ନିକି ଯୌତୁକ ହତ୍ୟା ମାମଲା: ପୁଅକୁ ଭେଟିବାକୁ ଯିବା ବେଳେ ଗିରଫ ହେଲେ ଶାଶୁ

ନୋଏଡାର ନିକି ହତ୍ୟା ମାମଲାରେ ଶାଶୁ ଦୟାବତୀ ମଧ୍ୟ ଗିରଫ । ପୁଅକୁ ଭେଟିବାକୁ JIMS ହସ୍ପିଟାଲକୁ ଯାଉଥିବା ବେଳେ ଦୟାବତୀଙ୍କୁ ଧରିଲା ପୋଲିସ । ପୋଲିସ କହିଛି ଯେ, ହତ୍ୟା ଷଡ଼ଯନ୍ତ୍ର ଏବଂ ପ୍ରମାଣ ଲୁଚାଇବାରେ ଶାଶୁଙ୍କ ଭୂମିକା ସାମ୍ନାକୁ ଆସିଛି। ପୂର୍ବରୁ ନିକିଙ୍କ ସ୍ୱାମୀଙ୍କୁ ଗିରଫ କରାଯାଇଛି। ଏବେ ପୋଲିସ ଉଭୟଙ୍କୁ ମୁହାଁମୁହିଁ ପଚରାଉଚରା କରି ମାମଲାର ଲିଙ୍କ ସଂଯୋଗ କରିବ ।

ପୋଲିସର ପ୍ରାରମ୍ଭିକ ତଦନ୍ତରୁ ଜଣାପଡିଛି ଯେ ଦୟାବତୀ ତାଙ୍କ ପୁଅର କାର୍ଯ୍ୟକଳାପ ବିଷୟରେ ଅବଗତ ଥିଲେ। ଅଭିଯୋଗ ହୋଇଛି ଯେ ସେ କେବଳ ଘଟଣାକୁ ଲୁଚାଇବାରେ ସାହାଯ୍ୟ କରିନଥିଲେ ବରଂ ତଦନ୍ତକୁ ବିଭ୍ରାନ୍ତ କରିବାକୁ ମଧ୍ୟ ଚେଷ୍ଟା କରିଥିଲେ। ଏହି କାରଣରୁ ତାଙ୍କ ବିରୁଦ୍ଧରେ ହତ୍ୟା ଷଡ଼ଯନ୍ତ୍ରରେ ସମ୍ପୃକ୍ତି ଏବଂ ପ୍ରମାଣ ନଷ୍ଟ କରିବା ଭଳି ଧାରା ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି।

 ଅନ୍ୟପଟେ ନିକିଙ୍କ ବାପାମାଆ ଅଭିଯୋଗ କରିଛନ୍ତି ଯେ, ଶ୍ୱାଶୁ ଘରେ ଦୀର୍ଘ ଦିନ ଧରି ମାନସିକ ନିର୍ଯାତନାର ସମ୍ମୁଖୀନ ହେଉଥିଲେ। ଘରୋଇ କଳହରେ ଦୟାବତୀଙ୍କ ମନୋଭାବ ପ୍ରାୟତଃ କଠୋର ଥିଲା। ଏନେଇ ସମ୍ପର୍କୀୟ ଏବଂ ପଡ଼ୋଶୀଙ୍କ ବୟାନ ମଧ୍ୟ ସୂଚାଇ ଦେଉଛି ଯେ ଶାଶୁ ଏବଂ ବୋହୂଙ୍କ ମଧ୍ୟରେ ସମ୍ପର୍କ ତିକ୍ତ ଥିଲା। ତଦନ୍ତ ଏଜେନ୍ସିଗୁଡ଼ିକ ଏହି ଦିଗକୁ ନେଇ ଯାଞ୍ଚ କରୁଛନ୍ତି ଯେ ନିରନ୍ତର ଚାପ ଏବଂ ନିର୍ଯାତନା ହତ୍ୟାର କାରଣ କି ନାହିଁ।