କୃଷକ ସଂଗଠନ ଗୁଡ଼ିକୁ ଆଲୋଚନା ପାଇଁ ଡାକିଲେ କେନ୍ଦ୍ର କୃଷି ମନ୍ତ୍ରୀ
ନୂଆଦିଲ୍ଲୀ: ଆଜି ଚାଷୀ ଓ ସରକାରଙ୍କ ମଧ୍ୟରେ ଆଲୋଚନା । ପୂର୍ବରୁ ୩ ତାରିଖରେ ଆଲୋଚନା ପାଇଁ ସ୍ଥିର କରାଯାଇଥିବା ବେଳେ ଚାଷୀ ଆନ୍ଦୋଳନ ଚାପରେ ଆଜି ସରକାର ବୈଠକ ଡାକିଛନ୍ତି । ଅପରାହ୍ନ ୩ଟାରେ ବିଜ୍ଞାନ ଭବନରେ ବୈଠକ ହେବ ବୋଲି କେନ୍ଦ୍ର କୃଷି ମନ୍ତ୍ରୀ ନରେନ୍ଦ୍ର ସିଂ ତୋମାର କହିଛନ୍ତି ।
ସେପଟେ ଦିଲ୍ଲୀ ସୀମା ସିନ୍ଧୁରେ ଚାଷୀଙ୍କ ଆନ୍ଦୋଳନ ଷଷ୍ଠ ଦିନରେ ପହଞ୍ଚିଛି । ବିନା ସର୍ତ୍ତରେ ସମସ୍ୟାର ସମାଧାନ ଜିଦ୍ରେ ଅଟଳ ରହିଛନ୍ତି ଚାଷୀ । ଏଥିସହ ବିନା କୌଣସି ଆଲୋଚନାରେ ତିନୋଟି ଯାକ କୃଷି ବିଲ୍କୁ ପ୍ରତ୍ୟାହାର କରିବା ପାଇଁ ସେମାନେ ଦାବି କରିଛନ୍ତି । ନହେଲେ ଦିଲ୍ଲୀକୁ ସଂଯୋଗ କରୁଥିବା ୫ଟି ଯାକ ରାସ୍ତାକୁ ବନ୍ଦ କରିଦିଆଯିବ ବୋଲି ଚେତାବନୀ ଦେଇଛନ୍ତି । ଚାଷୀଙ୍କ ଏଭଳି ଚେତାବନୀକୁ ଗୁରୁତ୍ବର ସହ ନେଇଛନ୍ତି କେନ୍ଦ୍ର ସରକାର ।
ଜେପି ନଡ୍ଡାଙ୍କ ଅଧ୍ୟକ୍ଷତାରେ ଏକ ରୁଦ୍ଧଦ୍ୱାର ବୈଠକ ହୋଇଥିବାବେଳେ କୃଷିମନ୍ତ୍ରୀଙ୍କ ସହ ଅମିତ ଶାହା ବୈଠକ କରିଛନ୍ତି । ପୂର୍ବରୁ ବୁରାଡିରେ ଆନ୍ଦୋଳନ କଲେ ଚାଷୀଙ୍କ ସହ ସରକାର ଆଲୋଚନା କରିବେ ବୋଲି ସର୍ତ୍ତ ରଖିଥିଲେ କେନ୍ଦ୍ର ଗୃହମନ୍ତ୍ରୀ ଅମିତ ଶାହା । ବୁରାଡିକୁ ଖୋଲା ଜେଲ ବୋଲି କହି ଚାଷୀ ଏହି ସର୍ତ୍ତକୁ ଖଣ୍ଡନ କରିଥିଲେ ।
