ହାଇକୋର୍ଟରେ ଘରୋଇ ସ୍କୁଲ ଫି ହ୍ରାସ ପ୍ରସଙ୍ଗ, ୧୦ରେ ପୁଣି ଶୁଣାଣି
କଟକ: କରୋନା ପାଇଁ ଘରୋଇ ସ୍କୁଲ ଫି ହ୍ରାସ ନେଇ ହାଇକୋର୍ଟରେ ରୁଜୁ ମାମଲାର ଶୁଣାଣି ହୋଇଛି । ସରକାରଙ୍କ ସତ୍ୟପାଠ ଉପରେ ଆବେଦନକାରୀ ସାନି ଜବାବ ରଖିଛନ୍ତି । ପୂର୍ବରୁ ହୋଇଥିବା ଏମ୍ଓୟୁ ଆଧାରରେ ହାଇକୋର୍ଟ ନିଷ୍ପତ୍ତି ନେଇପାରିବେ ବୋଲି ଆଡ୍ଭୋକେଟ୍ ଜେନେରାଲ କହିଥିଲେ । ମାମଲାର ପରବର୍ତ୍ତୀ ଶୁଣାଣି ଆସନ୍ତା ୧୦ ତାରିଖରେ ହେବ ବୋଲି କୁହାଯାଇଛି ।
ଗତ ୨ ତାରିଖରେ ସ୍କୁଲ ଫି’ ନେଇ ରାଜ୍ୟ ସରକାର ସତ୍ୟପାଠ ଦାଖଲ କରିଥିଲେ । ଘରୋଇ ସ୍କୁଲ ଫି ନିର୍ଦ୍ଧାରଣ ତଥା ନିୟନ୍ତ୍ରଣ ସରକାରଙ୍କ ପରିଧି ବାହାରେ ବୋଲି ଦର୍ଶାଯାଇଥିଲା । ଫି’ ନିର୍ଦ୍ଧାରଣ ନେଇ ଅତୀତରେ ମିଳିତ କମିଟି ନେଇଥିବା ନିଷ୍ପତ୍ତିକୁ କୋର୍ଟ ଗ୍ରହଣ କରିପାରନ୍ତି ବୋଲି ସରକାରଙ୍କ ପକ୍ଷରୁ କୁହାଯାଇଥିଲା । ରାଜସ୍ଥାନ ଓ ଦିଲ୍ଲୀ ସରକାରଙ୍କ ଘରୋଇ ସ୍କୁଲ ନିୟନ୍ତ୍ରଣ ନୀତି ପରି ରାଜ୍ୟ ସରକାର କିଛି ନୀତି କରିଛନ୍ତି କି ବୋଲି ହାଇକୋର୍ଟ ପଚାରିଥିଲେ । ଏପର୍ଯ୍ୟନ୍ତ ସେପରି କିଛି ନୀତି କରାଯାଇ ନଥିବା ସରକାରଙ୍କ ପକ୍ଷରୁ ହାଇକୋର୍ଟଙ୍କୁ ଅବଗତ କରାଯାଇଥିଲା ।
