ସୁଧୁରିବାକୁ ଦେଇଥିଲୁ ଯଥେଷ୍ଟ ସମୟ, ପେଟିଏମକୁ ନେଇ ଏମିତି କହିଲେ ଆରବିଆଇ ମୁଖ୍ୟ

ନୂଆଦିଲ୍ଲୀ: ପେଟିଏମ ଉପରେ RBI ଗତ ଜାନୁଆରୀ ୩୧ ତାରିଖରୁ ରୋକ୍ ଲଗାଇଛି । ଏହି ଖବର ପର ଠାରୁ ଏବେ ପେଟିଏମର କ’ଣ ହେବ ତାହା ସମସ୍ତଙ୍କ ମନରେ ପ୍ରଶ୍ନ ଉଠୁଛି । କ’ଣ ୨୯ ଫେବୃଆରୀ ପରେ ପେଟିଏମରେ ପେମେଣ୍ଟ ବନ୍ଦ ହେଇଯିବ ? ଏବେ ମୁଦ୍ରା ନୀତି ଘୋଷଣା କରିବା ସମୟରେ ଆରବିଆଇ ଗଭର୍ଣ୍ଣର ଶକ୍ତିକାନ୍ତ ଦାସ ବଡ଼ କଥା କହିଛନ୍ତି । ସେ କହିଛନ୍ତି ଯେ, ଏପରି କମ୍ପାନୀ ଗୁଡ଼ିକ ନିୟମର ଗମ୍ଭୀରତାକୁ ପାଳନ କରିବା ଉଚିତ । ସେମାନେ ଗ୍ରାହକଙ୍କ ସ୍ବାର୍ଥକୁ ରକ୍ଷା କରିବା ଉଚିତ । ପେଟିଏମର ନାଁ ନ ନେଇ ଏପରି କହିଛନ୍ତି ଶକ୍ତିକାନ୍ତ ଦାସ । ଏହାସହ ସାମ୍ବାଦିକଙ୍କ ପ୍ରଶ୍ନର ଉତ୍ତର ଦେଇ ସେ କହିଛନ୍ତି ଯେ, ପେଟିଏମକୁ ପର୍ଯ୍ୟାପ୍ତ ସମୟ ଦିଆଯାଇଥିଲା । କିନ୍ତୁ ସେ ନିୟମ ପାଳନ କରୁ ନଥିବାରୁ ତା ବିରୋଧରେ କାର୍ଯ୍ୟାନଷ୍ଠାନ ନିଆଯାଇଥିଲା ।

ନିୟମାବଳୀ ଅଧୀନରେ ଆସୁଥିବା କମ୍ପାନୀଗୁଡ଼ିକ ସହିତ ଆରବିଆଇ ସବୁବେଳେ ଦ୍ବିପାକ୍ଷିକ କାର୍ଯ୍ୟକଳାପ ଉପରେ ଗୁରୁତ୍ବ ଦେଇଥାଏ । ଆମର ଆଶା ଥାଏ କମ୍ପାନୀ ସଠିକ୍ ନିଷ୍ପତ୍ତି ନେବ । ଯେତେବେଳେ ବି କୌଣସି ବ୍ୟାଙ୍କ NBFC ନିୟମ ଅନୁସାରେ ସଠିକ ନିଷ୍ପତ୍ତି ନେଇ ନଥାଏ ଆମେ ତା’ ଉପରେ ରୋକ୍ ଲଗାଇଥାଉ ।