ଲକ୍ଷେ ୪୩ ହଜାର ଟଙ୍କାରେ ବିକ୍ରି ହେଲା ୨୨ କେଜିର ମାଛ

ଭଦ୍ରକ: ଧାମରା ଚନ୍ଦନୀପାଳରେ ମତ୍ସ୍ୟଜୀବୀଙ୍କ ଜାଲରେ ପଡ଼ିଲା ୨୨ କେଜିଆ ତେଲିଆ ମାଛ । ଯାହାକୁ କେଜି ପିଛା ୬ ହଜାର ଟଙ୍କା ଦେଇ କିଣିଛି ମୁମ୍ବାଇର ଏକ ଫାର୍ମା କମ୍ପାନୀ । ମାଛକୁ ଏକ ଲକ୍ଷ ୪୩ ହଜାର ଟଙ୍କାରେ ଫାର୍ମାସ୍ୟୁଟିକାଲ ଫାର୍ମ କିଣିଛି । ତାଳଚୁଆଁ ଅଞ୍ଚଳର ଜଣେ ମତ୍ସ୍ୟଜୀବୀଙ୍କ ଜାଲରେ ଘୋଲ ନାମକ ମାଛ ପଡ଼ିଥିଲା । ଯାହାକୁ ସ୍ଥାନୀୟ ଅଞ୍ଚଳରେ ତେଲିଆ ମାଛ କୁହନ୍ତି ।

ଗଭୀର ସମୁଦ୍ରରୁ ମାଛ ଧରାପଡ଼ିଛି । ରାଜ୍ୟରେ ଦୁଇ ଦିନ ଧରି ବର୍ଷା ଲାଗି ରହିଛି । ଅନ୍ୟପଟେ କୋଭିଡ୍ ଯୋଗୁଁ ଅନେକ କଟକଣା ଲାଗିଛି । ଏହାରି ଭିତରେ ୨୨ କେଜିର ଘୋଲ ମାଛ ପାଇଁ ନିଲାମ ଡକାଯାଇଥିଲା । ଯାହାକୁ ମୁମ୍ବାଇ ସ୍ଥିତ ଏକ ଫାର୍ମା କମ୍ପାନୀ କେଜି ପିଛା ୬ ହଜାର ଟଙ୍କା ଦେଇ କିଣିଛି । ସାମୁଦ୍ରିକ ପ୍ରଜାତିର ମହଙ୍ଗା କିସମର ମାଛ ଘୋଲ ।

ଏହି ମାଛ ସମୁଦ୍ର ସୁନା ଭାବେ ପରିଚିତ । ଏହାକୁ ଔଷଧ ପାଇଁ ବ୍ୟବହାର କରାଯାଏ । ବିଶେଷକରି ଇଣ୍ଡୋ-ପେସିଫିକ୍ କ୍ଷେତ୍ରରେ ଏହା ଦେଖାଯାଏ । ପ୍ରଜନନ ସମୟରେ ସେମାନେ ଗଭୀର ଜଳରୁ ବାହାରକୁ ଚାଲି ଆସନ୍ତି । ପୂର୍ବରୁ ଏହି ପ୍ରଜାତିର ୨ଟି ମାଛ ଧରା ପଡ଼ିଥିବା ବେଳେ କେଜି ପିଛା ୬ ହଜାର ଟଙ୍କାରେ ବିକ୍ରି ହୋଇଥିବା ଗ୍ରାମବାସୀ କହିଛନ୍ତି ।