ଲୋକପ୍ରିୟ ବଲିଉଡ ଗାୟକ ଭୂପିନ୍ଦର ସିଂହଙ୍କ ପରଲୋକ

ନୂଆଦିଲ୍ଲୀ: ବଲିଉଡ ଲୋକପ୍ରିୟ ଗାୟକ ଭୂପିନ୍ଦର ସିଂହଙ୍କ ପରଲୋକ ଘଟିଛି । ଆଜି ସନ୍ଧ୍ୟାରେ ମୁମ୍ବାଇରେ ଶେଷ ନିଶ୍ୱାସ ତ୍ୟାଗ କରିଛନ୍ତି ଭୂପିନ୍ଦର । ମୃତ୍ୟୁ ବେଳକୁ ତାଙ୍କୁ ୮୨ ବର୍ଷ ହୋଇଥିଲା । ତାଙ୍କର ମୃତ୍ୟୁ ନେଇ ପତ୍ନୀ ଏବଂ କଣ୍ଠଶିଳ୍ପୀ ମିତାଲି ସିଂହ ସୂଚନା ଦେଇଛନ୍ତି । ଭୁପିନ୍ଦରଙ୍କ ନିଧନ ଖବର ସାରା ମ୍ୟୁଜିକ ଇଣ୍ଡଷ୍ଟ୍ରିରେ ଶୋକାକୂଳ ପରିସ୍ଥିତି ସୃଷ୍ଟି କରିଛି । ଗତକିଛି ଦିନ ହେବ ସେ ସ୍ୱାସ୍ଥ୍ୟଗତ ସମସ୍ୟାରେ ଜୁଝୁଥିଲେ । ଖାସ କରି ପେଟ ରୋଗରେ ପୀଡିତ ଥିଲେ ।  ମଙ୍ଗଳବାର ତାଙ୍କର ଅନ୍ତିମ ସଂସ୍କାର ହେବ । ତାଙ୍କ ମୃତ୍ୟୁରେ ପ୍ରଶଂସକମାନେ ଭାଙ୍ଗିପଡିଛନ୍ତି । କେବଳ ସଂଗୀତ ନୁହେଁ ବରଂ ଗଜଲ

ମୁମ୍ବାଇସ୍ଥିତ କ୍ରିଟିକେୟାର ଏସିଆ ହସ୍ପିଟାଲର ଡାକ୍ତର ଦୀପକ ନାମଜୋଶୀ କହିଛନ୍ତି ଭୁପିନ୍ଦରଙ୍କୁ ୧୦ ଦିନ ପୂର୍ବେ ହସ୍ପିଟାଲରେ ଭର୍ତ୍ତି କରାଯାଇଥିଲା । ତାଙ୍କ ପେଟରେ ଇମ୍ଫେକ୍ସନ ଥିଲା । ଏହି ସମୟରେ ସେ କରୋନାରେ ମଧ୍ୟ ସଂକ୍ରମିତ ହୋଇଯାଇଥିଲେ । ସୋମବାର ସକାଳେ ତାଙ୍କ ସ୍ୱାସ୍ଥ୍ୟବସ୍ଥା ଅଧିକ ବିଗିଡି ଯାଇଥିଲା । ଭେଣ୍ଟିଲେଟରରେ ଥିବା ସମୟରେ ହୃଦଘାତରେ ସନ୍ଧ୍ୟା ୭ ଟା ୪୫ରେ ମୃତ୍ୟୁ ହୋଇଯାଇଛି ।

ଭୂପିନ୍ଦର ମୌସମ, ସତ୍ତେ ପେ ସତ୍ତା, ଆହିସ୍ତା ଆହିସ୍ତା, ଦୁରିଆଁ ଏବଂ ହକିକତ ସହିତ ଅନେକ ଗୀତ ଗାଇଛନ୍ତି । ତାଙ୍କର ସବୁଠୁ ଲୋକପ୍ରିୟ ଗୀତ ମଧ୍ୟରେ ମେରା ରଙ୍ଗ ଦେ ବସନ୍ତି ଚୋଲା, ପ୍ୟାର ହମେ କିସ ମୋଡ଼ ପର ଲେ ଆୟା, ହୁଜୁର ଇସ କଦର, ଏକ ଅକେଲା ଇସ ସହର ମେ, ଜିନ୍ଦେଗୀ ମିଲକେ ବତାଏଙ୍ଗେ, ବିତି ନା ବିତାୟି ରେନା ଅନ୍ୟତମ । ତେବେ ଭୂପିନ୍ଦର ବଲିଉଡ ପ୍ଲେବ୍ୟାକ ସିଙ୍ଗର ସହ ଗଜଲ ଗାୟକ ହିସାବରେ ଲୋକପ୍ରିୟ ଥିଲେ । ସେ ଗିଟାର ଏବଂ ଭାଓଲିଅନ ମଧ୍ୟ ବଜାଇବା ଶିଖିଥିଲେ ।

ତାଙ୍କର ଜନ୍ମ ୧୯୪୦ ମସିହା ଫେବ୍ରୁଆରୀ ୬ ତାରିଖରେ ପଞ୍ଜାବର ଅମୃତସରରେ ହୋଇଥିଲା । ସଙ୍ଗୀତରେ ନିଜର କ୍ୟାରିଅର ଦିଲ୍ଲୀର ଅଲ ଇଣ୍ଡିଆ ରେଡିଓରୁ ଆରମ୍ଭ କରିଥିଲେ । ଏହାପରେ ହୋକେ ମଜବୁର ସନେ ମୁଝେ ବୁଲାୟା ହୋଗା ଗୀତରେ ପ୍ରଥମଥର ସୁଯୋଗ ମିଳିଥିଲା । ଅଲ ଇଣ୍ଡିଆ ରେଡିଓ ପ୍ରଡ୍ୟୁସର ସତୀଶ ଭାଟିଆ ତାଙ୍କୁ ଏହି ଗୀତରେ ଗାଇବା ପାଇଁ ସୁଯୋଗ ଦେଇଥିଲେ । ଏହି ଗୀତ ସେ ମହମ୍ମଦ ରଫି, ତଲତ ମହମ୍ମଦ ଏବଂ ମନ୍ନା ଡେଙ୍କ ସହ ବୋଲିଥିଲେ ।