ରାଜନଗର : ଗଭୀର ସମୁଦ୍ରରେ ମାଛ ମାଫିଆମାନେ ସଂଘବଦ୍ଧ ଭାବେ ବନ ବିଭାଗର ପାଟ୍ରୋଲିଂ ଟିମ ଉପରକୁ ଗୁଳିମାଡ଼ କରିଥିଲେ। ପାଟ୍ରୋଲିଂ ବୋଟକୁ ବୁଡାଇ ଦେବା ପାଇଁ ଉଦ୍ୟମ କରିଥିଲେ ସେମାନେ। ଏହି ଘଟଣାକୁ ଦୁଇ ମାସ ପୁରିବାକୁ ବସିଲାଣି। କିନ୍ତୁ ପ୍ରଶାସନର ସ୍ଥାଣୁତା ପାଇଁ ବେଫିକର ମାଛ ମାଫିଆ । ଖାଲି ଏତିକି ନୁହେଁ ଅଲିଭ ରିଡଲେ କଇଁଛଙ୍କ ସୁରକ୍ଷା ପାଇଁ ସରକାର ଧାମରା ମୁହାଣଠାରୁ ଦେବୀ ମୁହାଣ ପର୍ଯ୍ୟନ୍ତ ସମୁଦ୍ର କୂଳ ଠାରୁ ୨୦ କିମି ପର୍ଯ୍ୟନ୍ତ ନିଷିଦ୍ଧାଞ୍ଚଳ ଭାବେ ଘୋଷଣା କରିଛନ୍ତି। ମାଛ ମାରିବା ଉପରେ କଟକଣା ଲଗାଯାଇଛି। ହେଲେ ଆଇନ କାନୁନକୁ ଫୁ କରି ନିଷିଦ୍ଧାଞ୍ଚଳରେ ମାଫିଆମାନେ ମାଛ ମାରୁଛନ୍ତି। ଏହା ଦ୍ଵାରା ବିରଳ ଅଲିଭ ରିଡଲେ କଇଁଛଙ୍କ ମୃତ୍ୟୁ ଘଟୁଛି । ଏଥିପ୍ରତି ବନବିଭାଗ କି ପୋଲିସ ପ୍ରଶାସନ ଦୃଷ୍ଟି ଦେଉ ନାହାନ୍ତି। ଗହୀରମଥାକୁ ସୁରକ୍ଷା ଦେବା ପାଇଁ ବନବିଭାଗ, କୋଷ୍ଟ ଗାର୍ଡ, ମେରାଇନ୍ ପୋଲିସ୍ ଓ ମତ୍ସ୍ଯ ବିଭାଗକୁ ଦାୟିତ୍ଵ ଦିଆଯାଇଛି। କିନ୍ତୁ ଏହି ସବୁ ବିଭାଗ ମଧ୍ୟରେ ସମନ୍ୱୟର ଅଭାବ ଯୋଗୁ ଉପକୂଳ ଅସୁରକ୍ଷିତ। ଟ୍ରଲର ମାଲିକଙ୍କ ଘରେ ଲାଗିଛି VHF (ଭେରି ହାଇ ଫିକ୍ଵେନ୍ସି) ଟାଓ୍ଵାର ବେତାର ଯନ୍ତ୍ର । ସମୁଦ୍ର ମଧ୍ୟରେ ଅନୁପ୍ରବେଶକାରୀ ଓ ଅପରାଧିକ କାର୍ଯ୍ୟକଳାପ ଉପରେ ନଜର ରଖିବା ପାଇଁ ସାମୁଦ୍ରିକ ପୋଲିସ୍, ତଟରକ୍ଷୀ ବାହିନୀ ଓ ବନବିଭାଗ ଏହି ଯନ୍ତ୍ରର ବ୍ୟବହାର କରିଥାନ୍ତି । ରାଜନଗର ଓ ମହାକାଳପଡା ଅଞ୍ଚଳର ବଙ୍ଗୀୟ ଭାଷାଭାଷୀ ଲୋକମାନେ ନିଜ ଘରେ VHF ଟାୱାର ଲଗାଇଛନ୍ତି ଯାହାକୁ ନେଇ ସଂଦେହ ବଢ଼ିବାରେ ଲାଗିଛି । ଏହି VHF ଟାୱାର ମାଧ୍ୟମରେ ଲୋକେ ଅନ୍ୟ ଦେଶ ସହ ଯୋଗାଯୋଗରେ ନାହାଁନ୍ତି ତ ? ଏହି ବେତାର ଯନ୍ତ୍ର ଦ୍ୱାରା ଭାରତର ଗୁପ୍ତ ତଥ୍ୟ ବିଦେଶକୁ ଚାଲି ଯାଉନି ତ, ଏମିତି ଅନେକ ପ୍ରଶ୍ନ ଉଙ୍କି ମାରୁଛି । ତା ସହିତ ଗଭୀର ସମୁଦ୍ରକୁ ପାଟ୍ରୋଲିଂ ପାଇଁ ସୁରକ୍ଷାକର୍ମୀ କେତେବେଳେ ଯାଉଛନ୍ତି, ତାହାର ସୂଚନା ସହଜରେ ମିଳୁନଥିବା କହିଛନ୍ତି, ବନଖଣ୍ଡ ଅଧିକାରୀ।
