ନନ୍ଦିଘୋଷ ବ୍ୟୁରୋ: ଶିଳ୍ପ ଜଗତର ଅମୂଲ୍ଯ ତାରକା ରତନ ଟାଟାଙ୍କ ବିୟୋଗରେ ସ୍ତବ୍ଧ ସାରା ଦେଶବାସୀ। ରାଜନୀତିଜ୍ଞଙ୍କଠାରୁ ଆରମ୍ଭ କରି ଶିଳ୍ପପତି, ସାଧାରଣ ଜନତାଙ୍କଠାରୁ ଆରମ୍ଭ କରି କୋଟିପତି- ସମସ୍ତେ ଭାସିଛନ୍ତି ଶୋକରେ। ରତନଙ୍କ ବିୟୋଗରେ ମହାରାଷ୍ଟ୍ରରେ ଘୋଷଣା ହୋଇଛି ଦିନିକିଆ ଶୋକଦିବସ। ସମସ୍ତ ସରକାରୀ କାର୍ଯ୍ୟାଳୟରେ ଜାତୀୟ ପତାକା ହୋଇଛି ଅର୍ଦ୍ଧନମିତ। ମୁମ୍ବାଇ ନରିମାନ ପଏଣ୍ଟସ୍ଥିତ ନ୍ଯାସନାଲ ସେଣ୍ଟର ଫର ପରଫର୍ମିଂ ଆର୍ଟସ ବା ଏନସିପିଏରେ ରଖାଯାଇଛି ମରଶରୀର। ସେଠାରେ ତାଙ୍କର ଶେଷ ଦର୍ଶନ କରୁଛନ୍ତି ଜନତା। ଓରଲିରେ ତାଙ୍କର ଶେଷକୃତ୍ଯ ସମ୍ପନ୍ନ ହେବ। ଜଣେ କିମ୍ବଦନ୍ତୀ ଶିଳ୍ପପତିଙ୍କୁ ହରାଇ ତାଙ୍କର ସହକର୍ମୀ ହୋଇଛନ୍ତି ଶୋକାଭିଭୂତ। କେବଳ ପରିବାର ନୁହେଁ, ସବୁବର୍ଗରେ ଲୋକେ ଆସି ରତନଙ୍କୁ କରୁଛନ୍ତି ଶେଷ ଦର୍ଶନ।
