ବିଶ୍ବକପ ଦଳରେ ସାମିଲ ହେବେ କି ଅଶ୍ବିନୀ?

ନନ୍ଦିଘୋଷ ବ୍ୟୁରୋ: ବୁଧବାର ଖେଳାଯିବାକୁ ଥିବା ତୃତୀୟ ଦିନିକିଆରୁ ଆହତ ଅକ୍ଷର ବିଦା । ଏସିଆ କପରେ ଖେଳିଲା ବେଳେ ସେ ଆହତ ହୋଇଥିଲେ । ଏଥିଲାଗି ସେ ନ୍ୟାସନାଲ୍ କ୍ରିକେଟ ଏକାଡେମୀରେ ଚିକିତ୍ସିତ ହେଉଛନ୍ତି ସୁସ୍ଥ ହୋଇନଥିବାରୁ ଅକ୍ଷର ଆଉ ଦଳକୁ ଫେରିନପାରନ୍ତି । ସେ ଅସୁସ୍ଥ ଥିବାରୁ ଅଫ୍ ସ୍ପିନର ରବିଚନ୍ଦ୍ରନ ଅଶ୍ବିନ ସ୍ଥାନ ପାଇପାରନ୍ତି । ଅକ୍ଷରଙ୍କ ସ୍ଥାନରେ ସାମିଲ ହୋଇ ଅଶ୍ବିନ୍  ପ୍ରଥମ ଦୁଇଟି ଦିନିକିଆ ମ୍ୟାଚରେ ଚମତ୍କାର ବୋଲିଂ କରିଛନ୍ତି । ଭାରତର ବିଜୟରେ ଗୁରୁତ୍ବପୂର୍ଣ୍ଣ ଭୂମିକା ନିର୍ବାହ କରିଛନ୍ତି

ଏହି ୨ଟି ମ୍ୟାଚରେ ତାଙ୍କୁ ୪ଟି ଓ୍ବିକେଟ୍ ମିଳିଛି । ଏଥିପାଇଁ ତାଙ୍କୁ ବିଶ୍ବକପ୍ ଦଳରେ ସାମିଲ୍ ନେଇ ଚର୍ଚ୍ଚା ହେଉଛି । ଖେଳାଳି ବଦଳର ଶେଷ ତାରିଖ ହେଉଛି ସେପ୍ଟେମ୍ବର ୨୮ ତାରିଖ । ଏହାର ଗୋଟିଏ ଦିନ ପୂର୍ବରୁ ଚଳିତ ସିରିଜର ତୃତୀୟ ଶେଷ ଦିନିକିଆ ଖେଳାଯିବ । ଭାରତ ଓ ଅଷ୍ଟ୍ରେଲିଆ ମଧ୍ୟରେ ୩ ମ୍ୟାଚ୍ ବିଶିଷ୍ଟ ଦିନିକିଆ ଶୃଙ୍ଖଳାର ଶେଷ ମ୍ୟାଚ୍ ବୁଧବାର ରାଜକୋଟରେ ଖେଳାଯିବ । ଏହି ମ୍ୟାଚ୍ ଭାରତୀୟ ସମୟ ଅପରାହ୍ନ ୧ଟା ୩୦ରେ ଆରମ୍ଭ ହେବ ।

ଏହି ମ୍ୟାଚ ପାଇଁ ଭାରତୀୟ ଦଳରେ ବ୍ୟାପକ ପରିବର୍ତ୍ତନ ହେବାର ସୂଚନା ମିଳିଛି । ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟାଙ୍କ ବ୍ୟତୀତ ଓପନର ଶୁଭମନ ଗିଲ, ଦ୍ରୁତ ବୋଲର ମହମ୍ମଦ ସାମି, ଶାର୍ଦ୍ଦୁଲ ଠାକୁର ଏବଂ ଅକ୍ଷର ପଟେଲ ଚୂଡ଼ାନ୍ତ ଏକାଦଶରେ ସ୍ଥାନ ପାଇବେ ନାହିଁ । ଆଗକୁ ବିଶ୍ବକପ ଥିବାରୁ ଏସବୁ ଖେଳାଳିମାନଙ୍କୁ ବିଶ୍ରାମ ଦିଆଯାଇଛି । ଅନ୍ୟପକ୍ଷରେ ପ୍ରଥମ ଦୁଇଟି ମ୍ୟାଚରେ ବିଶ୍ରାମ ନେଇଥିବା ଅଧିନାୟକ ରୋହିତ ଶର୍ମା ଓ ବିରାଟ କୋହଲି ଟିମକୁ ଫେରିବେ । ଏହି ସିରିଜରେ ଭାରତ ୨-୦ରେ ଆଗୁଆ ରହିଛି । ହାଲି ଦିନିକିଆରେ ଭାରତ ୫ ଓ୍ବିକେଟରେ ବିଜୟୀ ହୋଇଥିଲା । ସେହିପରି ଇନ୍ଦୋର ଦିନିକିଆରେ ଭାରତ ୯୯ ରନରେ ବିଜୟ ହାସଲ କରିଥିଲା ।