ମହିଳାଙ୍କୁ ହସ୍ତତନ୍ତ ସମବାୟରେ କେଉଁ ସୁବିଧା ମିଳୁଛି? ବିଜେଡି ପ୍ରଶ୍ନର ଉତ୍ତର ଦେଲା କେନ୍ଦ୍ର

ନୂଆଦିଲ୍ଲୀ: ରାଜ୍ୟସଭାରେ ବିଜେଡି ଉଠାଇଲା ମହିଳାଙ୍କ ସ୍ବାର୍ଥ ପ୍ରସଙ୍ଗ । ମହିଳାଙ୍କ ନେତୃତ୍ବରେ କାର୍ଯ୍ୟକ୍ଷମ ହସ୍ତତନ୍ତ ସମବାୟ ସମିତିରେ କ’ଣ ରହିଛି ବିଶେଷ ସୁବିଧା ? ଦେଶରେ ଏଭଳି କେତୋଟି ସମିତି କାର୍ଯ୍ୟକ୍ଷମ ରହିଛି ? ଏହାସହ ଓଡ଼ିଶାରେ ମହିଳାଙ୍କ ଦ୍ବାରା ପରିଚାଳିତ ସମବାୟ ସମିତିରେ ବ୍ୟବସାୟ କ୍ଷେତ୍ରରେ ସୁବିଧା ପାଇଁ କ’ଣ ଅତିରିକ୍ତ ବ୍ୟବସ୍ଥା କରାଯାଇଛି ବୋଲି ରାଜ୍ୟସଭାରେ ପ୍ରଶ୍ନ କରିଛନ୍ତି ବିଜେଡି ସାଂସଦ ମାନସ ମଙ୍ଗରାଜ ଓ ସୁଲତା ଦେଓ ।

ବିଜେଡି ସାଂସଦଙ୍କ ଅଣତାରକା ପ୍ରଶ୍ନର ଉତ୍ତର ରଖିଛନ୍ତି କେନ୍ଦ୍ର ବୟନଶିଳ୍ପ ରାଷ୍ଟ୍ରମନ୍ତ୍ରୀ ଦର୍ଶନ ଜରଦୋଶ । ୨୦୧୯-୨୦ ହସ୍ତତନ୍ତ ସେନସସ ମୁତାବକ, ଦେଶରେ ୩ହଜାର ୮୪୧ଟି ସମିତି କାର୍ଯ୍ୟକ୍ଷମ ଅଛି । ଓଡ଼ିଶାରେ ମହିଳାଙ୍କ ଦ୍ବାରା ୩୧ ଟି ହସ୍ତତନ୍ତ ସମବାୟ ସମିତି ଚାଲିଛି । କେନ୍ଦ୍ର ଓ ରାଜ୍ୟ ସରକାରଙ୍କ ଦ୍ବାରା ଲାଗୁ କରାଯାଉଥିବା ବିଭିନ୍ନ ଯୋଜନାରେ ଏହି ହସ୍ତତନ୍ତ ଏଜେନ୍ସି ବା ବୁଣାକାରଙ୍କୁ କଞ୍ଚାମାଲ କ୍ରୟ କରିବା ସହ ଭିତ୍ତିଭୂମି ନିର୍ମାଣ, ଦକ୍ଷତା ବିକାଶ, ମାର୍କେଟିଂ ଆଦି ପାଇଁ ଆର୍ଥିକ ଅନୁଦାନ ଯୋଗାଇ ଦିଆଯାଉଛି ।

ସେହିପରି ବୁଣାକାର ଓ କ୍ଲଷ୍ଟର ଚିହ୍ନଟ କରାଯାଇଥିବା ବେଳେ କେନ୍ଦ୍ର ସରକାର ସେମାନଙ୍କୁ ସହାୟତା ପ୍ରଦାନ କରୁଛନ୍ତି ବୋଲି ବୋଲି ମନ୍ତ୍ରୀ ଉତ୍ତର ରଖିଛନ୍ତି ।