ଉତ୍ତରପ୍ରଦେଶ ହଥରସରେ ଗଣଦୁଷ୍କର୍ମ ପୀଡିତାଙ୍କ ପରିବାରକୁ ଭେଟିଲେ ରାହୁଲ

ନନ୍ଦିଘୋଷ ବ୍ୟୁରୋ: ଉତ୍ତରପ୍ରଦେଶ ହଥରସକୁ ବିରୋଧୀ ଦଳ ନେତା ରାହୁଲ ଗାନ୍ଧିଙ୍କ ଗସ୍ତ। ଗତ ନଭେମ୍ବର ୨୪ ସମ୍ଭଲ ହିଂସା ଘଟଣାରେ ପ୍ରାଣ ହରାଇଥିବା ୫ ଜଣ ବ୍ୟକ୍ତିଙ୍କ ପରିବାର ନିକଟକୁ ଯାଇ ସମବେଦନା ଜଣାଇବାର ଦିନକ ପରେ ହଥରସ ଗସ୍ତ କରିଛନ୍ତି ରାହୁଲ। ସେ ଦୁଷ୍କର୍ମ ପୀଡ଼ିତାଙ୍କ ପରିବାରକୁ ଭେଟିଛନ୍ତି। ରାହୁଲଙ୍କ ଗସ୍ତକୁ ନେଇ ସ୍ଥାନୀୟ ଅଞ୍ଚଳରେ ସୁରକ୍ଷା ବ୍ୟବସ୍ଥା କଡାକଡି କରାଯାଇଛି। ୨୦୨୦ର ବହୁଚର୍ଚ୍ଚିତ ହଥରସ ବୁଲଗଡି ଦୁଷ୍କର୍ମ ଓ ହତ୍ୟା ଘଟଣାର ପୀଡିତାଙ୍କ ପରିବାରକୁ ଭେଟିଛନ୍ତି ରାହୁଲ। ପୀଡିତାଙ୍କ କ୍ଷେତ୍ରରେ ଅନ୍ୟାୟ କରାଯାଇଥିଲା ବୋଲି ଅଭିଯୋଗ କରିଥିଲା କଂଗ୍ରେସ।

୨୦୨୦ ସେପ୍ଟେମ୍ବର ୧୪ରେ ଜଣେ ଦଳିତ ବାଳିକାଙ୍କୁ ୪ ଜଣ ବ୍ୟକ୍ତି ଗଣଦୁଷ୍କର୍ମ କରିଥିଲେ। ଘଟଣାର ୧୫ ଦିନ ପରେ ଅର୍ଥାତ ୨୯ ତାରିଖରେ ପୀଡିତା ଆଖିବୁଜିଥିଲେ। ଏହି ଘଟଣା ସାରା ଦେଶରେ ଚାଞ୍ଚଲ୍ୟ ସୃଷ୍ଟି କରିଥିଲା। ଏହି ମାମଲାର ସିବିଆଇ ତଦନ୍ତ ନିର୍ଦ୍ଦେଶ ଦିଆଯାଇଥିଲା। ଏହି ମାମଲାରେ ଗତ ୨୦୨୩ ମାର୍ଚ୍ଚ ୨ରେ ଏକ ସ୍ପେସାଲ କୋର୍ଟ ଅନ୍ୟତମ ଅଭିଯୁକ୍ତ ସନ୍ଦୀପକୁ ଆଜୀବନ କାରାଦଣ୍ଡାଦେଶ ଦେବା ସହ ୫୦ ହଜାର ଟଙ୍କାର ଜରିମାନା ଧାର୍ଯ୍ୟ କରିଥିଲେ। ବଡ଼କଥା ହେଉଛି ଏହି ଚାଞ୍ଚଲ୍ୟକର ଘଟଣାରେ କୋର୍ଟ ୩ ଜଣଙ୍କୁ ଦୋଷମୁକ୍ତ କରିଥିଲେ। କୋର୍ଟଙ୍କ ଏହି ରାୟ ନେଇ ଅସନ୍ତୁଷ୍ଟ ହୋଇଥିଲେ ପରିବାର। ପୀଡିତାଙ୍କ ପରିବାରକୁ ରାଜ୍ୟ ସରକାର ଦେଇଥିବା ବିଭିନ୍ନ ପ୍ରତିଶ୍ରୁତି ବି ବର୍ତ୍ତମାନ ସୁଦ୍ଧା ପାଳନ ହୋଇନାହିଁ।