ଆର୍ଯ୍ୟନ୍ ଖାନ୍ ଡ୍ରଗ୍ସ ମାମଲା: ମୁଖ୍ୟ ସାକ୍ଷୀ ପ୍ରଭାକରଙ୍କ ମୃତ୍ୟୁ
ମୁମ୍ବାଇ: ମୁମ୍ବାଇର ଚର୍ଚ୍ଚିତ କ୍ରୁଜ୍ ଡ୍ରଗ୍ସ ମାମଲାରେ ସାକ୍ଷୀ ରହିଥିବା ପ୍ରଭାକରଙ୍କ ଶୁକ୍ରବାର ପରଲୋକ ହୋଇଛି । ତାଙ୍କ ଓକିଲ ତୁଷାର ଖଣ୍ଡାରେଙ୍କ ଅନୁସାରେ ଚେମ୍ବୁରର ମାହୋଲ ଅଞ୍ଚଳରେ ଥିବା ତାଙ୍କ ବାସଭବନରେ ତାଙ୍କର ହୃଦରୋଗରେ ମୃତ୍ୟୁ ହୋଇଛି ।
ସୂଚନାଯୋଗ୍ୟ ପ୍ରଭାବର ସେଲ୍ ସମୀର ଓ୍ୱାଂଖଡ଼େଙ୍କ ଉପରେ କୋଟି କୋଟି ଲାଞ୍ଚ ନେବାର ଅଭିଯୋଗ ଆଣିଥିଲେ । ଯାହାପରେ ସମୀର ଓ୍ୱାଂଖଡ଼େଙ୍କୁ ନେଇ ତଦନ୍ତ ଆରମ୍ଭ ହୋଇଥିଲା । ଏହି ମାମଲାରେ ତଦନ୍ତ କରୁଥିବା ଭିଜିଲାନ୍ସ ଟିମ୍ ପ୍ରଭାକରଙ୍କୁ ପଚରାଉଚରା ପାଇଁ ମଧ୍ୟ ଡକାଇଥିଲା ।
ପ୍ରଭାକର ଖୁଲାସା କରିଥିଲେଯେ, କେପି ଗୋସାଓ୍ୱି ନାମକ ଜଣେ ବ୍ୟକ୍ତିକୁ ସେ ଫୋନରେ ୨୫ କୋଟି ଡିଲ୍ କରୁଥିବାର ଶୁଣିବାକୁ ପାଇଥିଲେ ଏବଂ ଉକ୍ତ ବ୍ୟକ୍ତି ୧୮ କୋଟିରେ ଡିଲ ଫିକ୍ସ କରିବା କଥା କହୁଥିବା ମଧ୍ୟ ପ୍ରଭାକର ଶୁଣିଥିଲେ ।
ଏହି ହାଇପ୍ରୋଫାଇଲ ମାମଲାରେ ବଲିଉଡର କିଙ୍ଗ୍ ଖାନଙ୍କ ପୁଅ ଆର୍ଯ୍ୟନ ଖାନ ଗିରଫ ହୋଇଥିଲେ । ସମୀର ଓ୍ୱାଂଖଡ଼େ ୨ ଅକ୍ଟୋବର ୨୦୨୧ରେ ମୁମ୍ବାଇରୁ ଗୋଆ ଯାଉଥିବା ଏକ କ୍ରୁଜରେ ଚଢ଼ାଉ କରିଥିଲେ । ସେଠାରେ ଆର୍ଯ୍ୟନ ଖାନଙ୍କ ସମେତ ୯ ଜଣଙ୍କୁ ଗିରଫ କରାଯାଇଥିଲା । ଅବଶ୍ୟ ଆର୍ଯ୍ୟନଙ୍କ ନିକଟରୁ ଡ୍ରଗ୍ସ ମିଳିନଥିଲା । ତେବେ ତଦନ୍ତର କିଛି ଦିନ ପରେ ମାମଲା ଭିନ୍ନ ମୋଡ଼ ନେଇଥିଲା ଏବଂ ସମୀର ଓ୍ୱାଂଖଡ଼େଙ୍କ ଉପରେ ଲାଞ୍ଚ ନେବା ଅଭିଯୋଗ ହୋଇଥିଲା । ଶେଷରେ ତାଙ୍କୁ ଏହି ମାମଲାରୁ ବାହାର କରି ଦିଆଯାଇଥିଲା ଏବଂ ଅନ୍ୟ ଅଫୀସରଙ୍କୁ ଦାୟିତ୍ୱ ହସ୍ତାନ୍ତର ହୋଇଥିଲା ।
ସୂଚନାଯୋଗ୍ୟ, ଆର୍ୟନ୍ ଖାନ୍ କ୍ରୁଜ୍ ଡ୍ରଗ୍ ମାମଲାର ଚାର୍ଜସିଟ୍ ଫାଇଲ୍ କରିବା ପାଇଁ ମୁମ୍ବାଇର ଏକ ସ୍ୱତନ୍ତ୍ର ଅଦାଲତ ‘ଏନ୍ସିବି’କୁ ଆହୁରି ୬୦ ଦିନ ସମୟ ଦେଇଛନ୍ତି। କିନ୍ତୁ, ଚାର୍ଜସିଟ୍ ଦାଖଲ କରିବା ଲାଗି ୯୦ ଦିନ ସମୟ ଦେବା ପାଇଁ ଗତ ସୋମବାର ଦିନ ‘ଏନ୍ସିବି’ ଅଦାଲତଙ୍କୁ ନିବେଦନ କରିଛି।
