ରଶ୍ମିକା ମନ୍ଦନା ଡିପଫେକ ଭିଡିଓ ମାମଲା; ୪ ଅଭିଯୁକ୍ତଙ୍କୁ ଜେରା କଲା ଦିଲ୍ଲୀ ପୋଲିସ, ମାଷ୍ଟରମାଇଣ୍ଡକୁ ଖୋଜୁଛି ପୋଲିସ
1 min read
ନୂଆଦିଲ୍ଲୀ: ରଶ୍ମିକା ମନ୍ଦନା ଡିପଫେକ ଭିଡିଓ ମାମଲା। ୪ ଅଭିଯୁକ୍ତଙ୍କୁ ଜେରା କଲା ଦିଲ୍ଲୀ ପୋଲିସ। ବଡ଼କଥା ହେଉଛି ଡିପଫେକ ଭିଡିଓ ମାମଲାରେ ୩ ଅଭିଯୁକ୍ତଙ୍କ ନାଁ ଦେଇଥିଲା ମେଟା। ଜେରାରୁ ଜଣାଯାଇଛି- ଜାଲ୍ ପରିଚୟ ଆଧାରରେ ଡିପଫେକ ଭିଡିଓ ଅପଲୋଡ କରାଯାଇଥିଲା। ତେବେ ଏହି ଫେକ ଭିଡିଓକୁ ଅଭିଯୁକ୍ତମାନେ ସୃଷ୍ଟି କରି ନଥିଲେ ବରଂ ଅପଲୋଡ କରିଥିବା ପ୍ରାଥମିକ ତଦନ୍ତରୁ ଜଣାପଡିଛି।
ଏହି ମାମଲାରେ ପୋଲିସ ଅନ୍ୟ ଅଭିଯୁକ୍ତ ମାନଙ୍କୁ ଜେରା କରିବ ବୋଲି ସୂଚନା ମିଳିଛି। ଗତ ନଭେମ୍ବରରେ ରଶ୍ମିକାଙ୍କ ଫେକ୍ ଭିଡିଓକୁ ନେଇ ଚାଞ୍ଚଲ୍ୟ ସୃଷ୍ଟି ହୋଇଥିଲା। ଏହି ଘଟଣାକୁ ନେଇ ଅମିତାଭ ବଚ୍ଚନ, ବିଜୟ ଦେବରକୋଣ୍ଡା, ନାଗା ଚୈତନ୍ୟ, ମୃଣାଳ ଠାକୁର ସମାଲୋଚନା କରିବା ସହ ଆଇନଗତ କାର୍ଯ୍ୟାନୁଷ୍ଠାନ ଲାଗି ଦାବି କରିଥିଲେ।
ଅଧିକ ପଢନ୍ତୁ:- କ’ଣ ଏହି DeepFake ଭିଡିଓ? ଜାଣନ୍ତୁ ଚଳିତ ବର୍ଷ କେତେ ଜଣ ଏହାର ଶିକାର ହୋଇଛନ୍ତି
ଏହି ଘଟଣାକୁ ନେଇ ଆଇପିସିର ଧାରା ୫୬୫, ୪୬୯ ଓ ଆଇଟି ଆଇନର ଧାରା ୬୬ସି, ୬୬ଇ ଅନୁସାରେ ଦିଲ୍ଲୀ ପୋଲିସରେ ମାମଲା ରୁଜୁ ହୋଇଥିଲା। ରଶ୍ମିକାଙ୍କ ସମେତ କାଟ୍ରିନା କୈଫ ଓ କାଜୋଲଙ୍କ ଡିପଫେକ ଭିଡିଓ ମଧ୍ୟ ଅପଲୋଡ ହୋଇଥିବା ଅଭିଯୋଗ ହୋଇଥିଲା।
ଉଲ୍ଲେଖଯାଗ୍ୟ, ଗତ ନଭେମ୍ବର ମାସରେ ଡିପଫେକ ଭିଡିଓର ଶିକାର ହୋଇଥିଲେ ଅଭିନେତ୍ରୀ ରଶ୍ମିକା ମନ୍ଦାନା। ତେବେ ଅରିଜିନାଲ ଭିଡିଓରେ ବ୍ରିଟିଶ-ଭାରତୀୟ ଯୁବତୀ ଜାରା ପଟେଲ ଅଛନ୍ତି। କିନ୍ତୁ ଡିପ୍ଫେକ୍ରେ ତାଙ୍କ ଚେହେରାକୁ ବଦଳାଇ ରଶ୍ମିକାଙ୍କ ଚେହେରା ରଖାଯାଇଥିଲା। ରଶ୍ମିକାଙ୍କ ଡିପଫେକ ଭିଡିଓ ଭାଇରଲ ହେବାପରେ ତୀବ୍ର ପ୍ରତିକ୍ରିୟା ପ୍ରକାଶ କରିଥିଲେ ଅଭିନେତ୍ରୀ । ନକଲି ଭଡିଓ ଦେଖି ଖୁବ୍ ଦୁଃଖିତ । ଏହା ତାଙ୍କର ଭିଡିଓ ନୁହେଁ । ଆର୍ଟିଫିସିଆଲ ଇଣ୍ଟେଲିଜେନ୍ସ ସାହାଯ୍ୟରେ ଏହା ପ୍ରସ୍ତୁତ ହେଇଛି ବୋଲି ଅଭିଯୋଗ ଆଣିଥିଲେ ଅଭିନେତ୍ରୀ ରଶ୍ମିକା ମନ୍ଦାନା।
