ଦେଶ ଛାଡି ପଳାଇଲେ ସିରିଆ ରାଷ୍ଟ୍ରପତି !

ନନ୍ଦିଘୋଷ ବ୍ୟୁରୋ: ଗୃହ ଯୁଦ୍ଧରେ କମ୍ପୁଛି ସିରିଆ। କେତେବେଳେ ବି ସିରିଆ ଅକ୍ତିଆର କରିପାରନ୍ତି ବିଦ୍ରୋହୀ। ସିରିଆରେ ବସର୍ ଅଲ୍ ଅସଦ୍ ଶାସନର ପତନ ଆଶଙ୍କା ରହିଛି। କୁହାଯାଉଛି ଯେ, ବିଦ୍ରୋହୀ ସେନା ମାନେ ରାଜଧାନୀ ଦାମାସକସ୍ ରେ ପ୍ରବେଶ କରିସାରିଛନ୍ତି। ବିଦ୍ରୋହୀ ସେମାନଙ୍କର ତୋପ ଏବଂ ବନ୍ଧୁକ ସହିତ ଦାମାସକସ୍ ରେ ପହଞ୍ଚିଛନ୍ତି। ଏଭଳି ପରିସ୍ଥିତିରେ ଦେଶ ଛାଡିଛନ୍ତି ସିରିଆ ରାଷ୍ଟ୍ରପତି ବଶର ଅଲ୍-ଅସଦ ।

ଏକ ଗଣମାଧ୍ୟମ ରିପୋର୍ଟରେ ଦାବି କରାଯାଇଛି ଯେ, ରାଷ୍ଟ୍ରପତି ବଶର ଅଲ୍-ଅସଦ ଏକ ସ୍ୱତନ୍ତ୍ର ବିମାନରେ ଏକ ଅଜ୍ଞାତ ଗନ୍ତବ୍ୟ ସ୍ଥାନକୁ ଚାଲିଯାଇଛନ୍ତି।

ଚାରିଆଡୁ ବିଦ୍ରୋହୀ ସୈନ୍ୟ ଘେରି ରହିଥିବା ସୂଚନା ମିଳିଛି। ସିରିଆର ୪ଟି ପ୍ରମୁଖ ସହର କବଜା କରିବା ସହିତ ଅନେକ ସ୍ଥାନରେ ଗୁଳିବିନିମୟ ଜାରି ରହିଛି । ସିରିଆର ଦାର ସହରକୁ ଅକ୍ତିଆର କରିଛନ୍ତି ବିଦ୍ରୋହୀ। ଦାର ସହ ହୋମ୍ସ ଭଳି ଅନ୍ୟ ପ୍ରମୁଖ ସହରଗୁଡିକ ଉପରେ କବଜା କରିଛନ୍ତି ବିଦ୍ରୋହୀ।

ସିରିଆ ଲାଗି ସଂକଟ ବଢିବାରେ ଲାଗିଛି। ୨୦୧୧ରୁ ଆରମ୍ଭ ହୋଇଥିବା ଗୃହଯୁଦ୍ଧର ଭୟଙ୍କର ପରିଣତି ଭୋଗୁଛନ୍ତି ଦେଶବାସୀ। ଅବସାନ ହୋଇପାରେ ୨୪ ବର୍ଷର ଶାସନ। ଆଗକୁ ମାଡିଚାଲିଛି ଆବୁ ମହମ୍ମଦ ଅଲ ଜୋଲାନୀ ନେତୃତ୍ବାଧୀନ ଇସଲାମିକ ସଂଗଠନ ହାୟତ ତାହିରିର ଅଲ ଶାମ ବା ଏଚଟିଏସ।

ସେପଟେ ସୀମାକୁ ସିଲ୍ କରିଛି ଜୋର୍ଡାନ। ତୁରନ୍ତ ସିରିଆ ଛାଡିବା ଲାଗି ଭାରତ, ଆମେରିକା, ରୁଷିଆ, ବ୍ରିଟେନ, ଇରାନ ସମେତ ବିଭିନ୍ନ ରାଷ୍ଟ୍ର ନିଜ ଦେଶର ନାଗରିକଙ୍କୁ ଦେଇଛନ୍ତି ନିର୍ଦ୍ଦେଶ। ସମସ୍ୟାର ସମାଧାନ ଲାଗି ତୁର୍କୀ ବୈଦେଶିକ ମନ୍ତ୍ରୀ ହାକାନ ଫିଦାଙ୍କ କଥା ହୋଇଛନ୍ତି ଆମେରିକା ବୈଦେଶିକ ମନ୍ତ୍ରୀ ଆଣ୍ଟୋନି ବ୍ଲିଙ୍କେନ। ରାଷ୍ଟ୍ରପତି ଅସଦଙ୍କୁ ରୁଷିଆ ଓ ଇରାନ ସମର୍ଥନ କରୁଥିବାବେଳେ ବିଦ୍ରୋହୀଙ୍କୁ ସମର୍ଥନ କରୁଛି ତୁର୍କୀ।  ପ୍ରଥମ ଥର ଲାଗି ଅସଦ ବଂଶ ଶାସନର ପତନ ଘଟିବା ଅବଶ୍ଯମ୍ଭାବୀ ହୋଇଛି । ମୁକ୍ତିଯୁଦ୍ଧରେ ସହାୟତା କରିବା ଲାଗି ରୁଷିଆ ଓ ଚୀନକୁ ଏଚଟିଏସ ଅନୁରୋଧ କରିଛି ।