ରାଜସ୍ଥାନରେ ଖସିଲା ପାରଦ, ମରୁଭୂମିରେ ପଡ଼ିଲା ବରଫ

ଜୟପୁର: ଉତ୍ତର ଭାରତରେ ଜାରି ରହିଛି ହାଡ ଭଙ୍ଗା ଶୀତ । ହାଡ ଭଙ୍ଗା ଶୀତ ଫଳରେ ମରୁଭୂମିରେ ବରଫ ପଡ଼ିଛି । ରାଜସ୍ଥାନର ଅଧିକାଂଶ ଅଞ୍ଚଳରେ ଭୟଙ୍କର ଶୀତ ପ୍ରବାହ ଜାରି ରହିଛି । ରାଜସ୍ଥାନର କିଛି ଅଞ୍ଚଳରେ ତାପମାତ୍ରା ବିଯୁକ୍ତ ୩ ରେକର୍ଡ କରାଯାଇଛି । ଯାହା ଫଳରେ ରାଜସ୍ଥାନର ମରୁଭୂମିରେ ପଡ଼ିଛି ବରଫର ଚାଦର ।

ଭାରତୀୟ ପାଣିପାଗ ବିଭାଗ ଅନୁସାରେ ଆସନ୍ତା ଦୁଇ ଦିନ ପର୍ଯ୍ୟନ୍ତ ଶୀତର ପ୍ରକୋପ ବଢ଼ିବା ବୋଲି କହୁଯାଇଛି । ଉତ୍ତରାଖଣ୍ଡ, ଜାମ୍ମୁ କାଶ୍ମୀର ଓ ହିମାଚଳ ପ୍ରଦେଶର ବହୁ ଅଞ୍ଚଳରେ ତୁଷାରପାତ ହେଉଥିବାର ନଜର ଆସିଛି । କାଶ୍ମୀରରେ ଯେପରି ବରଫପାତ ହୁଏ ସେହିପରି ଭାବରେ ରାଜସ୍ଥାନର ଫତେହପୁର, ଶେଖାବଟୀରେ ବରଫ ପଡ଼ିଥିବାର ଦେଖିବାକୁ ମିଳିଛି । ରାଜସ୍ଥାନର ଚାଷଜମିଠାରୁ ଆରମ୍ଭ କରି ଗଛ ପର୍ଯ୍ୟନ୍ତ ସବୁଠାରେ ବରଫ ପଡ଼ିଥିବାର ଦେଖିବାକୁ ମିଳିଛି । ରାଜସ୍ଥାନର ଫତେହପୁରରେ ୧୦ ବର୍ଷରେ ପ୍ରଥମ ଥର ପାଇଁ ରାତିର ତାପମାତ୍ରା ବିଯୁକ୍ତ ୫.୨ ଡିଗ୍ରୀ ରେକର୍ଡ କରାଯାଇଛି ।

ପାଣିପାଗ ବିଶେଷଜ୍ଞଙ୍କ କହିବା ଅନୁସାରେ ରାଜସ୍ଥାନର ଶେଖାବଟୀରେ ଗରମ ଦିନରେ ଅଧିକ ଗରମ ଏବଂ ଶୀତ ଦିନରେ ଅଧିକ ଶୀତ ଅନୁଭବ ହୁଏ । ଅନ୍ୟପଟେ ଉତ୍ତର ଦିଗରୁ ଆସୁଥିବା କୋହଲା ପବନ ଯୋଗୁଁ ରାଜସ୍ଥାନର ଅନେକ ଅଞ୍ଚଳରେ ଶୀତ ବଢ଼ିଛି। ଡିସେମ୍ବର ୧୮ରେ ରାଜସ୍ଥାନର ଚୁରୁ, ପଶ୍ଚିମ ରାଜସ୍ଥାନରେ ସର୍ବନିମ୍ନ ତାପମାତ୍ରା -୧.୧ ରେକର୍ଡ କରାଯାଇଛି। ଯେଉଁଠି ଗ୍ରୀଷ୍ଣରେ ତାପମାତ୍ରା ୫୦ଡିଗ୍ରୀ ଟପିଯାଏ । ଚୁରୁ, ମାଉଣ୍ଟଆବୁ, ଜୈସଲମର୍ ଭଳି ରାଜସ୍ଥାନର ୧୨ ଜିଲ୍ଲାରେ ତାପମାତ୍ରା ମାଇନସ୍ ୧ ଡିଗ୍ରୀ ତଳକୁ ଖସି ଯାଇଛି। ପାଣିପାଗ ବିଭାଗ ଅନୁଯାୟୀ, ଏଠାରେ ରାତିର ତାପମାତ୍ରା ଆହୁରି ୧ ଡିଗ୍ରୀ ତଳକୁ ଖସି ଆସୁଛି।