LAC Issue: ସରିଲା ସର୍ବଦଳୀୟ ବୈଠକ, କାଲି ରାଜ୍ୟସଭାରେ ବିବୃତି ରଖିବେ ରାଜନାଥ
1 min read
ନୂଆଦିଲ୍ଲୀ: ସୀମାରେ ଟେନସନ୍ । ଦିଲ୍ଲୀରେ ଘନ ଘନ ବୈଠକ । ଗଲବାନ ପରେ ପ୍ୟାଙ୍ଗୋଗ୍ । ଭାରତୀୟ ସୀମରେ ଅନୁପ୍ରବେଶ ପାଇଁ ଚୀନ ସେନାର ବାରମ୍ବାର ଉଦ୍ୟମ ପରେ ଆଜି ଦିଲ୍ଲୀରେ ବସିଥିଲା ସର୍ବଦଳୀୟ ବୈଠକ । ବୈଠକରେ ଭାରତ-ଚୀନ ସମ୍ପର୍କ ନେଇ ଆଲୋଚନା ହୋଇଛି । ସୀମା ବିବାଦ ନେଇ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଆସନ୍ତାକାଲି ଦିନ ୧୨ଟାରେ ରାଜ୍ୟସଭାରେ ବିବୃତି ରଖିବେ ।
ସଂସଦର ମୌସୁମୀ ଅଧିବେଶନର ଆସନ୍ତାକାଲି ଚତୁର୍ଥ କାର୍ଯ୍ୟ ଦିବସ । ରାଜ୍ୟସଭା ସକାଳ ୯ଟାରୁ ଆରମ୍ଭ ହୋଇ ଦିନ ଗୋଟାଏ ଯାଏଁ ବସୁଛି । ତା ପରେ ଦିନ ୩ଟାରୁ ସନ୍ଧ୍ୟା ୭ଟା ଯାଏଁ ଚାଲୁଛି ଲୋକସଭା । ଆଜି ବସିଥିବା ସର୍ବଦଳୀୟ ବୈଠକରେ ବିଜେପି ପକ୍ଷରୁ ରାଜନାଥ ସିଂହ, ପୀୟୁଷ ଗୋଏଲ, ପ୍ରହଲ୍ଲାଦ ଯୋଶୀ, ଥାବରଚନ୍ଦ ଗେହଲଟ, ଅର୍ଜୁନ୍ ମେଘବାଲ ଓ ବି ମୁରଲୀଧନଙ୍କ ସମେତ ବିପକ୍ଷ ଦଳରୁ ଆନନ୍ଦ ଶର୍ମା, ଗୁଲାମ ନବି ଆଜାଦ ଉପସ୍ଥିତ ଥିଲେ ।
