ନନ୍ଦିଘୋଷ ବ୍ୟୁରୋ: ରୁଷ-ୟୁକ୍ରେନ ଯୁଦ୍ଧର ଅବସାନ ଲାଗି ଫିଟୁଛି ବାଟ । ଆଜି ୱାଶିଂଟନରେ ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପ ଓ ୟୁକ୍ରେନ ରାଷ୍ଟ୍ରପତି ଭୋଲୋଦିମିର ଜେଲେନସ୍କିଙ୍କ ମଧ୍ୟରେ ହେବ ଆଲୋଚନା । ଯୁଦ୍ଧର ଅନ୍ତଲାଗି ୟୁକ୍ରେନ, ଆମେରିକା ଓ ରୁଷ ମଧ୍ୟରେ ତ୍ରିପାକ୍ଷିକ ଆଲୋଚନା ଲାଗି ପ୍ରସ୍ତାବ ଦେଇଛନ୍ତି ଜେଲେନସ୍କି। ଆଲାସ୍କାରେ ଯଦିଓ ଟ୍ରମ୍ପ ଓ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ମଧ୍ୟରେ ଆଲୋଚନା ଅସମାହିତ ରହିଥିଲା ତଥାପି ଶାନ୍ତି ପ୍ରତିଷ୍ଠା ଲାଗି ଏହା ବଡ଼ ସହାୟକ ହୋଇଛି । ରୁଷ-ୟୁକ୍ରେନ ଯୁଦ୍ଧ ବିରତି ପ୍ରସଙ୍ଗରେ ସହମତି ହୋଇ ପାରି ନଥିଲେ ବି ଟ୍ରମ୍ପ ଓ ପୁଟିନଙ୍କ ମଧ୍ୟରେ ସୌହାର୍ଦ୍ଦ୍ୟପୂର୍ଣ୍ଣ ଆଲୋଚନା ଅନେକ ବାର୍ତ୍ତା ଦେଇଛି ।
ଯୁଦ୍ଧ ବନ୍ଦ କରିବା ଲାଗି ରୁଷ ଉପରେ ଚାପ ପ୍ରୟୋଗ ସକାଶେ ଫ୍ରାନ୍ସ ରାଷ୍ଟ୍ରପତି ଏମାନୁଏଲ ମାକ୍ରନ, ଜର୍ମାନ ଚାନସେଲର ଫ୍ରେଡରିକ ମର୍ଜ, ବ୍ରିଟେନ ପ୍ରଧାନମନ୍ତ୍ରୀ କେର୍ ଷ୍ଟାର୍ମର, ୟୁରୋପୀୟ କମିଶନ ସଭାପତି ଉର୍ସୁଲା ଭନଡିରେ ଲେୟନ ଏକ ମିଳିତ ଘୋଷଣାନାମା ଜାରି କରିଥିଲେ। ଯୁଦ୍ଧ ବନ୍ଦ ହେଲେ କେବଳ ଭାରତ ନୁହେଁ ବିଶ୍ବ ସମୁଦାୟ ଉପକୃତ ହେବେ। ବିଶ୍ବ ଅର୍ଥନୀତିରେ ବି ବଡ଼ ପରିବର୍ତ୍ତନ ଘଟିବ ।
