ପ୍ରଦୂଷଣର ସୀମା ଲଂଘିଛି ବନ୍ଦର ନଗରୀ ପାରାଦୀପ

ପାରାଦୀପ: ପ୍ରଦୂଷଣର ସୀମା ଲଂଘିଛି ବନ୍ଦର ନଗରୀ ପାରାଦୀପ । ବନ୍ଦର ପ୍ରଶାସନର ଖାମଖିଆଲି ମନୋଭାବ ଯୋଗୁଁ ପ୍ରଦୂଷଣରେ ପେଶି ହେଉଛନ୍ତି ପାରାଦୀପବାସୀ । ବନ୍ଦରରେ ଗଦା ହୋଇଥିବା କୋଇଲା , ଲାଇମଷ୍ଟୋନ, ଲୁହାପଥର ଗୁଣ୍ଡ ପବନରେ ଉଡି ସ୍ଥାନୀୟ ପରିବେଶକୁ ପ୍ରଦୂଷିତ କରୁଛି । ସ୍ଥିତି ଏପରି ହୋଇଛି ଯେ, ଗୁରୁବାର କୋଇଲା ଗୁଣ୍ଡ ଉଡି ମେଘୁଆ ପାଗର ଭ୍ରମ ସୃଷ୍ଟି ହୋଇଥିଲା । ଅଠରବାଙ୍କି ଠାରୁ ବଡପଡିଆ‌ ରାସ୍ତାରେ ଉତ୍କଟ ପରିସ୍ଥିତି ସୃଷ୍ଟି ହୋଇଥିଲା । ଗଛପତ୍ର ଗୁଡ଼ିକ କଳା ପଡି ଯାଇଥିବା ବେଳେ, ରାସ୍ତାରେ ଯାଆସ କରୁଥିବା ଲୋକଙ୍କ ଆଖି ଲାଲ ପଡ଼ିଯାଇଥିଲା । ବନ୍ଦର ପକ୍ଷରୁ କୋଇଲା ଗଦା ହୋଇଥିବା ସ୍ଥାନରେ ପାଣି ଛିଞ୍ଚିବାର ବ୍ୟବସ୍ଥା କରାଯାଇଛି । ମାତ୍ର ଏହା ଗୁଣ୍ଡକୁ ରୋକିବାରେ ସଫଳ ହୋଇନାହିଁ। ଏଣୁ ତୁରନ୍ତ ବିକଳ୍ପ ବ୍ୟବସ୍ଥା ଗ୍ରହଣ କରିବାକୁ ସ୍ଥାନୀୟ ବାସିନ୍ଦା ଦାବି କରିଛନ୍ତି । ପଣ୍ୟ କାରବାରରେ ରେକର୍ଡ କରୁଥିବା ବନ୍ଦର କର୍ତ୍ତୃପକ୍ଷ କିନ୍ତୁ ଲୋକଙ୍କ କଥା ଭୁଲି ଯାଉଛନ୍ତି । ସେପଟେ ପାରାଦୀପ ସ୍ଥିତି ପ୍ରଦୂଷଣ ଅଧିକାରୀ ମଧ୍ୟ ସ୍ଥିତିକୁ ହାଲକା ଭାବେ ନେବା ସହ ବନ୍ଦର କର୍ତ୍ତୃପକ୍ଷଙ୍କୁ ପାଣି ପକାଇବାକୁ ନିର୍ଦ୍ଦେଶ ଦେବେ ବୋଲି କହିଛନ୍ତି ।