ଆଧୁନିକ ମେଟାଲିକ୍ସ ରେଳ ଲାଇନ୍ ଖୋଳିଦେବା ଘଟଣା, ବିଜେପି ନେତାଙ୍କ ପୋକଲିନ୍ ମେସିନ୍ ଜବତ
ରାଉରକେଲା: କେନ୍ଦ୍ରରେ ଶିଳ୍ପାୟନର ନାରା ଦେଉଛନ୍ତି ମୋଦି ସରକାର । ହେଲେ, ରାଜ୍ୟରେ ଶିଳ୍ପାୟନକୁ ରୋକୁଛନ୍ତି ବିଜେପି ନେତା । ଡରାଇ, ଧମକାଇ କମ୍ପାନୀଙ୍କୁ ଭୟଭୀତ କରୁଛନ୍ତି । କମ୍ପାନୀକୁ କ୍ଷତି ପହଞ୍ଚାଇବାକୁ ଯାଇ ନଷ୍ଟ କରୁଛନ୍ତି ସର୍ବସାଧାରଣ ସମ୍ପତ୍ତି । ମାଲ ପରିବହନ ରୋକିବାକୁ ଖୋଳି ଦେଉଛନ୍ତି ରେଳ ଲାଇନ୍ । ଏପରି ଅଭିଯୋଗ ଆସିଛି ସୁନ୍ଦରଗଡ଼ ଜିଲ୍ଲାରୁ । କୁଆଁରମୁଣ୍ଡା ବ୍ଲକର କାଲୋସିରିଆରେ ରହିଛି ଆଧୁନିକ ମେଟାଲିକ୍ସ କାରଖାନା । ଆଉ ଏହି ଶିଳ୍ପସଂସ୍ଥାକୁ ସଂଯୋଗ କରୁଥିବା ରେଳ ଧାରଣାର ୧୦୦ ମିଟରରୁ ଅଧିକ ଟ୍ରାକ୍ କାଟି ସ୍ଥାନୀୟ ବିଜେପି ନେତା କମ୍ପାନୀକୁ ହଇରାଣ କରୁଥିବା ଅଭିଯୋଗ ହୋଇଛି ।
ପ୍ରଧାନମନ୍ତ୍ରୀ ଲୋକାଲ ଫର୍ ଭୋକାଲ ନାରା ଦେଇ ଭାରତୀୟ ଶିଳ୍ପଦ୍ୟୋଗକୁ ପ୍ରୋତ୍ସାହିତ କରୁଛନ୍ତି । କିନ୍ତୁ ସ୍ଥାନୀୟ ଅଞ୍ଚଳର କିଛି ବିଜେପି ନେତାଙ୍କ ଲାଗି ଅସୁବିଧା ଭୋଗୁଛନ୍ତି ଶିଳ୍ପ ସଂସ୍ଥା । ସୁନ୍ଦରଗଡ଼ ଜିଲ୍ଲାର କୁଆଁରମୁଣ୍ଡା ଆଧୁନିକ ମେଟାଲିକ୍ସକୁ ସଂଯୋଗ କରୁଥିବା ଟ୍ରେନ୍ ଟ୍ରାକକୁ ଗତ ନଭେମ୍ବର ୨୯ ତାରିଖରେ ଖୋଳି ଦିଆଯାଇଛି । ସେବେଠାରୁ କାରଖାନାକୁ ବନ୍ଦ ରହିଛି ମାଲ ପରିବହନ । ଶହେ ମିଟରରୁ ଅଧିକ ଟ୍ରେନ୍ ଟ୍ରାକକୁ ସ୍ଥାନୀୟ ବିଜେପି ନେତା ଲାଲୁ ସିଂଦେଓ ଓରଫ୍ ସଞ୍ଜୀବ ପ୍ରତାପ ସିଂଦେଓ ଖୋଳି ଦେଇଥିବା ଅଭିଯୋଗ ହୋଇଛି । ଏନେଇ କୁଆଁରମୁଣ୍ଡା ପୋଲିସ ଫାଣ୍ଡିରେ କମ୍ପାନୀର ସୁରକ୍ଷା କର୍ମୀ ଏତଲା ଦେଇଥିଲେ ।
ଅଭିଯୋଗର ତଦନ୍ତ କରି କୁଆଁରମୁଣ୍ଡା ଫାଣ୍ଡି ପୋଲିସ ସ୍ଥାନୀୟ ବିଜେପି ନେତାଙ୍କ ପୋକଲିନ୍ ମେସିନ୍ ଜବତ କରିଛି । ବିଜେପି ନେତା ଲାଲୁ ସିଂଦେଓଙ୍କ ସହ ତାଙ୍କ ସମର୍ଥକଙ୍କୁ ନୋଟିସ୍ ଜାରି କରିଛି ପୋଲିସ । ଏହି ମାମଲାରେ ସମସ୍ତ ଅଭିଯୁକ୍ତଙ୍କ ବିରୁଦ୍ଧରେ ଦୃଢ଼ କାର୍ଯ୍ୟନୁଷ୍ଠାନ ଲାଗି ସିଟୁ ଶ୍ରମିକ ସଂଗଠନ ପକ୍ଷରୁ ଦାବି କରାଯାଇଛି । ବ୍ୟକ୍ତିଗତ ଫାଇଦା ଲାଗି ଟ୍ରେନ୍ ଟ୍ରାକ୍ ଭଳି ସର୍ବସାଧାରଣ ସମ୍ପତ୍ତିକୁ ବିଜେପି ନେତା ନଷ୍ଟ କରୁଥିବା ଅଭିଯୋଗ ହୋଇଥିବା ବେଳେ ଦୃଢ଼ କାର୍ଯ୍ୟାନୁଷ୍ଠାନ ଲାଗି ସାଧାରଣରେ ଦାବି ହେଉଛି ।
