ରାଜସ୍ଥାନରେ ତାଣ୍ଡବ ରଚୁଛି ବର୍ଷା; ବିଭିନ୍ନ ସ୍ଥାନରେ ଜଳବନ୍ଦୀ ପରିସ୍ଥିତି

ନନ୍ଦିଘୋଷ ବ୍ୟୁରୋ: ରାଜସ୍ଥାନର ଅଜମେରରେ ତାଣ୍ଡବ ରଚୁଛି ବର୍ଷା। ଗତ କିଛିଦିନ ଧରି ଲଗାଣ ବର୍ଷା ହେବା ଫଳରେ ସହରର ବିଭିନ୍ନ ସ୍ଥାନରେ ଜଳବନ୍ଦୀ ପରିସ୍ଥିତି ସୃଷ୍ଟି ହୋଇଛି। ରାଜରାସ୍ତା ସମେତ ଘର ମଧ୍ୟରେ ବି ଲହଡି ମାରୁଛି ବର୍ଷା ପାଣି। ଲୋକମାନେ ଉଚ୍ଚ ସ୍ଥାନରେ ଆଶ୍ରୟ ନେଉଥିବା ବେଳେ ଗୃହପାଳିତ ପଶୁ ପକ୍ଷୀ ପ୍ରଭାବିତ ହୋଇଛନ୍ତି।

ଅନ୍ୟପଟେ ପ୍ରବଳ ବର୍ଷା ଯୋଗୁଁ ଅଜମେରର ଫଇସାଗରର ହାତୀକେଡା ଡ୍ୟାମ ଫାଟ ସୃଷ୍ଟି ହୋଇଛି । ଗତକାଲି ରାତିରେ ଡ୍ୟାମରେ ଫାଟ ସୃଷ୍ଟି ହେବା ପରେ ଜଳାର୍ଣ୍ଣବ ପରିସ୍ଥିତି ଉପୁଜିଛି । ଘଟଣାସ୍ଥଳରେ ପ୍ରଶାସନିକ ଅଧିକାରୀ ପହଞ୍ଚି ସ୍ଥିତିର ଅନୁଧ୍ୟାନ କରିଛନ୍ତି । ଲୋକମାନଙ୍କୁ ଡ୍ୟାମକୁ ଯିବାକୁ ବାରଣ କରାଯାଉଥିବା ବେଳେ ଘଟଣାସ୍ଥଳରେ ସୁରକ୍ଷାକର୍ମୀ ନିୟୋଜିତ ହୋଇଛନ୍ତି ।

ରାଜସ୍ଥାନ ପରି ଦିଲ୍ଲୀରେ ମଧ୍ୟ ଜଳ ତାଣ୍ଡବ । ଲଗାଣ ବର୍ଷାରେ ବେହାଲ ଦିଲ୍ଲୀ । ଗତ କିଛିଦିନ ଧରି ଲଗାଣ ବର୍ଷା ହେବା ଫଳରେ ସହରରେ ଜଳବନ୍ଦୀ ପରିସ୍ଥିତି ଦେଖାଦେଇଛି। ରାଜରାସ୍ତାରେ ଆଣ୍ଠୁଏ ଉଚ୍ଚର ପାଣି ଚାଲୁଥିବାରୁ ଯାତାୟାତ ବାଧାପ୍ରାପ୍ତ ହୋଇଛି । ଜଳବନ୍ଦୀ ପରିସ୍ଥିତି ଯୋଗୁଁ ଦିଲ୍ଲୀରେ ଟ୍ରାଫିକ ସମସ୍ୟା ଦେଖାଦେଇଛି।