ସଂସଦର ମିଳିତ ଅଧିବେଶନରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଉଦବୋଧନ

ନୂଆଦିଲ୍ଲୀ: ସଂସଦର ମିଳିତ ଅଧିବେଶନରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଉଦବୋଧନ।  ୨୫ କୋଟି ଲୋକ ଗରିବୀରୁ ମୁକ୍ତ ହୋଇଛନ୍ତି। କୃଷକଙ୍କୁ ୨୦ ହଜାର କୋଟି ଟଙ୍କାର ସହାୟତା ପ୍ରଦାନ କରାଯାଇଛି। ଚାଷୀଙ୍କ ସ୍ବାର୍ଥ ଲାଗି ଏମଏସପି ବୃଦ୍ଧି କରାଯାଇଛି। ୩ କୋଟି ଲକ୍ଷପତି ଦିଦିଙ୍କ ଲାଗି ଅଭିଯାନ ଜାରି ରହିଛି। ତୃତୀୟ ସର୍ବବୃହତ ଆଭିଏସନ ମାର୍କେଟ ଭାବେ ଭାରତ ପରିଗଣିତ ହୋଇଛି ବୋଲି କହିଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ। ସଂସଦର ମିଳିତ ଅଧିବେଶନରେ ସେ କହିଛନ୍ତି- ଅର୍ଥ ବ୍ଯବସ୍ଥାରେ ପ୍ରସ୍ତୁତି ଓ କୃଷିକୁ ଫୋକସ ଦିଆଯିବା ସହ ନିବେଶ ଓ ରୋଜଗାର ବଢିଛି। ସେମିକଣ୍ଡକ୍ଟର, ଗ୍ରୀନ ଏନର୍ଜି, ସୋଲାର ଆଦି ସବୁ କ୍ଷେତ୍ରରେ ବିକାଶ ହୋଇଛି। ପ୍ରତିରକ୍ଷା କ୍ଷେତ୍ରରେ ବି ଭାରତ ନିଜର ପ୍ରାଧାନ୍ଯ ଜାରି ରଖିଛି। ଆଇଟି ସେକ୍ଟର, ପର୍ଯ୍ୟଟନ, ସ୍ବାସ୍ଥ୍ୟ କ୍ଷେତ୍ରରେ ଭାରତ ଲିଡର ସାଜିଛି। ରୋଜଗାର ଓ ସ୍ବରୋଜଗାର ଲାଗି କ୍ଷେତ୍ର ସୃଷ୍ଟି ହୋଇଛି। ଜାମ୍ମୁ  ଓ କାଶ୍ମୀରରେ ଶାନ୍ତି ଶୃଙ୍ଖଳା ପ୍ରତିଷ୍ଠା ହୋଇପାରିଛି । ସୁଶାସନ, ନିରନ୍ତର, ସ୍ଥିର ସରକାର ଉପରେ ଲୋକଙ୍କ ବିଶ୍ବାସ ରହିଛି। ବିକଶିତ ଭାରତ ସଂକଳ୍ପ ଉପରେ ଲୋକଙ୍କ ବିଶ୍ବାସ ରହିଛି ବୋଲି କହିଛନ୍ତି ରାଷ୍ଟ୍ରପତି ।

ନୂଆ ସରକାର ଆସନ୍ତା ଦିନରେ ବଜେଟ ଆଗତ କରିବ। ବଜେଟରେ ସାମାଜିକ ଓ ଅର୍ଥନୈତିକ ପରି ଐତିହାସିକ ପଦକ୍ଷେପ ଦେଖିବାକୁ ମିଳିବ। ନିବେଶକଙ୍କୁ ଆକୃଷ୍ଟ କରିବା ଲାଗି ସରକାର ଆଭିମୁଖ୍ଯ ରଖିଛନ୍ତି। ସଂଘୀୟ ପରମ୍ପରା ଅନୁସାରେ ରାଜ୍ଯର ବିକାଶ ଲାଗି ସରକାର ପ୍ରତିଶୃତିବଦ୍ଧ । ମହାମାରୀ ଓ ବିଶ୍ବ ସଙ୍କଟ ମଧ୍ଯରେ ଭାରତର ଦୃତ ବିକାଶ ଘଟୁଛି। ବିଶ୍ବ ଅର୍ଥନୈତିକ ଅଭିବୃଦ୍ଧିରେ କେବଳ ଭାରତର ଯୋଗଦାନ ୧୫ ପ୍ରତିଶତ ରହିଛି। ୨୦୨୩ରେ ଆନ୍ତର୍ଜାତିକ ମିଲେଟ ମିଶନ ଗଠିତ ହୋଇଛି।  ଏପ୍ରିଲ ୨୦୧୪ରେ ଦେଶରେ ୨୦୯ ଏୟାରଲାଇନ୍ସ ରୁଟ୍ ଥିଲା। ଏପ୍ରିଲ ୨୦୨୪ରେ ସେହି ସଂଖ୍ଯା ହୋଇଛି ୬୦୫। ୧୦ ବର୍ଷ ମଧ୍ଯରେ ଗ୍ରାମାଞ୍ଚଳରେ ୩ ଲକ୍ଷ ୮୦ ହଜାର କିଲୋମିଟର ରାସ୍ତା ନିର୍ମିତ ହୋଇଛି ବୋଲି କହିଛନ୍ତି ରାଷ୍ଟ୍ରପତି।

ଗୃହରେ ପ୍ରଶ୍ନପତ୍ର  ଲିକ୍ ପ୍ରସଙ୍ଗ ଉଠାଇଛନ୍ତି ରାଷ୍ଟ୍ରପତି । ପ୍ରଶ୍ନପତ୍ର ଲିକ୍ ଘଟଣାର ତଦନ୍ତ ହେବ। ଏହି ଘଟଣାର ନିରପେକ୍ଷ ଯାଞ୍ଚ ଲାଗି ସରକାର ପ୍ରତିଶ୍ରୁତିବଦ୍ଧ ବୋଲି କହିଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ। ସଂସଦର ମିଳିତ ଅଧିବେଶନରେ ଉଦବୋଧନ ଦେଇ ରାଷ୍ଟ୍ରପତି କହିଛନ୍ତି ଛାତ୍ରଛାତ୍ରୀଙ୍କ ପାରଦର୍ଶିତାକୁ ସରକାର ଗୁରୁତ୍ବ ଦେଉଛନ୍ତି। ବିଭିନ୍ନ ରାଜ୍ୟରେ ପେପର ଲିକ୍ ଖବର ଆସିଛି। ସଂସଦରେ ପେପର ଲିକ୍ ନେଇ ଆଇନ ତିଆରି ହୋଇଛି। ପେପର ଲିକ୍ ଘଟଣାରେ ସମ୍ପୃକ୍ତ ଦୋଷୀଙ୍କୁ ମିଳିବ କଡ଼ା ଦଣ୍ଡ। ପରୀକ୍ଷାରେ ସ୍ବଚ୍ଛତା ଲାଗି ସରକାର କାମ କରୁଛନ୍ତି ବୋଲି କହିଛନ୍ତି ରାଷ୍ଟ୍ରପତି।