ପୁରୀ: ଡାକ୍ତରଙ୍କୁ ମାଡ଼ ମାରିଛନ୍ତି ପୋଲିସ କର୍ମଚାରୀ । ହସ୍ପିଟାଲ ପରିସରରେ କାର୍ଯ୍ୟରତ ଡାକ୍ତରଙ୍କୁ ପୋଲିସ  କର୍ମଚାରୀ ମାଡ଼ ମାରିଛନ୍ତି । ଏଭଳି ଏକ ଅଭିଯୋଗ ଆସିଛି ପୁରୀରୁ । ଆହତ ଡାକ୍ତର ଜଣଙ୍କ ରବୀନ୍ଦ୍ର ଘଡ଼େଇ । ମହାପ୍ରଭୁ ଶ୍ରୀ ଜଗନ୍ନାଥଙ୍କ ରଥ ମେଡିକାଲ ଛକ ଦେଇ ଯାଉଥିବା ସମୟରେ ହଠାତ୍‌ ପୋଲିସ ଡାକ୍ତରଖାନା ପରିସର ମଧ୍ୟକୁ ଧସେଇ ପଶି ଆସିଥିଲେ | ଆସିବା ସହ ଡାକ୍ତର ଘଡେ଼ଇଙ୍କ ଉପରକୁ ଆକ୍ରମଣ କରିଥିଲେ । ଡାକ୍ତର ଘଡେ଼ଇଙ୍କ  ଉପରକୁ ହାତ ଉଠାଇବା ସହ ମୋବାଇଲକୁ ଗୋଡ଼ରେ ଦଳି ଦେଉଥିବାର ଭିଡିଓ ଦେଖିବାକୁ ମିଳିଛି । ତେବେ ପରବର୍ତ୍ତୀ ସମୟରେ ସମ୍ପୃକ୍ତ ଡାକ୍ତରଙ୍କ ସହ ପୋଲିସ ପ୍ରଶାସନର ବରିଷ୍ଠ ଅଧିକାରୀମାନେ ଆଲୋଚନା କରି ଆପୋଷ ବୁଝାମଣା କରିଥିବା ଜଣାପଡ଼ିଛି ।