ମାମୁଁଘରୁ ଆସୁଛି ମହାପ୍ରଭୁଙ୍କ ପାଇଁ ପ୍ରଥମାଷ୍ଟମୀ ଭାର

ପୁରୀ: ମର୍ତ୍ତ୍ୟରେ ମହାପ୍ରଭୁଙ୍କ ମାନବୀୟ ଲୀଳା । ଆସନ୍ତାକାଲି ପ୍ରଥମାଷ୍ଟମୀ ଥିବାରୁ ମହାପ୍ରଭୁ ହେବେ ପଢୁଆଁ । ଶ୍ରୀଜିଉଙ୍କ ମାମୁଁଘର ନିଆଳି ମାଧବ ମନ୍ଦିରରୁ ମହାପ୍ରଭୁଙ୍କ ପାଇଁ ଆସୁଛି ପ୍ରଥମାଷ୍ଟମୀ ଭାର । ପରମ୍ପରା ଅନୁସାରେ ଶ୍ରୀଜୀଉମାନଙ୍କ ଅଙ୍ଗଲାଗି ଖଣ୍ଡୁଆ ବସ୍ତ୍ର , ଅରୁଆ ଚାଉଳ , ବିରି , ନଡିଆ , ଗୁଡ , ପାଚିଲା କଦଳୀ ଆସୁଛି ମାମୁଁଘରୁ ।

କଟକ ଜିଲ୍ଲା ନିଆଳି ବ୍ଲକ ମାଧବସ୍ଥିତ ମାଧବାନନ୍ଦଙ୍କ ମନ୍ଦିର ହେଉଛି ଶ୍ରୀ ଜଗନ୍ନାଥଙ୍କ ମାମୁଁଘର । କେଜାଣି କେଉଁ ଆବାହାମାନକାଳରୁ ମାଧବ ମନ୍ଦିର ପକ୍ଷରୁ ଜଗନ୍ନାଥଙ୍କୁ ପ୍ରଥମାଷ୍ଟମୀରେ ପଢୁଆଁ ପରମ୍ପରା ରହିଛି । କିନ୍ତୁ ଗତ କିଛି ବର୍ଷ ହେବ ଏହି ପରମ୍ପରା ବନ୍ଦ ହୋଇଯାଇଥିଲା । ଗତ ବର୍ଷ ଠାରୁ ଏହି ପରମ୍ପରାର ପୁନଃ ପ୍ରଚଳନ ହୋଇଥିବା ବେଳେ ଚଳିତ ବର୍ଷ ମଧ୍ୟ ଶ୍ରୀକ୍ଷେତ୍ର ଅଭିମୁଖେ ଯାଉଛି ଏହି ପଢୁଆଁ ଭାର।

ଏନେଇ ସଂକୀର୍ତନ ମଣ୍ଡଳୀର ସଂକୀର୍ତନ, ଢ଼ୋଲମହୁରୀ ବାଜାର ତାଳେ ତାଳେ ପ୍ରଥମାଷ୍ଟମୀ ଭାର ନିଆଳି ମାଧବ ମନ୍ଦିରରୁ ବାହାରିଛି ଶ୍ରୀକ୍ଷେତ୍ର ଅଭିମୁଖେ । ଗତ କିଛି ବର୍ଷ ହେବ ବନ୍ଦ ରହିଥିଲା ଏହି ପ୍ରଥା । କିନ୍ତୁ ପରମ୍ପରାକୁ ପୁନଃ ପ୍ରଚଳନ କରିବା ପାଇଁ ପୁଣି ଉଦ୍ୟମ ଆରମ୍ଭ ହୋଇଛି ।