ନନ୍ଦିଘୋଷ ବ୍ୟୁରୋ: ପୁଣି ଚର୍ଚ୍ଚାରେ ରଣବୀର କପୁରଙ୍କ ଅଭିନୀତ ଫିଲ୍ମ ‘ରାମାୟଣ’ । କିନ୍ତୁ ଏଥର ଚର୍ଚ୍ଚା ବଜେଟ କିମ୍ବା ଷ୍ଚାର କାଷ୍ଟ ପାଇଁ ନୁହେଁ ବରଂ ଫିଲ୍ମ ପ୍ରଯୋଜକଙ୍କ ଅଫିସ ଉପରେ ଆୟକର ବିଭାଗର ଚଢଉ ପାଇଁ ହେଉଛି ।
ଦୀପାବଳି ଅବସରରେ ରିଲିଜ ହେବାକୁ ଥିବା ବର୍ଷର ସବୁଠୁ ବଡ଼ ଫିଲ୍ମ ‘ରାମାୟଣ’ର ପ୍ରଯୋଜକ ନମିତ ମଲହୋତ୍ରାଙ୍କ ପ୍ରାଇମ ‘ଫୋକସ ଲିମିଟେଡ଼ କମ୍ପାନୀ’ର ମୁମ୍ବାଇସ୍ଥିତ ଅଫିସରେ ବୁଧବାର ଆୟକର ବିଭାଗ ଚଢ଼ଉ କରିଥିଲା । କମ୍ପାନୀ ଜରିଆରେ ବିଦେଶକୁ ବେଆଇନ ଭାବେ ଟଙ୍କା ପଠାଯାଇଥିବା ଆୟକର ବିଭାଗ ଆଶଙ୍କା କରୁଛି । କିଛି ଦିନ ତଳେ ଏହି ମାମଲାରେ ବଲିଉଡ଼ ଅଭିନେତ୍ରୀ ରକୁଲ ପ୍ରୀତ ସିଂହ, ପ୍ରଯୋଜକ ବାସୁ ଭଗନାନି ଓ ପାନୋରମା ଷ୍ଟୁଡ଼ିଓ ଉପରେ ଚଢଉ ହୋଇଥିଲା । ସେଠାରୁ ମିଳିଥିବା ସୂଚନାକୁ ଆଧାର କରି ଏହି ଚଢ଼ଉ କରାଯାଇଥିବା କୁହାଯାଉଛି । ଅବଶ୍ୟ ଆୟକର ବିଭାଗ ଏନେଇ କୌଣସି ଆନୁଷ୍ଠାନିକ ଭାବେ ବୟାନ ଜାରି କରିନାହିଁ ।
ନମିତ ମଲହୋତ୍ରାଙ୍କ ‘ଫୋକସ ଲିମିଟେଡ଼ କମ୍ପାନୀ’ଏକ ପ୍ରମୁଖ ମିଡ଼ିଆ ଓ ମନୋରଞ୍ଜନ ସେବା ପ୍ରଦାନକାରୀ କମ୍ପାନୀ ଅଟେ । ଏହା ଭିଜୁଆଲ ଇଫେକ୍ଟସ୍ , ଆନିମେସନ୍ ଓ ପୋ।ଷ୍ଟ ପ୍ରଡ଼କ୍ସନ୍ କାମ କରିଥାଏ । ତେବେ ଏହି କମ୍ପାନୀର ଅଧିକାଂଶ କାମ ବିଦେଶରୁ ପରିଚାଳିତ ହୋଇଥାଏ । ଏହାର ରାଜସ୍ବର ୯୨ ପ୍ରତିଶତ ଅଂଶ ବିଦେଶରୁ ଆସୁଥିବା ସୂଚନା ମିଳିଛି ।
ନମିତ ମଲହୋତ୍ରାଙ୍କ ପ୍ରଯୋଜନା ଓ ନିତେଶ ତିୱାରୀଙ୍କ ନିର୍ଦ୍ଦେଶନାରେ ନିର୍ମିତ ‘ରାମାୟଣ ପାର୍ଟ ୧’ରେ ରଣବୀର କପୁର ଭଗବାନ ରାମ, ସାଇ ପଲ୍ଲବୀ ମାତା ସୀତା ଓ ୟଶ ରାବଣ ଭୂମିକାରେ ନଜର ଆସିବେ। ଫିଲ୍ମକୁ ନେଇ ଦର୍ଶକଙ୍କ ମଧ୍ୟରେ ଏବେଠାରୁ ବେଶ୍ ଉତ୍ସାହ ଦେଖିବାକୁ ମିଳୁଛି। ଫିଲ୍ମର ଅଫିସିଆଲ୍ ଥିଏଟ୍ରିକାଲ୍ ରିଲିଜ୍ ନଭେମ୍ବର ୫ରେ ହେବାକୁ ଥିବା ଜଣାପଡ଼ିଥିବା ବେଳେ, ପେଡ଼୍ ପ୍ରିଭ୍ୟୁ ନଭେମ୍ବର ୪ ତାରିଖ ବୁଧବାର ହେବ। ଅର୍ଥାତ୍ ଦର୍ଶକମାନେ ଟିକେଟ୍ ବୁକ୍ କରି ଫିଲ୍ମଟିକୁ ଗୋଟିଏ ଦିନ ପୂର୍ବରୁ ଦେଖିବାର ସୁଯୋଗ ପାଇପାରିବେ। ଫିଲ୍ମର ଅନ୍ତର୍ଜାତୀୟ ରିଲିଜ୍ ସୂଚୀକୁ ଦୃଷ୍ଟିରେ ରଖି ଏହି ପେଡ୍ ପ୍ରିଭ୍ୟୁ ଯୋଜନା କରାଯାଇଥିବା କୁହାଯାଉଛି।
