ଭୁବନେଶ୍ବର : ଉଦଯାପିତ ହେଲା ପ୍ରବାସୀ ଭାରତୀୟ ସମ୍ମେଳନ। ପ୍ରବାସୀମାନେ ଓଡିଶା ବିକାଶରେ ହୁଅନ୍ତୁ ଭାଗିଦାରୀ। ଅପିଲ କଲେ ରାଷ୍ଟ୍ରପତି ଦୈପଦୀ ମୁର୍ମୁ । ଉଦଯାପନୀ ସମ୍ମେଳନରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଉପସ୍ଥିତ ପ୍ରବାସୀ ଓଡିଆ ଲୋକଙ୍କୁ ଧନ୍ଯବାଦ ଜଣାଇବା ସହ ୨୩ ଜଣଙ୍କୁ ପ୍ରବାସୀ ଭାରତୀୟ ସମ୍ମାନରେ ସମ୍ମାନିତ କରିଛନ୍ତି। ଏଥିସହିତ ପ୍ରବାସୀଙ୍କ ସଫଳ କାହାଣୀ ବିଶ୍ୱବାସୀଙ୍କୁ ଅଭିଭୂତ କରିଛି ଏବଂ ଆଗାମୀ ଦିନରେ ପ୍ରତ୍ଯେକ ଓଡିଆଙ୍କ ପାଇଁ ଆଦର୍ଶ ହେବ ବୋଲି ସେ କହିଛନ୍ତି। ସେହିଭଳି ମୁଖ୍ଯମନ୍ତ୍ରୀ ମୋହନ ମାଝୀ କହିଛନ୍ତି ଯେ, ପ୍ରବାସୀ ଭାରତୀୟ ସମ୍ମିଳନୀ ହୃଦୟର ମିଳନ, ନୂଆ ନୂଆ ଚିନ୍ତାଧାରା ଓ ଭାବର ଆଦାନପ୍ରଦାନ ପାଇଁ ସ୍ମରଣୀୟ ରହିବ। ଏହି ସମ୍ମିଳନୀ ଜରିଆରେ ଓଡିଶା ସାରା ବିଶ୍ୱ ପାଖରେ ପହଂଚି ପାରିଛି। ଓଡ଼ିଆ ଭାଷା ବିଭାଗ ତରଫରୁ ପ୍ରବାସୀ ଭାରତୀୟଙ୍କ ପାଇଁ ଜଣେ ନୋଡାଲ ଅଫିସର ରଖିବାକୁ ଏହି ଅବସରରେ ମୁଖ୍ଯମନ୍ତ୍ରୀ ଘୋଷଣା କରିଛନ୍ତି ।
ପ୍ରବାସୀ ଭାରତୀୟ ସମ୍ମେଳନରେ ଝଲସିଛି ରାଜ୍ଯର ସଂସ୍କୃତି ଓ ପରମ୍ପରାର । ରାଜ୍ଯର କଳା ଓ ସଂସ୍କୃତି ସହ ମହାପ୍ରଭୁ ଶ୍ରୀଜଗନ୍ନାଥଙ୍କ ବାଲୁକା କଳା ସବୁ ଏକାଠି ଗୋଟିଏ ବାସ୍କେଟରେ ପ୍ରଦର୍ଶିତ ହେବା ପ୍ରଶଂସନୀୟ। ତା ସହିତ ଅନ୍ୟ ରାଜ୍ୟର କଳା ଓ ସଂସ୍କୃତି କେନ୍ଦ୍ର ସରକାରଙ୍କ ଦ୍ଵାରା ସ୍ଥାନିତ ହୋଇଛି। ଏହା ଭାରତ ଓ ଓଡ଼ିଶାର ମହାନ୍ ପରମ୍ପରାକୁ ଦର୍ଶାଉଛି ବୋଲି କହିଛନ୍ତି କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ। ସେପଟେ ପ୍ରବାସୀ ଭାରତୀୟ ସମ୍ମେଳନରେ ଅନୁଷ୍ଠିତ ପ୍ରଦର୍ଶନୀ ଆସନ୍ତା ଦୁଇ ଦିନ ପର୍ଯ୍ଯନ୍ତ ଅର୍ଥାତ ୧୨ ତାରିଖ ସନ୍ଧ୍ୟା ଯାଏଁ ଖୋଲା ରହିବ ବୋଲି ଘୋଷଣା କରିଛନ୍ତି ଉପମୁଖ୍ଯମନ୍ତ୍ରୀ ପ୍ରଭାତୀ ପରିଡା । ସାଂସ୍କୃତିକ କାର୍ଯ୍ୟକ୍ରମ ବି ଜାରି ରହିବ । ସାଧାରଣ ଲୋକ ନିଶୁଳ୍କରେ ପ୍ରବେଶ କରିପାରିବେ ବୋଲି ସେ କହିଛନ୍ତି। ପ୍ରବାସୀ ଭାରତୀୟ ସମ୍ମାନ ପାଇଁ ରାଜ୍ଯ ସରକାରଙ୍କୁ ଧନ୍ଯବାଦ ଜଣାଇଛନ୍ତି ପ୍ରବାସୀ । ପ୍ରବାସୀ ଭାରତୀୟ ସମ୍ମେଳନକୁ ସଫଳ କରିବାକୁ ରାଜ୍ଯ ସରକାର ସମାନ୍ତରାଳ ଭାବେ ଏକାଧିକ ସାଂସ୍କୃତିକ କାର୍ଯ୍ଯକ୍ରମର ମଧ୍ଯ ଆୟୋଜନ କରିଛନ୍ତି ।
