ଭାରତ ବିଶ୍ୱକପ୍ କାହା ପାଇଁ ହାରିଲା? ବିସିସିଆଇକୁ ନାମ କହିଲେ ଦ୍ରାଭିଡ୍…

ନୂଆଦିଲ୍ଲୀ: ଦିନିକିଆ ବିଶ୍ୱକପ ୨୦୨୩ରେ ଭାରତର ପରାଜୟକୁ ଆଜିଯାଏଁ ଭୁଲି ପାରିନାହାଁନ୍ତି କ୍ରିକେଟ୍ ପ୍ରେମୀ। ପୂରା ଟୁର୍ଣ୍ଣାମେଣ୍ଟରେ ଭାରତ ପ୍ରଦର୍ଶନ ଖୁବ୍ ଭଲ ରହିଥିବା ବେଳେ ଠିକ୍ ସମୟରେ ହାର ମାନିଯାଇଥିଲା ଟିମ୍ ଇଣ୍ଡିଆ । ନିକଟ ଅତୀତରେ କ୍ୟାପଟେନ୍ ରୋହିତ ଶର୍ମାଙ୍କ ସହ ଟିମ୍ ଇଣ୍ଡିଆ ମ୍ୟାନେଜମେଣ୍ଟ ବିଶ୍ୱକପର ରିଭ୍ୟୁ ମିଟିଂ କରିଥିଲା । ଯେଉଁଥିରେ ଫାଇନାଲରେ ପରାଜୟର କାରଣ ଖୋଜା ଯାଇଥିଲା ।

ରିପୋର୍ଟ ଅନୁଯାୟୀ, ଫାଇନାଲରେ ପରାଜୟ ପାଇଁ ପିଚ୍କୁ ଦାୟୀ କରିଛନ୍ତି କୋଚ୍ ରାହୁଲ ଦ୍ରାଭିଡ। ରାହୁଲ ଦ୍ରାବିଡ କହିଛନ୍ତି ଯେ ଫାଇନାଲରେ ସେ ଯେତିକି ଆଶା କରିଥିଲେ ସେ ଅନୁସାରେ ପିଚ୍ ତାଙ୍କୁ ସପୋର୍ଟ କରିନଥିଲା।  ପିଚ୍ ସ୍ପିନରଙ୍କୁ ସୁହାଇ ଥିଲେ ଆଜି ପରିଣତି କିଛି ଅଲଗା ହୋଇଥାନ୍ତା ।

ସୂଚନାଯୋଗ୍ୟ, ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଫାଇନାଲ୍ ମ୍ୟାଚ୍ ଅହମ୍ମଦାବାଦରେ ଅନୁଷ୍ଠିତ ହୋଇଥିଲା। ତେବେ ଏହି ସମାନ ପିଚରେ ଭାରତ ଓ ପାକିସ୍ତାନ ମୁକାବିଲା ମଧ୍ୟ ହୋଇଥିଲା। ଯଦିଓ ଫାଇନାଲ୍ ପରି ବଡ ଇଭେଣ୍ଟ ପାଇଁ ନୂଆ ପିଚର ବ୍ୟବହାର ହୋଇଥାଏ, କିନ୍ତୁ ଏଠାରେ ପୁରୁଣା ପିଚ୍ର ବ୍ୟବହାର କରାଯାଇଥିଲା। ବୋଧହୁଏ ଏଥିପାଇଁ ଟିମ୍ ଇଣ୍ଡିଆ ଭଲ ପ୍ରଦର୍ଶନ କରିପାରିନଥିଲା।

ତେବେ ଏହି ବୈଠକରେ ବିସିସିଆଇ ସଚିବ ଜୟ ଶାହା, ଉପାଧ୍ୟକ୍ଷ ରାଜୀବ ଶୁକ୍ଲାଙ୍କ ସମେତ ଅନ୍ୟ ଅଧିକାରୀ ଉପସ୍ଥିତ ଥିଲେ। ଏହି ବୈଠକରେ ଜୁନରେ ଅନୁଷ୍ଠିତ ହେବାକୁ ଥିବା T20 ବିଶ୍ୱକପ ପର୍ଯ୍ୟନ୍ତ ରାହୁଲ ଦ୍ରାଭିଡ କୋଚ୍ ରହିବେ ବୋଲି ସୂଚନା ଦିଆଯାଇଛି। ଏଥିସହିତ ରୋହିତ ଶର୍ମା T20 ବିଶ୍ୱକପରେ ଅଧିନାୟକ ଭାବେ ରହିବେ।