ରାମନବମୀ ଓ ହନୁମାନ ଜୟନ୍ତୀ ପାଇଁ ସମ୍ବଲପୁରରେ ପ୍ରସ୍ତୁତି ଆରମ୍ଭ
1 min read
ସମ୍ବଲପୁର: ଶ୍ରୀରାମ ନବମୀ ଓ ହନୁମାନ ଜୟନ୍ତୀ ପାଇଁ ସମ୍ବଲପୁରରେ ଆରମ୍ଭ ହୋଇଛି ପ୍ରସ୍ତୁତି । ଚଳତବର୍ଷ ହନୁମାନ ଜୟନ୍ତୀ ବାଇକ ଶୋଭାଯାତ୍ରା ଓ ରାମ ନବମୀ ଶୋଭାଯାତ୍ରା ଗୋଟିଏ ଦିନରେ ପଡୁଥିବାରୁ ସୁରକ୍ଷା ନେଇ ପୋଲିସକୁ ବ୍ୟାପକ କସରତ କରିବାକୁ ପଡ଼ିଛି । ଲଗାତର ଫ୍ଲାକମାର୍ଚ୍ଚ କରାଯାଇ ସଚେତନ କରାଯାଇଥିବାବେଳେ ଯେଉଁ ରାସ୍ତା ଦେଇ ଶୋଭଯାତ୍ରା ଯିବ, ସେସବୁ ରାସ୍ତାକୁ ତନ୍ନ ତନ୍ନ କରି ଚେକିଂ କରାଯାଉଛି ।
ଉପରେ ଡ୍ରୋନ ଓ ତଳେ ମେଟାଲ ଡିଟେକ୍ଟର । ତନ୍ନ ତନ୍ନ କରି ଯାଞ୍ଚ କରୁଛି ପୋଲିସ୍ । ଶ୍ରୀରାମ ନବମୀ ଓ ହନୁମାନ ଜୟନ୍ତୀ ପାଇଁ ସଜାଗ ଟିମ୍ । ସମ୍ବଲପୁର ଶୋଭାଯାତ୍ରା ରାସ୍ତାରେ ତନଖି କଡ଼ାକଡ଼ି । ଚଳିତବର୍ଷ ପ୍ରଥମ ଥର ପାଇଁ ଉଭୟ ହନୁମାନ ଜୟନ୍ତୀ ଓ ଶ୍ରୀରାମ ନବମୀ ଶୋଭାଯାତ୍ରା ଗୋଟିଏ ଦିନରେ କରିବାକୁ ନିଷ୍ପତ୍ତି ନିଆଯାଇଛି । ତେଣୁ ଶାନ୍ତିଶୃଙ୍ଖଳା ରକ୍ଷା କରିବା ପୋଲିସ ପାଇଁ ହେବ ବଡ଼ ଚ୍ୟାଲେଞ୍ଜ । ସହର ସାରା ଫୋର୍ସ ମୁତୟନ କରାଯାଇଥିବା ବେଳେ ସମ୍ବଲପୁର ଜିଲ୍ଲାପାଳ, ଏସପି, ମହାନଗର ନିଗମର କମିଶନର ରାତି ତମାମ ବୁଲି ସ୍ଥିତି ଯାଞ୍ଚ କରୁଛନ୍ତି l ସହରର ବିଭିନ୍ନ ସ୍ଥାନରେ ଡଗ୍ ସ୍କ୍ବାଡ ଓ ବମ୍ ସ୍କ୍ବାଡ ନିୟୋଜିତ ରହି ଟିକିନିଖି ଯାଞ୍ଚ କରୁଛନ୍ତି ।
ସମୟ କମ ଥିବାରୁ ସଭିଏଁ ନିଜ ନିଜ ପ୍ରସ୍ତୁତିରେ ଲାଗି ପଡ଼ିଛନ୍ତି । ହନୁମାନ ଜୟନ୍ତୀ ବାଇକ୍ ରାଲି ଶୋଭାଯାତ୍ରା ଧନୁପାଲିରୁ ବାହାରିବାକୁ ନିଷ୍ପତ୍ତି ନିଆ ଯାଇଥିବା ବେଳେ ଶ୍ରୀରାମ ନବମୀ ଶୋଭାଯାତ୍ରା କ୍ଷେତରାଜପୁର ରେଳ ଷ୍ଟେସନ ନିକଟରୁ ବାହାରିବ । ତେଣୁ ଯେଉଁ ମାର୍ଗ ଦେଇ ଶୋଭାଯାତ୍ରା ଯିବ, ସେହି ରାସ୍ତାରେ କଡା ନଜର ରଖିଛି ପୋଲିସ ଓ ଜିଲ୍ଲା ପ୍ରଶାସନ । ଦୁଇବର୍ଷ ଆଗରୁ ହୋଇଥିବା ବିଶୃଙ୍ଖଳା କିଭଳି ଚଳିତବର୍ଷ ପୁନରାବୃତ୍ତି ନହେବ ସେନେଇ ଚାଲିଛି ଘନଘନ ବୈଠକ ।
