ନନ୍ଦିଘୋଷ ବ୍ୟୁରୋ ; ପିୟୁସିସି ପାଇଁ ପୁରୁଣା ଫାଇନ୍ ପଇଠ କରିବାକୁ ପଡ଼ିବ । ହାଇକୋର୍ଟ ଶୁଣାଇଛନ୍ତି ଚରମ ନିଷ୍ପତ୍ତି । ଏହା ପରେ ଏବେ ଲୋକଙ୍କ ଭିତରେ ଟାଣ ଖରାରେ ଲାଇନ ଲଗାଇବାର ଭୟ ପୁଣି ଥରେ ଦେଖା ଦେଲାଣି । ଗତ ଦେଢ ମାସ ଧରି ଏହାକୁ ନେଇ ଛକାପଞ୍ଜା ଚାଲିଥିଲା । ରାଜ୍ୟ ସରକାର କେବଳ ଡେଡଲାଇନ ଗଡ଼ାଇ ଚାଲିଥିଲେ । ସେ ସମୟରେ ବିନା ଫାଇନ ପଇଠରେ ପିୟୁସିସି ମିଳିବା ନେଇ ବି ସରକାର କହିଥିଲେ । ହେଲେ ହାଇକୋର୍ଟରେ ଏପରି କଣ ହେଲା ଯେ ପୁରୁଣା ନିୟମ ଉପରେ ମୋହର ମାରିଲେ ବିଚାରପତି ? ଏ ପରି ପ୍ରଶ୍ନ କରିଛନ୍ତି ବିରୋଧୀ ଦଳ । ଏହି ସମ୍ବେଦନଶୀଳ ପ୍ରସଙ୍ଗରେ ଏଜିଙ୍କ ପାରିବାପଣିଆ କାଠଗଡ଼ା ଚାଲି ଆସିଛି । ଲୋକ କିପରି ମିଛ ଚାଲାଣ ଯୋଗୁଁ ଶୋଷଣ ହେଉଛନ୍ତି, ଏ କଥା କୋର୍ଟରେ ଏଜି ଉପସ୍ଥାପନ କରିଥିଲେ କି ବୋଲି ବିଜେଡି ପ୍ରଶ୍ନ କରିଛି । ମହାନଦୀ ଶୁଣାଣିରେ ଏଜି ଉପସ୍ଥିତ ରହୁ ନାହାନ୍ତି । ହେଲେ ପିୟୁସିସି ନାଁରେ ୧୩୦୦ କୋଟି ଆଦାୟ କରିବାକୁ ସେ ଓକିଲାତି କରୁଥିବା ନେଇ ବିଜେଡି ଅଭିଯୋଗ ଉଠାଇଛି । ଆଉ ପ୍ରଶ୍ନ କରିଛି ଯେ ଫାଇନ ଭରି ଦେଲେ କଣ ଗାଡ଼ି ପ୍ରଦୂଷଣମୁକ୍ତ ହୋଇଯିବ ? ଲୋକେ ପୁଣି ଫାଇନ ଗଣି ଗଣି ହସ୍ତସନ୍ତ ହେବେ । ଏହା ବିରୋଧରେ ପୁଣି ଥରେ ଆନ୍ଦୋଳନ କରିବ କଂଗ୍ରେସ ।
ପିୟୁସିସିରୁ ଫାଇନ ଅଲଗା କରିବା ନେଇ ପରିବହନ ମନ୍ତ୍ରୀଙ୍କ ପାଖରେ ସନ୍ତୋଷଜନକ ଉତ୍ତର ନାହିଁ । ହେଲେ ପିୟୁସିସି ଜନିତ ଜରିମାନା କମାଇବାକୁ ତର୍ଜମା ଚାଲିଥିବା ନେଇ ସେ ସଫେଇ ଦେଇଛନ୍ତି । ଏ ନେଇ ଖୁବ୍ ଶୀଘ୍ର ସରକାର ବଡ଼ ନିଷ୍ପତ୍ତି ନେଇ ପାରନ୍ତି । ଶୀତୁଆ ସକାଳୁ ରାତିର ଜାଡ଼ ଯାଏ ଲମ୍ବା ଲାଇନ ଲଗାଇ ପିୟୁସିସି ପାଇବାକୁ ଠିଆ ହେଉଥିଲେ ଲୋକ । ସେପଟେ ଫାଇନ୍ ଭରିବାକୁ ବି ଲମ୍ବା ଲାଇନ । କାହା କାହାର ଓଟିପି ନ ଆସିବାରୁ, ଆଜି ଯାଏଁ ଫାଇନ ପଇଠ ହୋଇ ପାରୁନି । ଏବେ ଟାଣ ଖରାରେ ପୁଣି ଝାଳନାଳ ହୋଇ ଧାଡ଼ିରେ ଠିଆ ହେବେ ଲୋକ । ସାଧାରଣ ଲୋକଙ୍କ ଏହି ସମସ୍ୟାକୁ ଦୃଷ୍ଟିରେ ରଖି ହାଇକୋର୍ଟରେ ଯୁକ୍ତି ଉପସ୍ଥାପନ କରାଯାଇଥିଲେ ହୁଏତ ନିଷ୍ପତ୍ତି ଭିନ୍ନ ହୋଇଥାନ୍ତା ବୋଲି ଚର୍ଚ୍ଚା ଚାଲିଛି ।
ଫାଇନ ନ ଦେଲେ ମିଳିବନି ପିୟୁସିସି, ହାଇକୋର୍ଟଙ୍କ ନିଷ୍ପତ୍ତି ପରେ ସରକାରଙ୍କୁ ଘେରିଲେ ବିରୋଧୀ…
