ରେଳ ବଜେଟକୁ ନେଇ ବିଜେଡି ସାଂଗଠନିକ ସଂପାଦକ ଖପ୍ପା, କହିଲେ ଓଡ଼ିଶାବାସୀଙ୍କୁ ଭୁଆଁ ବୁଲାଇବା ବନ୍ଦ କରୁ କେନ୍ଦ୍ର

ଭୁବନେଶ୍ୱର: ପୁଣି ଥରେ ରେଳ ବଜେଟରେ ଓଡ଼ିଶାକୁ ଉପେକ୍ଷା କରାଯାଇଛି । ବର୍ଷ ବର୍ଷ ଧରି ରାଜ୍ୟ ସରକାରଙ୍କ ଦାବି ମୁତାବକ ପ୍ରସ୍ତାବକୁ କେନ୍ଦ୍ର ରେଳ ମନ୍ତ୍ରଣାଳୟ ଗ୍ରହଣ କରୁନାହିଁ । ବରଗଡ଼-ନୂଆପଡ଼ା ଭାୟା ପଦମପୁର ରେଳ ଲାଇନକୁ ମଧ୍ୟ ମଂଜୁରୀ ମିଳନି । ରେଳବାଇରେ ଓଡ଼ିଶାକୁ ହୋଇଥିବା ଅବହେଳାକୁ ନେଇ ବର୍ଷିଛନ୍ତି ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ । ଚଳିତ ବର୍ଷ ରେଳ ବଜେଟରେ ଓଡ଼ିଶା ପାଇଁ ଅଧିକ ଅର୍ଥ ଆବଣ୍ଟନ ହୋଇଥିବା କହି ବାହା ବାହା ନେବା ଛାଡ଼ ବୋଲି ଟ୍ବିଟ୍ କରି କହିଛନ୍ତି ବିଜେଡି ପ୍ରଣବ ପ୍ରକାଶ ଦାସ । ବାସ୍ତବତା କ’ଣ ଓଡ଼ିଶାବାସୀ ବହୁତ ଭାଲଭାବେ ବୁଝି ସାରିଛନ୍ତି ।

୨୦୧୨୧-୨୨ରେ ଓଡ଼ିଶା ପାଇଁ ରେଳ ବଜେଟରେ ଆବଣ୍ଟିତ ହୋଇଥିବା ଅର୍ଥ ବାସ୍ତବରେ କେତେ ଖର୍ଚ୍ଚ ହୋଇଛି, ତାକୁ ହିସାବକୁ ନେଲେ ଆବଣ୍ଟିତ ସ୍ବପ୍ନର ବାସ୍ତବତା ପ୍ରତିଫଳତି ହେବ । ତେଣୁ ଓଡ଼ିଶାବାସୀଙ୍କୁ ଆଉ ଭୂଆଁ ବୁଲାନ୍ତୁ ନାହିଁ ବୋଲି ସେ ଅନୁରୋଧ କରିଛନ୍ତି । ଯଦି କାମ କରିପାରୁନାହାନ୍ତି ତେବେ ଚୁପ୍ ରୁହନ୍ତୁ ବୋଲି କହିଛନ୍ତି ପ୍ରଣବ ପ୍ରକାଶ । ଆବଣ୍ଟନର ସ୍ବପ୍ନ ଭିତରେ ବାସ୍ତବତା କେତେ ତାହା ଓଡ଼ିଶାବାସୀ ଜାଣିସାରିଛନ୍ତି । ଉଦାହରଣ, ଖୋର୍ଦ୍ଧା-ବଲାଙ୍ଗୀର ରେଳ ଲାଇନ । ଯାହା କେନ୍ଦ୍ରର ବିଜେପି ସରକାର ପୂର୍ବରୁ କାମ ଆରମ୍ଭ ହୋଇଥିଲା । ୯ ବର୍ଷରେ ମାତ୍ର ଖୋର୍ଦ୍ଧାରୁ ନୟାଗଡ଼ ରେଳ ଚାଲିପାରିଛି ବୋଲି ସେ କହିଛନ୍ତି ।