ଇଞ୍ଜିନିୟରିଂ ପରୀକ୍ଷାରେ ଆସିବ ସଂସ୍କାର

ଭୁବନେଶ୍ବର: ଦୀର୍ଘଦେଢ଼ ବର୍ଷରୁ ଅଧିକ ସମୟ ହେଲା କରୋନା ଯୋଗୁ ପରୀକ୍ଷା ବିଳମ୍ବ ହେବାରୁ ପାସ୍ ଆଉଟ୍ ସମୟରେ ଛାତ୍ରଛାତ୍ରୀ ହଇରାଣ ହେଉଛନ୍ତି । ତେବେ ଠିକ୍ ସମୟରେ ପରୀକ୍ଷା କରି ଫଳ ପ୍ରକାଶ ପାଇଁ ବୈଷୟିକ ଶିକ୍ଷା ବିଭାଗ ଖସଡ଼ା ପ୍ରସ୍ତୁତ କରିଛି । ଯାହା ଉଚ୍ଚଶିକ୍ଷା ଓ ନିଯୁକ୍ତି କ୍ଷେତ୍ରରେ ସହାୟକ ହେବ ।

ଆଗ ହେବ ଅଯୁଗ୍ମ ସେମିଷ୍ଟର ପରୀକ୍ଷା । ତା’ ପରେ ଯୁଗ୍ମ ସେମିଷ୍ଟର ପରୀକ୍ଷା । କରୋନା ପାଇଁ ସାମାଜିକ ଦୂରତା ରଖି ଶିକ୍ଷା ବ୍ୟବସ୍ଥା ଜାରି ରଖିବାକୁ ଏପରି ପ୍ଲାନ କରିଛି ବୈଷୟିକ ଶିକ୍ଷା ବିଭାଗ । ସବୁ ସେମିଷ୍ଟର ପରୀକ୍ଷା ଏପ୍ରିଲ ସୁଦ୍ଧା ସାରି ୪୫ ଦିନ ଭିତରେ ଫଳ ପ୍ରକାଶ ପାଇବ । କରୋନା ପାଇଁ ବ୍ୟାପକ ପେପର ପରୀକ୍ଷା ବିଳମ୍ବ ହେଉଛି । ଯାହା ଛାତ୍ରଛାତ୍ରୀଙ୍କ ଉଚ୍ଚଶିକ୍ଷା ଓ କ୍ୟାମ୍ପସ ପ୍ଲେସମେଣ୍ଟକୁ ପ୍ରଭାବିତ କରୁଛି । କିନ୍ତୁ ପରୀକ୍ଷାରେ ସଂସ୍କାର ଆଣିବାକୁ ନିଆଯାଉଥିବା ପଦକ୍ଷେପ ଯୋଗୁଁ ଏସବୁ ସମସ୍ୟା ରହିବ ନାହିଁ ବୋଲି ଆଶା କରାଯାଉଛି ।

ପ୍ରାୟ ୧୮ ମାସ ହେଲା କରୋନା ଯୋଗୁଁ ଶିକ୍ଷା ବ୍ୟବସ୍ଥା ପ୍ରଭାବିତ ହୋଇଛି । କେତେବେଳେ ଅନଲାଇନ କ୍ଲାସ ହେଉଛି ତ କେତେବେଳେ ଅଫଲାଇନ । ଅନଲାଇନ୍ ପାଠପଢା ବି ଠିକ୍ ଭାବେ ହୋଇପାରୁନାହିଁ । ଆଉ କେବେ ସମ୍ପୂର୍ଣ୍ଣ ବନ୍ଦ ରହୁଛି ପାଠପଢ଼ା । ସେମିଷ୍ଟର ପରୀକ୍ଷାରେ ଅନିଶ୍ଚିତତା ଯୋଗୁଁ ଛାତ୍ରଛାତ୍ରୀଙ୍କ ବ୍ୟାକ୍ ପରୀକ୍ଷାର ସମୟ ବି ଗଡୁଛି । ଏପରି ସ୍ଥିତିରେ ବୈଷୟିକ ଶିକ୍ଷା ବିଭାଗର ସଂସ୍କାରମୂଳକ ପଦକ୍ଷେପକୁ ଛାତ୍ରଛାତ୍ରୀ ସ୍ବାଗତ କରିଛନ୍ତି ।

କୋଭିଡ୍‌ ସଂକ୍ରମଣ ହାର କମୁଥିବାରୁ ଆସନ୍ତା ନଭେମ୍ବରରୁ ସମ୍ପୂର୍ଣ୍ଣ ଭାବେ ଅଫଲାଇନ୍ ସେମିଷ୍ଟର କ୍ଲାସ କରିବାକୁ ରାଜ୍ୟ ସରକାର ଚିନ୍ତା କରୁଛନ୍ତି ।