ପାରମ୍ପରିକ ମିଠାର ପ୍ରସାର ପାଇଁ ଅଭିନବ ଉଦ୍ୟମ: ବାଲେଶ୍ବରରେ ଆୟୋଜିତ ହେଲା ରସଗୋଲା ମହୋତ୍ସବ

ବାଲେଶ୍ବର: ମିଠା ଓ ପିଠାରେ ବାସିଲା ପରିବେଶ । ରକମ ରକମର ମିଠା ସାଙ୍ଗକୁ ପିଠାର ଆସର । ୫ ଟଙ୍କାରୁ ଆରମ୍ଭ କରି ଶହେଟଙ୍କା ରହିଛି ମୂଲ୍ୟ । ଧଳା, ହଳଦିଆ, ନାଲି ରଙ୍ଗ ସାଙ୍ଗକୁ ବିଭିନ୍ନ ଫ୍ଲେବରର ରସଗୋଲା । ବାଲେଶ୍ୱରରେ ଆୟୋଜିତ ହୋଇଛି ରସଗୋଲା ମହୋତ୍ସଵ । ସ୍ଥାନୀୟ ବ୍ରିଟ କଲ୍ୟାଣ ମଣ୍ଡପରେ ଆୟୋଜିତ ଏହି କାର୍ଯ୍ୟକ୍ରମ ରେ ୨୫ ରୁ ଅଧିକ ମିଠା ଓ ପିଠାର ଷ୍ଟଲ ଦେଖିବାକୁ ମିଳିଛି । ଯେଉଁଥିରେ ଜିଲ୍ଲାର ନାମିଦାମୀ ମିଠା ଦୋକାନ ନିଜର ଷ୍ଟଲ ମାଧ୍ୟମରେ ରସଗଲା ସମେତ ବିଭିନ୍ନ ମିଠା ପ୍ରଦର୍ଶିତ କରିଛନ୍ତି । ଯେଉଁଥିରେ ୪ ପ୍ରକାର ରସଗୋଲା ସହ କ୍ରିମ୍ ମିଠା, ବିଭିନ୍ନ ରକମର ସନ୍ଦେସ, ବର୍ଫି, କାଲାକମ୍, ରସାବଳି ଆଦି ରହିଛି । ମୂଲ୍ଯ ୫ ଟଙ୍କାର ଆରମ୍ଭ କରି ୨୦, ୫୦ ଓ ଶହେ ଟଙ୍କା ରହିଛି । ସେହିପରି ରସମଲାଇ ୨ ପ୍ରକାର ୨୦ ଟଙ୍କା ୪୦ ଟଙ୍କା ରହିଛି । କେଶର ମାଲାଇ, ଚମ୍ ଚମ ସ୍ପେଶାଲ ମଲାଇଇ ଆଦିର ମଜା ନେଇଛନ୍ତି ଲୋକେ । ଓଡ଼ିଶାର ପରିଚୟ ସ୍ୱାଦିଷ୍ଟ ରସଗୋଲା ସହିତ ବାଲେଶ୍ଵରର ମିଠାର ପ୍ରଚାର ପ୍ରସାର କରିବା ଓ ନିଆରା ଢଙ୍ଗରେ ଓଡିଶା ଦିବସ ପାଳନ କରିବା ଲକ୍ଷ୍ୟରେ ଏପରି ଅଭିନବ କାର୍ଯ୍ୟକ୍ରମ କରାଯାଇଛି ।

ଖାଲି ମିଠା ନୁହେଁ ଭଳିକି ଭଳି ପିଠା ମଧ୍ୟ ଏହି ପ୍ରଦର୍ଶନୀରେ ସ୍ଥାନ ପାଇଛି । ଓଡ଼ିଶାର ପାରମ୍ପରିକ ମଣ୍ଡା, ପୋଡ଼, କାକରା, ମୁଗମଣ୍ଡା, ଲାଉ ପୋଡ଼ାପିଠ, ମାଣ୍ଡିଆ ପନିପରିବା ଚକୁଳି, ମାଣ୍ଡିଆ କାକରା ଦେଖିବାକୁ ମିଳିଛି । ୧୫ ରୁ ଆରମ୍ଭ କରି ୧୫୦ ଟଙ୍କା ପର୍ଯ୍ୟନ୍ତ ରହିଛି ଏହାର ମୂଲ୍ୟ । ବାଲେଶ୍ୱର ପ୍ରତିଭା ବିକାଶ ଟ୍ରଷ୍ଟ ପକ୍ଷରୁ ଆୟୋଜିତ ଏହି ନିଆରା ଓ ସ୍ୱାଦିଷ୍ଟ କାର୍ଯ୍ୟକ୍ରମରେ ମିଠା ଓ ପିଠାର ଭରପୂର ମଜା ଲୁଟିଛନ୍ତି ସହରବାସୀ ।