ଆଜିଠାରୁ କଂଗ୍ରେସର ଭାରତ ଯୋଡୋ ନ୍ୟାୟ ଯାତ୍ରା, ମଣିପୁରରୁ ଯାତ୍ରା ଆରମ୍ଭ କରିବେ ରାହୁଲ ଗାନ୍ଧୀ

ନୂଆଦିଲ୍ଲୀ: ଭାରତ ଯୋଡ଼ୋ ଯାତ୍ରା ପରେ ଆଜିଠୁ କଂଗ୍ରେସ କରିବ ଭାରତ ଯୋଡୋ ନ୍ୟାୟ ଯାତ୍ରା । ରାହୁଲ ଗାନ୍ଧୀଙ୍କ ନେତୃତ୍ବରେ ଆରମ୍ଭ ହେବ ଭାରତ ଯୋଡୋ ନ୍ୟାୟ ଯାତ୍ରା । ମଣିପୁରରୁ ଆରମ୍ଭ ହେବାକୁ ଥିବା ଏହି ଯାତ୍ରା ମାର୍ଚ୍ଚ ୨୦ରେ ମୁମ୍ବାଇରେ ଶେଷ ହେବ । ଏହି ସମୟ ମଧ୍ୟରେ ୧୪ଟି ରାଜ୍ୟ ଏବଂ ୮୫ଟି ଜିଲ୍ଲାରେ ୬୨୦୦ କିଲୋମିଟରରୁ ଅଧିକ ଦୂରତା ଅତିକ୍ରମ କରିବ କଂଗ୍ରେସର ଏହି ଯାତ୍ରା ।

ରାହୁଲ ଗାନ୍ଧୀ କନ୍ୟାକୁମାରୀଠାରୁ କାଶ୍ମୀର ପର୍ଯ୍ୟନ୍ତ ୪୫୦୦ କିଲୋମିଟର ବ୍ୟାପୀ ‘ଭାରତ ଯୋଡ଼ୋ ଯାତ୍ରା’ କରିଥିଲେ । ଭାରତୀୟ ରାଜନୀତି ଇତିହାସରେ ଏହା ଏକ ଐତିହାସିକ ଯାତ୍ରା ଥିଲା ବୋଲି କଂଗ୍ରେସ କହିଛି । ସେ ଭାରତ ଯୋଡ଼ୋ ଯାତ୍ରାର ଅନୁଭୂତି ସହ ଏହି ଯାତ୍ରା ଆରମ୍ଭ କରିବେ । ଏହି ଯାତ୍ରା ସମୟରେ ଦେଶର ମହିଳା, ଯୁବକ ଏବଂ ଦେଶର ବଞ୍ଚିତ ବର୍ଗର ଲୋକଙ୍କ ସହ ଆଲୋଚନା କରାଯିବ । ଏହି ଯାତ୍ରା ୬ ହଜାର ୨୦୦ କିଲୋମିଟର ଦୂରତା ଅତିକ୍ରମ କରି ମଣିପୁର, ନାଗାଲାଣ୍ଡ, ଆସାମ, ମେଘାଳୟ, ପଶ୍ଚିମବଙ୍ଗ, ବିହାର, ଝାଡ଼ଖଣ୍ଡ, ଓଡ଼ିଶା, ଛତିଶଗଡ଼, ଉତ୍ତରପ୍ରଦେଶ, ମଧ୍ୟପ୍ରଦେଶ, ରାଜସ୍ଥାନ ଏବଂ ଗୁଜରାଟ ଦେଇ ମହାରାଷ୍ଟ୍ରରେ ପହଞ୍ଚିବ।  ଏହି ଯାତ୍ରା ୧୪ଟି ରାଜ୍ୟର ୮୫ଟି ଜିଲ୍ଲା ଦେଇ ଯିବ । ଭରତ ଯୋଡୋ ନ୍ୟାୟ ଯାତ୍ରା ପ୍ରାୟତଃ ବସ୍ ଯୋଗେ ହେବ । କିଛି ସ୍ଥାନରେ ପଦଯାତ୍ରା ବି ହେବ । ଇଣ୍ଡିଆ ମେଣ୍ଟ ନେତାଙ୍କୁ ଏହି ଯାତ୍ରାରେ ସାମିଲ ହେବାକୁ ରାହୁଲ ଗାନ୍ଧୀ ନିମନ୍ତ୍ରଣ କରିଛନ୍ତି ।