ଭୁବନେଶ୍ୱର: ରେଳବାଇ ପ୍ରସଙ୍ଗରେ ରାଜ୍ୟ ସରକାରଙ୍କୁ ବିଜେଡିର ସମାଲୋଚନା । ଓଡ଼ିଶାର ଅଧିକ କ୍ଷତି ଘଟାଇବା ଲାଗି କେନ୍ଦ୍ରର ଯୋଜନା। ନୂଆବର୍ଷରୁ ରାଜ୍ୟର କ୍ଷତି ପାଇଁ ଚାଲିଛି ଚକ୍ରାନ୍ତ। ଆସନ୍ତାକାଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜମ୍ମୁରୁ ରାୟଗଡା ପାଇଁ ନୂଆ ରେଳ ଡିଭିଜନ ପାଇଁ ଭିତ୍ତିପ୍ରସ୍ତର ସ୍ଥାପନ କରିବେ। ହେଲେ ଏହି ପ୍ରକଳ୍ପ ପୂର୍ବରୁ ବିଜେଡି ଦାବି କରିଆସୁଥିଲା। ରାୟଗଡା ଡିଭିଜନର ବିସ୍କୁଟ ଦେଇ ଓଡ଼ିଶାର କ୍ଷତି କରିବାକୁ କେନ୍ଦ୍ର ସରକାର ଚାହୁଁଥିବାବେଳେ ରାଜ୍ୟ ସରକାର ଚୁପ୍ ବୋଲି କହିଛି ବିଜେଡି।
ବିଜେଡି ପକ୍ଷରୁ ସାମ୍ବାଦିକ ସମ୍ମିଳନୀରେ କୁହାଯାଇଛି- ଦେଶରେ ପ୍ରଥମ ଥର ଲାଗି ରେଳବାଇ ବିଜ୍ଞପ୍ତି ପ୍ରକାଶ କରି ନଥିବାବେଳେ ଏହାର ଉଦଘାଟନ ହେବାକୁ ଯାଉଛି। ଏହି ଡିଭିଜନର ମାଲିକାନା, କେଉଁ ଅଞ୍ଚଳ ରହିବ କିଛି ସ୍ପଷ୍ଟ ହୋଇନି। ଡିପିଆର ସମ୍ପର୍କରେ ସ୍ପଷ୍ଟ ସୂଚନା ମିଳିନାହିଁ। କୋଟିଆ, ପୋଲାଭରମ ପରି ଏହା ରାଜ୍ୟ ଲାଗି କ୍ଷତି ଘଟାଇବ। ଡବଲ ଇଂଜିନ ସରକାର ଚୁପ ହୋଇ ବସିଛନ୍ତି। ପୂର୍ବତଟ ରେଳବାଇ ଭାଙ୍ଗିବାକୁ ଏହି ସବୁ ଯୋଜନା ହୋଇଛି। ନିୟମ ଅନୁସାରେ ତିନୋଟି ଡିଭିଜନ ହେବ ଏବଂ ୱାଲଟିଅର ଡିଭିଜନ ଭାଙ୍ଗିବ। ଫଳରେ ସିଂହ ଭାଗ ଯିବ ଆନ୍ଧ୍ର ନିକଟକୁ। ଅଳ୍ପ କିଛି ଭାଗ ଆସିବ ରାୟଗଡା। ୧୯୯୮ରୁ ଆରମ୍ଭ ହୋଇଥିବା ପୂର୍ବତଟ ରେଳବାଇ ୩ ଲକ୍ଷ କୋଟି ଟଙ୍କାର ରାଜସ୍ବ ଦେଇସାରିଲାଣି। ଏହାର ୬୦ ପ୍ରତିଶତ ଆସିଥାଏ ୱାଲଟିୟର ଡିଭିଜନରୁ। ମାତ୍ର ଓଡିଶାରୁ ଛଡାଇ ଆନ୍ଧ୍ରକୁ ଖୁସି କରିବା ଲାଗି ଯୋଜନା ଚାଲିଛି ବୋଲି କହିଛି ବିଜେଡି। ପୂର୍ବତଟ ରେଳ ପାଖରେ କିଛି ରହିବ ନାହିଁ। ରାୟଗଡା ଜିଲ୍ଲାରେ ଥିବା ରେଳ ଷ୍ଟେସନ ରାୟଗଡା ଅଧୀନରେ ରହିବ ନା ନାହିଁ, ତାହା ସ୍ପଷ୍ଟ ହୋଇନି। ଓଡ଼ିଶାକୁ କ୍ଷତି ଭରଣା ପାଇଁ ପଶ୍ଚିମ ବଙ୍ଗରେ ଥିବା ଓଡ଼ିଶାର ଡିଭିଜନ ଦିଆଯାଉ। ଆଞ୍ଚଳିକ ବୈଷମ୍ୟ କରିବାର ଅଧିକାର କେନ୍ଦ୍ର ସରକାରର ନାହିଁ। ରାଉରକେଲାରେ ନୂଆ ଡିଭିଜନ ହେଉ ବୋଲି ଦାବି କରିଛି ବିଜେଡି। ଆଗାମୀ ବିଧାନସଭା ଅଧିବେଶନରେ ଏହାକୁ ସ୍ୱତନ୍ତ୍ର ମୋସନ ଜରିଆରେ ସରକାରଙ୍କୁ ଘେରିବ ବିଜେଡି।
