ଭୁବନେଶ୍ବର : ପଲ୍ୟୁସନ ସେଣ୍ଟର ପାଲିଟିଛି ଟୁରିଷ୍ଟ ସ୍ପଟ । ନୂଆ ବର୍ଷରେ ଲୋକେ ହନ୍ତସନ୍ତ । କେନ୍ଦ୍ର ଓ ରାଜ୍ୟ ମଧ୍ୟରେ ରହୁନାହିଁ ତାଳମେଳ । ପ୍ରତିବାଦରେ ଯୁବ କଂଗ୍ରେସର ଅଭିନବ ପ୍ରତିବାଦ । ନୂଆ ବର୍ଷରେ ପିକନିକ କରିପାରିଲେନି ଲୋକେ । ପର୍ଯ୍ୟଟନ ସ୍ଥଳୀରେ ଭିଡ଼ ଲଗାଇବା ବଦଳରେ ପଲ୍ଯୁସନ ଟେଷ୍ଟି ସେଣ୍ଟରରେ ଲଗାଇଛନ୍ତି ଭିଡ଼ । ସରକାରଙ୍କ ଆଡବାୟା ନିଷ୍ପତ୍ତି ଯୋଗୁଁ ପଲ୍ୟୁସନ ସେଣ୍ଟର ପାଲିଟିଛି ଟୁରିଷ୍ଟ ସ୍ପଟ । ଯାହାକୁ ନେଇ ସାଧାରଣରେ ଅସନ୍ତୋଷ ଦେଖାଦେଇଛି । ପଲ୍ୟୁସନ ସାର୍ଟିଫିକେଟ ଓ ଜରିମାନା ନେଇ ବିଜେପି ସରକାର ବିରୋଧରେ ଜନ ଅସନ୍ତୋଷ ଏପରି ହେଲାଣି ଯେ ଆଗକୁ ଏହା ଭୟଙ୍କର ରୂପ ନେଇପାରେ । ଏମିତି ଢଙ୍ଗରେ କହି PUCC ପ୍ରସଙ୍ଗରେ ରାଜ୍ୟ ସରକାରଙ୍କୁ ଟାର୍ଗେଟ କରିଛନ୍ତି ବରିଷ୍ଠ ବିଜେଡି ବିଧାୟକ ଅରୁଣ ସାହୁ । ପରିବହନ ମନ୍ତ୍ରୀ କେତେବେଳେ କଣ ଘୋଷଣା କରୁଛନ୍ତି ତାହା ତାଙ୍କୁ ଜଣାନାହିଁ ବୋଲି ସେ କହିଛନ୍ତି । ଅନ୍ୟପଟେ ସାଇକେଲ ଶୋଭାଯାତ୍ରାରେ ଆସି ଅଭିନବ ଉପାୟରେ ରାଜ୍ୟ ସରକାରଙ୍କୁ ଏ ପ୍ରସଙ୍ଗରେ ସମାଲୋଚନା କରିଛି ଯୁବ କଂଗ୍ରେସ । ଶତାଧିକ ଯୁବ କଂଗ୍ରେସ ନେତା ସରକାରଙ୍କ ପଲ୍ୟୁସନ ଓ ଜରିମାନା ନିୟମକୁ କଡା ସମାଲୋଚନା କରିଛନ୍ତି ।
ପରିବହନ ମନ୍ତ୍ରୀଙ୍କ ବାସଭବନ ଘେରାଉ ବେଳେ ପୋଲିସ ଓ ଯୁବ କଂଗ୍ରେସ ମଧ୍ୟରେ ଧସ୍ତାଧସ୍ତି ପରିସ୍ଥିତି ସୃଷ୍ଟି ହୋଇଥିଲା । ପରିବହନ ମନ୍ତ୍ରୀଙ୍କୁ ୩ ଦିନ ମହଲତ ଦେଇଛି ଯୁବ କଂଗ୍ରେସ । ଅନ୍ୟପଟେ ବିରୋଧୀଙ୍କୁ ପରିବହନ ମନ୍ତ୍ରୀ ପାଲଟା ଟାର୍ଗେଟ କରିଛନ୍ତି । ମନ୍ତ୍ରୀଙ୍କ ଯୁକ୍ତି ହେଉଛି ପରିବେଶକୁ ଦୃଷ୍ଟିରେ ରଖି PUCC ସାର୍ଟିଫିକେଟ କରାଇବା ବାଧ୍ୟତାମୂଳକ କରାଯାଇଛି । ଆଗକୁ PUCC ଫାଇନ କମାଯିବ ମନ୍ତ୍ରୀ କହିଛନ୍ତି । ମଧ୍ୟପ୍ରଦେଶରେ ଦୁଇ ହଜାର ଟଙ୍କା ଫାଇନ ଥିବା ବେଳେ ଲୋକଙ୍କୁ ନ ବାଧିଲା ଭଳି ନୂଆ ଫାଇନ ମୂଲ୍ୟ ଅଣାଯିବ । ଲୋକଙ୍କ ପାଇଁ ଫାଇନ ଏବେ ସମ୍ପୂର୍ଣ୍ଣ କୋହଳ କରାଯାଇଛି । ମାର୍ଚ୍ଚ ସୁଦ୍ଧା ପଲ୍ୟୁସନ ସାର୍ଟିଫିକେଟ କରିବାକୁ ଅପିଲ କରିଛନ୍ତି ପରିବହନ ମନ୍ତ୍ରୀ । ପଲ୍ୟୁସନ ସାର୍ଟିଫିକେଟ ସହ ଜରିମାନାକୁ ଯୋଡ଼ିବା ନେଇ ବିଜେପି ସରକାର ବିରୋଧରେ ଜନ ଅସନ୍ତୋଷ ଦେଖାଦେଇଛି । ଗ୍ରୀନ ଷ୍ଟିକର ସିଷ୍ଟମ ବାଧ୍ୟତାମୂଳକ ନୁହେଁ ବୋଲି ପରିବହନ ମନ୍ତ୍ରୀ ପୁଣି ଦୋହରାଇଛନ୍ତି ।
