ମାଥିଲି : କୁକୁଡା ଦେଲେ ପଟ୍ଟା ଦେବି ! ମାଲକାନଗିରି ଜିଲ୍ଲା ମାଥିଲି ବ୍ଲକ ରାଜସ୍ବ ନିରୀକ୍ଷକଙ୍କ ବିରୋଧରେ ଆସିଛି ଏମିତି ଅଭିଯୋଗ । କୁକୁଡା ସହ ମୋଟା ଅଙ୍କ ବି ଦାବି କରୁଛନ୍ତି ଆରଆଇ । ଜିଲ୍ଲାପାଳଙ୍କ ନିକଟରେ ଫେରାଦ ହେଲେ ନିରିହ ଆଦିବାସୀ । ଜମିପଟ୍ଟା ନାଁରେ ନିରୀହ ଆଦିବାସୀଙ୍କୁ ଲୁଟ କରୁଛନ୍ତି ରାଜସ୍ବ ନିରୀକ୍ଷକ । ମାଲକାନଗିରି ଜିଲ୍ଲା ମାଥିଲି ବ୍ଲକ ଅନ୍ତର୍ଗତ କମାରପାଲି ଓ ମହୁପଦର ଅଞ୍ଚଳର ୯୦ ଜଣ ଆଦିବାସୀ ଏଭଳି ଅଭିଯୋଗ କରିଛନ୍ତି। କାହାକୁ କୁକୁଡା ମାଗୁଛନ୍ତି ତ କାହାକୁ ମୋଟ ଅଙ୍କର ଲାଞ୍ଚ ମାଗୁଛନ୍ତି। ୪୦ ରୁ ୫୦ ହଜାର ଟଙ୍କା ଦାବି କରୁଛନ୍ତି ଆରଆଇ । ମାଓପ୍ରବଣ ଅଂଚଳର ଲୋକଙ୍କୁ ବିଶ୍ବାସ ଜନ୍ମାଇ ଜମିପଟ୍ଟା, ଘରଡିହ ପଟ୍ଟା, ଜମି ଭାଗବଣ୍ଟା ଓ ଜଙ୍ଗଲ ଜମି ପଟ୍ଟା ଦେବାକୁ କହି ପ୍ରତି ଲୋକଙ୍କ ଠାରୁ ୪୦ ରୁ ୫୦ ହଜାର ଟଙ୍କା ଆଦାୟ କରିଛନ୍ତି ମହୁପଦର ଆରଆଇ କାହ୍ନୁ ଚରଣ ସ୍ବାଇଁ । ଆରଆଇଙ୍କ ଏଭଳି ନିର୍ଯ୍ଯାତନା ବିରୋଧରେ ଜିଲ୍ଲାପାଳଙ୍କ ଅଭିଯୋଗ ପ୍ରକୋଷ୍ଠରେ ଅଭିଯୋଗ କରିଛନ୍ତି ଦୁଇ ପଞ୍ଚାୟତ ଲୋକେ ।
ପୂର୍ବରୁ ମାଓବାଦୀଙ୍କ ଦଖଲରେ ଥିଲା କମାରପାଲି ଓ ମହୁପଦର । ଧିରେ ଧିରେ ସୁରକ୍ଷା ବାହିନୀର ହସ୍ତକ୍ଷେପ ପରେ ମୁଖ୍ଯସ୍ରୋତରେ ସାମିଲ ହୋଇଛନ୍ତି ଲୋକେ। ଲୋକଙ୍କ ପାଖରେ ପହଁଚିଛି ବିକାଶ। ହେଲେ ଆଦିବାସୀ ଲୋକଙ୍କ ସରଳତାର ସୁଯୋଗ ନେଇ ସରକାରୀ ଅଧିକାରୀ ସେମାନଙ୍କୁ ଲୁଟ କରିବା ଆରମ୍ଭ କରିଦେଇଛନ୍ତି। ଉପାନ୍ତ ଅଞ୍ଚଳର ଡଙ୍ଗରିଗୁଡା, ଗଲିଆଗୁଡା, କୋସ୍ରାଭଟ୍ଟା, ଗୁରୁଗୁଡା , ମହୁପଦର, ପେମ୍ରାଗୁଡା, ମୁଣ୍ତାଗୁଡା, କମାରପାଲି, ଚେରକୋପା ପ୍ରମୁଖ ଗାଁ ଲୋକେ ରାଜସ୍ବ ନିରୀକ୍ଷକଙ୍କୁ ଲକ୍ଷାଧିକ ଟଙ୍କା ଦେଇଛନ୍ତି । ଏବେ ଅଭିଯୋଗ ମିଳିବା ପରେ ମାଥିଲି ତହସିଲଦାରଙ୍କୁ ତଦନ୍ତ ନିର୍ଦ୍ଦେଶ ଦେଇଛନ୍ତି ମାଲକାନଗିରି ଜିଲ୍ଲାପାଳ । ଜମିପଟ୍ଟା ବାବଦରେ ନେଇଥିବା ଅର୍ଥ ଫେରସ୍ତ ସହ ଆରଆଇଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆନଗଲେ ଆଗାମୀ ଦିନରେ ଆନ୍ଦୋଳନର ଚେତାବନୀ ଦେଇଛି ମାଲକାନଗିରି ଜିଲା ଆଦିବାସୀ ସଂଘ ।
