ହିଂସ୍ର ହାତୀଙ୍କୁ ରେଡିଓ କଲାରିଂ ପାଇଁ ବେଙ୍ଗଳୁରୁରୁ ଆସିଲେ ୬ ଜଣିଆ ଟିମ୍

ମେଣ୍ଢାଶାଳ: ହିଂସ୍ର ହାତୀ ରାମୁ ଓ ମାଖେନାକୁ କରାଯିବ ରେଡିଓ କଲାରିଂ । ଚନ୍ଦକା ଜଙ୍ଗଲ ଅଞ୍ଚଳ ସହ ଭୁବନେଶ୍ୱର ଉପକଣ୍ଠ ପାଖାପାଖି ୫୦ ଖଣ୍ଡ ମଉଜା ଅଞ୍ଚଳରେ ଆତଙ୍କ ରଚିଥିଲେ ରାମୁ ଓ ମାଖେନା । ୨ ହାତୀଙ୍କୁ ରେଡିଓ କଲାରିଂ ପାଇଁ ବେଙ୍ଗଳୁରୁରୁ ୬ ଜଣିଆ ଟିମ୍ ଆସି ଚନ୍ଦକା ଡମପଡ଼ା ଅଭୟାରଣ୍ୟରେ ପହଞ୍ଚିଛନ୍ତି ।

ଚନ୍ଦକା ଗୋଡ଼ିବାରୀ ଜଙ୍ଗଲରେ ପ୍ରଥମେ ୨ ହିଂସ୍ର ହାତୀଙ୍କୁ ନିରୀକ୍ଷଣ କରାଯାଇ ଟ୍ରାଙ୍କୁଲାଇଜ କରିବାକୁ ଯୋଜନା ରହିଛି । ପରେ ରେଡିଓ କଲାରିଂ କରି ହାତୀଙ୍କ ଚଲାପଥକୁ ନିରୀକ୍ଷଣ କରାଯାଇ ଜନବସତି ମୁହାଁ ହେବାରୁ ରୋକିବାରେ ବନ ବିଭାଗ ସଫଳ ହୋଇପାରିବ । ଏହାଦ୍ୱାରା ଉଭୟ ଧନ ଜୀବନ କ୍ଷତିକୁ ରୋକାଯାଇ ପାରିବ ବୋଲି ସୂଚନା ଦେଇଛନ୍ତି ଚନ୍ଦକା ଡମପଡ଼ା ଅଭୟାରଣ୍ୟ କର୍ତ୍ତୃପକ୍ଷ ।