କୋର୍ଟର ଦୟା କିମ୍ବା ସହାନୁଭୂତି ମୋର ଆବଶ୍ୟକତା ନାହିଁ, ଯାହା ଦଣ୍ଡ ଦିଆଯିବ ତାହା ଗ୍ରହଣ କରିବି

ନୂଆଦିଲ୍ଲୀ: ଅଦଲାତ ଅବମାନନା ମାମଲାରେ ଦୋଷୀ ସାବ୍ୟସ୍ତ ହେବା ପରେ ଓକିଲ ପ୍ରଶାନ୍ତ ଭୂଷଣ ପୁଣି ଥରେ ସୁପ୍ରିମକୋର୍ଟରେ କ୍ଷମା ମାଗିବାକୁ ମନା କରି ଦେଇଛନ୍ତି । ପ୍ରଶାନ୍ତ ଭୂଷଣ କହିଛନ୍ତି ଯେ ସେ ଏହି ମାମଲାରେ ଦଣ୍ଡକୁ ଭୟ କରନ୍ତି ନାହିଁ । ତାଙ୍କୁ କୋର୍ଟର ଦୟା କିମ୍ବା ସହାନୁଭୂତିର ଆବଶ୍ୟକତା ନାହିଁ । ତାଙ୍କୁ ଯାହା ଦଣ୍ଡ ଦିଆଯିବ ତାହା ଗ୍ରହଣୀୟ ବୋଲି ସେ କହିଛନ୍ତି । ଆଜି କୋର୍ଟ ଅବମାନନା ମାମଲାରେ ଦୋଷୀ ସାବ୍ୟସ୍ତ ହୋଇଥିବା ପ୍ରଶାନ୍ତ ଭୂଷଣଙ୍କ ଦଣ୍ଡ ଶୁଣାଣି ସ୍ଥଗିତ ରଖିବାକୁ ଏକ ଆବେଦନ ଉପରେ ସୁପ୍ରିମକୋର୍ଟ ବିଚାର କରୁଛନ୍ତି । ସେପଟେ କୋର୍ଟକୁ ଆକ୍ଷେପ କରି ପ୍ରଶାନ୍ତ ଭୂଷଣ କହିଛନ୍ତି ଯେ, ଯେଉଁ ଅଭିଯୋଗ ଉପରେ ଦୋଷୀ ସାବ୍ୟସ୍ତ ହୋଇ ତାଙ୍କୁ ଦଣ୍ଡିତ କରାଯାଇଛି ତାହା କୋର୍ଟ ତାଙ୍କୁ ଦେଇନାହିଁ ।

ଗତ ଗୁରୁବାର ସୁପ୍ରିମକୋର୍ଟରେ ଏହି ମାମଲାର ଶୁଣାଣି ହୋଇଥିଲା । ଏଭଳି ପରିସ୍ଥିତିରେ ସେ କୋର୍ଟରେ ଚାଲିଥିବା ମାମଲାକୁ ସ୍ଥଗିତ ରଖିବାକୁ ଏବଂ ଏକ ରିଭ୍ୟୁ ପିଟିସନ ଆବେଦନ କରିବାକୁ ସୁଯୋଗ ମାଗିଥିଲେ । କିନ୍ତୁ ସୁପ୍ରିମକୋର୍ଟ ତାଙ୍କ ଆବେଦନକୁ ପ୍ରତ୍ୟାଖ୍ୟାନ କରିଛନ୍ତି । କିନ୍ତୁ ପୁନର୍ବିଚାର ଆବେଦନ ଦାଖଲ ନହେବା ପର୍ଯ୍ୟନ୍ତ ବିଚାର ପ୍ରକ୍ରିୟା ସ୍ଥଗିତ ରଖିବା ଉଚିତ ବୋଲି ଭୂଷଣ କହିଛନ୍ତି ।

ପ୍ରଶାନ୍ତ କହିଛନ୍ତି ସେ ଟୁଇଟ୍ ରେ  ସେ ଏପରି କିଛି ଲେଖି ନଥିଲେ ଯେଉଁଥିପାଇଁ ତାଙ୍କୁ ଅଦାଲତ ଅବମାନନାରେ ଦଣ୍ଡ ମିଳିବ । ନାଗରିକ ଭାବେ ଦାୟିତ୍ୱ ପାଳନ କରିବା ପାଇଁ ଏହା ଏକ ପ୍ରୟାସ ଥିଲା ବୋଲି ସେ କହିଛନ୍ତି । ମୁଁ ଚିନ୍ତା କରି ଏହାକୁ ଟୁଇଟ୍ କରିଛି | ପ୍ରଶାନ୍ତ ଭୂଷଣ ସୁପ୍ରିମକୋର୍ଟରେ ମହାତ୍ମା ଗାନ୍ଧୀଙ୍କ ବିବୃତ୍ତିକୁ ଦୋହରାଇ କହିଛନ୍ତି, “ମୁଁ ଦୟା ମାଗିବି ନାହିଁ, ମୁଁ ସହାନୁଭୁତି ଦେଖାଇବାକୁ ମଧ୍ୟ ଆବେଦନ କରିବି ନାହିଁ । କୋର୍ଟ ଦେଇଥିବା ଦଣ୍ଡକୁ ମୁଁ ଖୁସିରେ ଗ୍ରହଣ କରିବି ବୋଲି ସେ କହିଛନ୍ତି । ଭୂଷଣ ଏହା ମଧ୍ୟ କହିଛନ୍ତି ଯେ ସାମ୍ବିଧାନିକ ବ୍ୟବସ୍ଥାର ସୁରକ୍ଷା ପାଇଁ ଯେକୌଣସି ଗଣତନ୍ତ୍ରରେ ଖୋଲା ସମାଲୋଚନା ଆବଶ୍ୟକ । ମୋର ଟ୍ୱିଟ୍ ମୋର ସର୍ବୋଚ୍ଚ କର୍ତ୍ତବ୍ୟର ଏକ ଛୋଟ ପ୍ରୟାସ ଥିଲା ବୋଲି ସେ କହିଛନ୍ତି ।