ରାଜସ୍ଥାନ ରାଜନୀତିରେ ଅଡ଼ିଓ ପରେ ଏବେ ଭିଡ଼ିଓ ରେକର୍ଡ଼ିଂକୁ ନେଇ ରାଜନୀତିରେ ଝଡ଼
ରାଜସ୍ଥାନ ରାଜନୀତିର ନାଟକ ଥମିବାର ନାଁ ନେଉ ନାହିଁ । ପ୍ରଥମେ ଅଡିଓ ଟେପକୁ ନେଇ ବିବାଦ ଦେଖାଦେବା ପରେ ଏବେ ଭିଡ଼ିଓ ରେକର୍ଡିଂକୁ ନେଇ ଉତ୍ତେଜନା ଲାଗି ରହିଛି । ବିଧାନସଭା ବାଚସ୍ପତି ସିପି ଯୋଶୀ ଏବଂ ମୁଖ୍ୟମନ୍ତ୍ରୀ ଅଶୋକ ଗେହଲୋତଙ୍କ ପୁଅ ବୈଭବ ଗେହଲୋତଙ୍କ ମଧ୍ୟରେ ହୋଇଥିବା ବାର୍ତ୍ତାଳାପର ଭିଡିଓ ଉପରେ ଭାରତୀୟ ଜନତା ପାର୍ଟି ଆକ୍ରମଣ କରିଛି । ବିଜେପି ରାଜ୍ୟ ସଭାପତି ସତୀଶ ପୁନିଆ କହିଛନ୍ତି ଯେ ବାଚସ୍ପତି ନୈତିକତା ଦୃଷ୍ଟିରୁ ଇସ୍ତଫା ଦେବା ଦରକାର ।
ବିଜେପି ନେତା ସତୀଶ ପୁନିଆ କହିଛନ୍ତି ଯେ, ଯେଉଁ ପ୍ରକାରର ଆମେ ବାର୍ତ୍ତାଳାପ ଭିଡିଓରେ ଶୁଣିଛୁ, ଏଥିରୁ ଜଣାପଡୁଛି ଯେ ବିଧାନସଭା ବାଚସ୍ପତି କଂଗ୍ରେସ ପାର୍ଟିରୁ ଆସିଛନ୍ତି ଏବଂ ଦଳ ପାଇଁ ପକ୍ଷପାତ ଦେଖାଉଛନ୍ତି ଯାହା ଜଣେ ବାଚସ୍ପତିଙ୍କ ପକ୍ଷରେ ଅନୁଚିତ । ସେ କହିଛନ୍ତି ଯେ ବଚସ୍ପତି ପଦବୀ ଏକ ଗୁରୁତ୍ୱପୂର୍ଣ୍ଣ ପଦ ଏବଂ ଯେତେବେଳେ ଏଭଳି ଜଣେ ବ୍ୟକ୍ତିଙ୍କୁ ନେଇ ପ୍ରଶ୍ନ ଉଠିଥାଏ, ସେତେବେଳେ ସେ ତାଙ୍କ ପଦରୁ ଇସ୍ତଫା ଦେବା ଉଚିତ୍ ।
ସେ ଏହା ମଧ୍ୟ କହିଛନ୍ତି ଯେ, ବାଚସ୍ପତ୍ତି କୌଣସି ସାଧାରଣ ବ୍ୟକ୍ତିଙ୍କ ସହ ନୁହେଁ ବରଂ ମୁଖ୍ୟମନ୍ତ୍ରୀ ଅଶୋକ ଗେହଲୋତଙ୍କ ପୁଅଙ୍କ ସହ କଥା ହେଉଛନ୍ତି । ଏଭଳି ପରିସ୍ଥିତିରେ ସେ କଂଗ୍ରେସକୁ ସମର୍ଥନ କରୁଥିବା ସ୍ପଷ୍ଟ ଜଣାପଡୁ ଥିବାବେଳେ ସମ୍ବିଧାନ ଅନୁଯାୟୀ ବିଧାନସଭା ବାଚସ୍ପତି ନିରପେକ୍ଷ ହେବା ଉଚିତ୍ । ସେ କହିଛନ୍ତି ଯେ, ଗୋଟିଏ ପଟେ ବିଧାନସଭା ବାଚସ୍ପତି ବିଧାୟକଙ୍କୁ ନୋଟିସ ଦେବା ପ୍ରସଙ୍ଗରେ ହାଇକୋର୍ଟ ଲକ୍ଷ୍ମଣରେଖ ଅତିକ୍ରମ କରୁଥିବା ଅଭିଯୋଗ ନେଇ ସୁପ୍ରିମକୋର୍ଟ ଯାଇଛନ୍ତି ଅନ୍ୟପକ୍ଷରେ ସେ ନିଜେ ହିଁ ସବୁ ମର୍ଯ୍ୟଦା ଉଲ୍ଲଂଘନ କରି କହୁଛନ୍ତି ଯେ, ଯଦି ୩୦ ଜଣ ବିଧାୟକ ସେପଟକୁ ଚାଲିଯିବେ ତେବେ ସରକାର ବଂଚିବ ନାହିଁ ।
ସୂଚନାଯୋଗ୍ୟ ଯେ, ବାଚସ୍ପତି ସିପି ଯୋଶୀଙ୍କ ସହ ବୈଭବ ଗେହଲୋତଙ୍କ ଭେଟିବାର ଭିଡିଓ ଆସିଛି ଏବେ ଭାଇରାଲ ହୋଇଛି । ଯେଉଁଥିରେ ବାଚସ୍ପତି କହୁଛନ୍ତି ଯେ ବର୍ତ୍ତମାନ ପରିସ୍ଥିତି କଷ୍ଟକର । ଯଦି ୩୦ଜଣ ବିଧାୟକ ଚାଲିଯିବେ ତେବେ ଆପଣ କିଛି କରିପାରିବେ ନାହିଁ, ସେମାନେ ସରକାର ଭାଙ୍ଗି ଦେବେ ।
