ପୁରୀ ଆକାଶରେ ଘୂରି ବୁଲୁଛି ବିକାଶର ପକ୍ଷୀ; ଭାଇରାଲ ହେଲା ନବୀନଙ୍କ ଭିଡିଓ
ସେଠି ଶ୍ରୀମନ୍ଦିର ଅଛି। ସେଠି ସଂସ୍କୃତି ଅଛି। ସେଠି ସମୃଦ୍ଧି ବି ଅଛି। ହେଲେ ଶ୍ରୀକ୍ଷେତ୍ର ଦିନେ ତାଳପତ୍ର ପୋଥିରେ ସ୍ମୃତି ହୋଇ ରହିଯିବନି ତ ? ଆଜି ଯାହା ସମୃଦ୍ଧି କାଲି ତାହା ସଂସ୍କୃତି । ବିଶ୍ୱର ଅନେକ ପୁରାତନ ସମୃଦ୍ଧି ଓ ସଂସ୍କୃତି ଆଜି କେବଳ ବଞ୍ଚି ରହିଛନ୍ତି ଇତିହାସ ପୃଷ୍ଠାରେ । ସମୟ ସହ ସଂସ୍କୃତି କଣଠେସା ହୋଇଯାଏ, ପୋଥିବିଡ଼ା, ସ୍ମୃତି ଓ ବିଶ୍ୱାସ ଭିତରେ ।
ସମୟ ଗତିଶୀଳ । ସମୃଦ୍ଧି ଓ ବିକାଶ ଏହା ସହ ତାଳ ଦେଇ ଆଗକୁ ପାଦ ନଥାପିଲେ ସଂସ୍କୃତି ବଞ୍ଚି ରହି ପାରିବନି । ଏଭଳି ଏକ ଘଡିସନ୍ଧି ମୁହୂର୍ତ୍ତରେ ଭବିଷ୍ୟତ ପିଢ଼ି ପାଇଁ ଆମ ଜଗନ୍ନାଥ ସଂସ୍କୃତିକୁ ବଞ୍ଚାଇ ରଖିବାକୁ ଏକମାତ୍ର ଉପାୟ ହେଉଛି ଶ୍ରୀକ୍ଷେତ୍ରର ବିକାଶ ଓ ସମୃଦ୍ଧି । ହୁଏତ ଏ ବାସ୍ତବତାକୁ ଅନୁଭବ କରି ପାରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ବିଗତ ଦିନର ଉତ୍କର୍ଷକୁ ମନେ ପକାଇ ପୁରୀକୁ ଆଗାମୀ ଶହ ଶହ ବର୍ଷ ପାଇଁ ଓଡ଼ିଆ ସମୃଦ୍ଧିର ପରିଚୟ ଭାବେ ନବ ନିର୍ମାଣ କରିବାକୁ ଆଗେଇ ଆସିଛନ୍ତି ସେ ।
ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଟ୍ୱିଟର ପେଜ୍ରେ ପୋଷ୍ଟ ହୋଇଥିବା ଏକ ସନ୍ଦେଶଭରା ଭିଡିଓ ସୋସିଆଲ୍ ମିଡିଆରେ ଭିନ୍ନ ଏକ ଆବେଗ ସୃଷ୍ଟି କରିଛି ।
ଭାବାବେଗ ଓ ଭାବପ୍ରବଣତାର ଏକ ଫେଣ୍ଟାଫେଣ୍ଟି ଅନୁଭୂତି ଭିତରେ ଶ୍ରୀମନ୍ଦିର ଓ ଶ୍ରୀକ୍ଷେତ୍ରର ବିକାଶ ପାଇଁ ରାଜ୍ୟ ସରକାର ଆଙ୍କିଥିବା ନକ୍ସାକୁ ଅତି ସୁନ୍ଦର ଭାବେ ଉପସ୍ଥାପନ କରାଯାଇଛି ଏହି କ୍ଷୁଦ୍ର ସିନେମାରେ । ସୁକ୍ଷ୍ମ କାରୁକାର୍ଯ୍ୟଭରା ତାଳପତ୍ର ପୋଥିରୁ ଜୀବନ୍ୟାସ ପାଉଛି ବିକାଶର ବିହଙ୍ଗ । ସୌନ୍ଦର୍ଯ୍ୟର ଡେଣା ଝାଡ଼ି, ବିକାଶର ବାର୍ତ୍ତା ବୁଣି ସେ ଉଡ଼ି ଚାଲୁଛି ନିବିଡ଼ ସଂସ୍କୃତିରୁ ଅସୀମ ସମୁଦ୍ର ଆକାଶକୁ । କେତେ କଥା, କେତେ କାହାଣୀ, କେତେ କିମ୍ବଦନ୍ତୀ । ପୁଣି କେତେ ବିଶ୍ୱାସ । ….