅନୁସାରେ, ଜଣେ ଲୋକସଭା ପ୍ରାର୍ଥୀ ପ୍ରାର୍ଥୀପତ୍ର ଦାଖଲ କରିବାବେଳେ ୨୫ ହଜାର ଟଙ୍କା ଜମାଦେବାକୁ ପଡିଥାଏ। ତଫସିଲଭୁକ୍ତ ଜାତି ଓ ଜନଜାତିଙ୍କ କ୍ଷେତ୍ରରେ ଏହି ପରିମାଣ ରହିଛି ପ୍ରାୟ ୧୨ ହଜାର ଟଙ୍କା। ସର୍ଭେ ଅନୁସାରେ ୧୯୯୯ ପରଠାରୁ ଲଗାତାର ଭାବେ ପ୍ରାର୍ଥୀଙ୍କ ସଂଖ୍ୟା ବଢିବାରେ ଲାଗିଛି। ଅମାନତ ହରାଉଥିବାରୁ ସେମାନଙ୍କ ଦ୍ବାରା ଜମା ହୋଇଥିବା ଅର୍ଥ ବି ବାଜ୍ଯାପ୍ତ ହେଉଛି । ୨୦୦୯ ମସିହାରେ ୮ ହଜାର ୭୦ ଜଣ ପ୍ରାର୍ଥୀ ଥିବାବେଳେ ସେମାନଙ୍କ ମଧ୍ଯରୁ ଜମାରାଶି ହରାଇଥିଲେ ୬ ହଜାର ୮୨୯ ପ୍ରାର୍ଥୀ। ୨୦୧୪ ମସିହାରେ ୮ ହଜାର ୨୫୧ ଜଣ ପ୍ରାର୍ଥୀଙ୍କ ମଧ୍ୟରୁ ଜମା ଅର୍ଥ ହରାଇଥିଲେ ୭ ହଜାର ପ୍ରାର୍ଥୀ। ୨୦୧୯ ମସିହାରେ ୮ ହଜାର ୫୪ ପ୍ରାର୍ଥୀଙ୍କ ମଧ୍ୟରୁ ଜମା ରାଶି ହରାଇଥିଲେ ୬ ହଜାର ୯୨୩ ପ୍ରାର୍ଥୀ। ଇସିଆଇ ତଥ୍ଯ ଅନୁସାରେ ୨୦୦୯, ୨୦୧୪, ୨୦୧୯ ନିର୍ବାଚନରେ ପ୍ରାୟ ୮୫ ପ୍ରତିଶତ ପ୍ରାର୍ଥୀ ସିକ୍ଯୁରିଟି ଡିପୋଜିଟ ହରାଇଛନ୍ତି। ନିୟମ ଅନୁସାରେ ଦିଆଯାଇଥିବା ବୈଧ ଭୋଟର ଏକ ଷଷ୍ଠାଂଶ ହାସଲ କରିବାରେ ବିଫଳ ହେଲେ ଜଣେ ପ୍ରାର୍ଥୀଙ୍କ ଅମାନତ ରାଶି ବାଜ୍ଯାପ୍ତି ହୋଇଥାଏ।

୨୦୦୯ ରୁ ୨୦୧୯ ମଧ୍ୟରେ ମୋଟ ୨୪ ହଜାର ୩୭୫ ପ୍ରାର୍ଥୀ ପ୍ରତିଦ୍ବନ୍ଦିତା କରିଥିଲେ। ସେମାନଙ୍କ ମଧ୍ୟରୁ ୨୦ ହଜାର ୭୫୨ ପ୍ରାର୍ଥୀ ଅମାନତ ରାଶି ହରାଇଥିଲେ। ୨୦୦୯ରେ ୧୫ କୋଟି ୫୯ ଲକ୍ଷ, ୨୦୧୪ ରେ ୧୪ କୋଟି ୫୭ ଲକ୍ଷ ଓ ୨୦୧୯ ରେ ୧୫ କୋଟି ୮୬ ଲକ୍ଷ ଟଙ୍କାର ଜମାରାଶି ବାଜ୍ଯାପ୍ତି ହୋଇଛି।

୧୯୫୧ ମସିହାରେ ହୋଇଥିବା ନିର୍ବାଚନରେ ବିଧାନସଭା ଓ ଲୋକସଭା ନିର୍ବାଚନରେ ମୋଟ ପ୍ରାର୍ଥୀ ସଂଖ୍ୟା ଥିଲେ ୯ ହଜାର ୬୭ । ସେତେବେଳ ବାଜ୍ଯାପ୍ତ ଅର୍ଥ ପରିମାଣ ଥିଲା ୨୨ ଲକ୍ଷ ୮୦ ହଜାର ଟଙ୍କା । ସେତେବେଳେ ସାଧାରଣ ବର୍ଗର ପ୍ରାର୍ଥୀଙ୍କ ଲାଗି ଜମାରାଶି ଥିଲା ୫ ଶହ ଟଙ୍କା । ଏସସି ଓ ଏସଟି ବର୍ଗର ପ୍ରାର୍ଥୀଙ୍କ ଲାଗି ଜମାରାଶି ଥିଲା ୨୫୦ ଟଙ୍କା।