ଏଲପିଜି ସିଲିଣ୍ଡର ଫାଟି ଗୋଟିଏ ପରିବାରର ୫ ଜଣଙ୍କ ମୃତ୍ଯୁ

ଜୟପୁର: ରାଜସ୍ଥାନ ଜୟପୁରରେ ଅଘଟଣ। ଏଲପିଜି ସିଲିଣ୍ଡର ଫାଟି ଗୋଟିଏ ପରିବାରର ୫ ଜଣଙ୍କ ମୃତ୍ଯୁ ହୋଇଛି। ମୃତକଙ୍କ ମଧ୍ୟରେ ୩ ନାବାଳକ ଶିଶୁ ରହିଛନ୍ତି। ଘରେ ରଖିଥିବା ଏଲପିଜି ସିଲିଣ୍ଡର ବ୍ଲାଷ୍ଟ ହୋଇଥିଲା। ସିଲିଣ୍ଡର ଫାଟି ଘରେ ନିଆଁ ଲାଗିଯାଇଥିଲା। ନିଆଁ ଲାଗିବା ପରେ ଘରେ ଥିବା ୩ ଶିଶୁଙ୍କ ସମେତ ୨ ଜଣ ଜୀଅନ୍ତା ଜଳି ଯାଇଥିଲେ।

ରାଜସ୍ଥାନ ଜୟପୁରର ବିଶ୍ଵକର୍ମା ଥାନା ଅନ୍ତର୍ଗତ ଜୈସଲ୍ୟା ଗାଁରେ ଘଟିଛି ଏ ଦୁର୍ଘଟଣା। ସମସ୍ତ ମୃତକ ବିହାର ରାଜ୍ୟର ବାସିନ୍ଦା ବୋଲି ଜଣାପଡିଛି। ଏଠାରେ ଘର ଭଡ଼ା ନେଇ ରହୁଥିଲେ। ଅଗ୍ନିକାଣ୍ଡର ଖବର ପାଇବା ମାତ୍ରେ ଘଟଣାସ୍ଥଳରେ ଅଗ୍ନିଶମବାହିନୀ ସହ ପୋଲିସ ଟିମ ପହଞ୍ଚିଥିଲେ। ତେବେ ନିଆଁର ତୀବ୍ରତା ଜୋର ଥିବାରୁ କାହାରକୁ ଜୀବନ୍ତ ଉଦ୍ଧାର କରିପାରିନଥିଲେ। ମୃତକଙ୍କ ଶବ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଯାଇଛି। ଘଟଣାର ତଦନ୍ତ କରୁଛି ସ୍ଥାନୀୟ ପୋଲିସ। ମୁଖ୍ୟମନ୍ତ୍ରୀ ଭଜନ ଲାଲ ଶର୍ମା ଘଟଣାକୁ ନେଇ ଶୋକପ୍ରକାଶ କରିଛନ୍ତି।