ଏ ସବୁକୁ ଜାବୁଡ଼ି ଧରି କାଳିଆ ସାଆନ୍ତଙ୍କ ଶ୍ରୀକ୍ଷେତ୍ରର ସମୃଦ୍ଧ ସଂସ୍କୃତି କେମିତି ସବୁ ସମୟରେ ସତେଜ ରହିବ ସେ ନେଇ ବାର୍ତ୍ତା ଦେଉଛି ଏ ପକ୍ଷୀ ।
ପାଞ୍ଚ ପାଞ୍ଚଥରର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓଡ଼ିଆଙ୍କ ଆବେଗକୁ ବୁଝନ୍ତି । ସେ ଅନୁଭବ କରିଛନ୍ତି ପୁରୀ ସହ ଏ ଜାତିର ଆବେଗ ଜଡ଼ିତ । ପୁରୀର ଦାଣ୍ଡ ହେଉଛି ବଡ଼ଦାଣ୍ଡ, ଶ୍ରୀଜଗନ୍ନାଥ ହେଉଛନ୍ତି ବଡ଼ ଠାକୁର, ପୁରୀ ମନ୍ଦିର ହେଉଛି ବଡ଼ ଦେଉଳ । ଆଉ ପୁରୀ ସମୁଦ୍ରର ଦୃଶ୍ୟ ଅତୁଳନୀୟ । ଏଠି ସବୁ ବଡ଼, ସବୁ ଅଦ୍ୱିତୀୟ, ସବୁ ସ୍ୱତନ୍ତ୍ର । ଏହାର ବିକଳ୍ପ ନା କେଉଁଠି ଅଛି, ନାଁ କେଉଁଠି ହୋଇପାରିବ ।
ହେଲେ ବାସ୍ତବରେ କିନ୍ତୁ ବଡ଼ଦାଣ୍ଡ ଦିନକୁ ଦିନ ସଂକୁଚିତ ହୋଇଯାଉଥିଲା । ବଡ଼ ଦେଉଳର ଚାରିପାଖ ଜବରଦଖଲ ଯୋଗୁଁ ଶ୍ରୀମନ୍ଦିରର ସୌନ୍ଦର୍ଯ୍ୟ ହାନି ହେଉଥିଲା । ସବୁ କିଛି ଶୃଙ୍ଖଳିତ କରିବାକୁ ମୁଖ୍ୟମନ୍ତ୍ରୀ ଏକ ବଡ଼ ପଦକ୍ଷେପ ନେଇଛନ୍ତି । ପୁରୀ ସହରର ନବକଳେବର ପାଇଁ ମୁଖ୍ୟମନ୍ତ୍ରୀ ଏକ ଐତିହାସିକ ନିଷ୍ପତ୍ତି ନେଇଛନ୍ତି । ଶ୍ରୀମନ୍ଦିର ଚତୁଃପାର୍ଶ୍ୱରୁ ୭୫ ମିଟର ପରିଧି ପର୍ଯ୍ୟନ୍ତ ଜବରଦଖଲ ଉଚ୍ଛେଦ ପରେ ଥଇଥାନ ଓ ବିକାଶମୂଳକ କାର୍ଯ୍ୟ ପାଇଁ ତୁରନ୍ତ ୫ଶହ କୋଟି ଟଙ୍କାର ପ୍ୟାକେଜ୍ ଘୋଷଣା କରିଛନ୍ତି । ବଡ଼ଠାକୁରଙ୍କ ନବକଳେବର ପାରମ୍ପରିକ ରୀତିନୀତି ଅନୁଯାୟୀ ହେଉଥିବା ବେଳେ ନବୀନ ପଟ୍ଟନାୟକ ହେଉଛନ୍ତି ପ୍ରଥମ ମୁଖ୍ୟମନ୍ତ୍ରୀ ଯିଏ ପୁରୀ ସହରର ନବକଳେବର ପାଇଁ ଏକ ମନେ ରଖିବା ଭଳି ନିଷ୍ପତ୍ତି ନେଇଛନ୍ତି ।
