ERSS 112 ସେବା ମାଧ୍ୟମରେ ୪୦୨୮ ଜଣଙ୍କୁ ସହାୟତା ଯୋଗାଇ ଦେଇଛି ପୋଲିସ
1 min read
ଭୁବନେଶ୍ୱର: ସହରାଞ୍ଚଳରେ ଜନସାଧାରଣମାନଙ୍କୁ ତୁରନ୍ତ ସହାୟତା ଯୋଗାଇଦେବା ପାଇଁ Victor Control Room ଦ୍ଵାରା ଗତ ବର୍ଷ ଡିସେମ୍ବର ମାସରେ ଜରୁରୀକାଳୀନ ସହାୟତା ବ୍ୟବସ୍ଥା( ERSS-112) ସେବା ମାଧ୍ୟମରେ ସମୁଦାୟ ୪୦୨୮ ଗୋଟି ଫୋନ କଲ ଗ୍ରହଣ କରାଯାଇଥିଲା । ସାହାଯ୍ୟ ଚାହୁଁଥିବା ବ୍ୟକ୍ତି ମାନଙ୍କ ନିକଟରେ ତୁରନ୍ତ ପହଞ୍ଚି ସେମାନଙ୍କ ସମସ୍ୟାର ସମାଧାନ କରାଯାଇ ପାରିଛି । ଭୁବନେଶ୍ୱର ସହରାଞ୍ଚଳ ପୁଲିସ ଜିଲ୍ଲାରେ ଉପଲବ୍ଧ ୩୫ ଗୋଟି ପିସିଆର ଭ୍ୟାନରେ କାର୍ଯ୍ୟରତ କର୍ମଚାରୀମାନେ ନିର୍ଦ୍ଦିଷ୍ଟ ସ୍ଥାନମାନଙ୍କରେ ଅବିଳମ୍ବେ ପହଞ୍ଚିବା ଫଳରେ ଘଟିବାକୁ ଥିବା ଅନେକ ଗଣ୍ଡଗୋଳର ପ୍ରାକ ସମାଧାନ କରିବା ସହ ଅପରାଧୀଙ୍କୁ କାବୁ କରାଯାଇପାରିଛି । ଏହା ଛଡା ବିଭିନ୍ନ ଧାରଣା, ପ୍ରତିବାଦ ସଭା ସମୟରେ ଟ୍ରାଫିକ୍ ନିୟନ୍ତ୍ରଣ , ଆନ୍ଦୋଳନକାରୀ ମାନଙ୍କୁ ସ୍ଥାନାନ୍ତରିତ କରିବା ସହ ଦୁର୍ଘଟଣାର ଶିକାର ବ୍ୟକ୍ତି ମାନଙ୍କୁ ତୁରନ୍ତ ହସ୍ପିଟାଲ ନେବା ତଥା ପୀଡ଼ିତ ବ୍ୟକ୍ତିଙ୍କୁ ତୁରନ୍ତ ସାହାଯ୍ୟ କରିବାରେ ପିସିଆର ଭ୍ୟାନରେ କାର୍ଯ୍ୟରତ କର୍ମଚାରୀମାନେ ଉଦ୍ୟମ କରିଛନ୍ତି ।
କିଛି ଉଲ୍ଲେଖନୀୟ ଘଟଣାବଳୀ
୧. ଗତ ତା ୦୫.୧୨. ୨୦୨୧ ରିଖ ସକାଳ ପ୍ରାୟ ୯.୩୬ ରେ ପ୍ରାୟ ୭୫ ବର୍ଷ ବୟସର ଜଣେ ବୃଦ୍ଧ ମହିଳା ଲକ୍ଷ୍ମୀସାଗର ଯାତ୍ରୀ ନିବାସ ପାଖରେ ଅସହାୟ ଅବସ୍ଥାରେ ବୁଲୁଥିବା ସମୟରେ ପିସିଆର –୯ ଟିମ ତାଙ୍କୁ ଉଦ୍ଧାର କରି ରଙ୍ଗବଜାରସ୍ଥିତ ଏକାମ୍ର ନୀଳୟ ଆଶ୍ରମକୁ ସ୍ଥାନାନ୍ତରିତ କରିଥିଲେ।
୨. ଗତ ତା ୦୭.୧୨. ୨୦୨୧ ରିଖ ଦିନ ବେଳେ ERSS -112 କଣ୍ଟ୍ରୋଲ ରୁମ ମାଧ୍ୟମରେ ସୂଚନା ପାଇ ପିସିଆର-୩୨ ଟିମ ଯାଁଳା ଜନ ସ୍ଵାସ୍ଥ୍ୟ କେନ୍ଦ୍ରରେ ଆହତ ଅବସ୍ଥାରେ ଥିବା ଜଣେ ମାନସିକ ସ୍ତରରେ ଅସୁସ୍ଥ ମହିଳାଙ୍କୁ ଚିକିତ୍ସା ପରେ “ଆଶା କିରଣ ” ଅନୁଷ୍ଠାନକୁ ଥଇଥାନ ନିମନ୍ତେ ସ୍ଥାନାନ୍ତରିତ କରିଥିଲେ।
୩. ଗତ ତା ୧୯.୧୨.୨୦୨୧ ରେ ରାତିରେ ସୂଚନା ପାଇ ପିସିଆର୍-୩୫ ଟିମ ଭରତପୁର ମାଛ ବଜାରରେ ମାରଣାସ୍ତ୍ର ଦେଖାଇ ଭୟ ସୃଷ୍ଟି କରୁଥିବା ଦୁଇ ଜଣ ବ୍ୟକ୍ତିଙ୍କୁ କାବୁ କରି ଭରତପୁର ଥାନାକୁ ଆଣିଥିଲେ ।
୪. ଗତ ତା ୨୦.୧୨.୨୦୨୧ ରେ ପିସି ଆର୍ -୭ ଟିମ୍ ପଳାସୁଣି ହାଟ ରୁ ଜଣେ ସ୍ତ୍ରୀ ଲୋକଠୁ ସୁନା ଚେନ୍ ଲୁଟ କରିବାକୁ ଉଦ୍ୟମ କରି ଖସି ପଳାଇବା କୁ ଚେଷ୍ଟା କରୁଥିବା ଲୁଟେରା କୁ ଧରି ଥାନାରେ ହାଜର କରିଥିଲେ।
୫. ଗତ ତା ୨୭.୧୨.୨୦୨୧ ରାତିରେ ପିସିଆର୍-୨ ଟିମ ୟୁନିଟ – ୨ ବାଳିକା ବିଦ୍ୟାଳୟ ନିକଟରେ ପେଟ୍ରଲିଙ୍ଗ କରୁଥିବା ସମୟରେ ଡଷ୍ଟବିନ୍ ରେ ପଡ଼ିଥିବା ଏକ ୫ ରୁ ୬ ଦିନର ସଦ୍ୟଜାତ ଶିଶୁକୁ ଉଦ୍ଧାର କରି ଚିକିତ୍ସା ପାଇଁ କ୍ୟାପିଟାଲ ହସ୍ପିଟାଲ କୁ ନେଇଥିଲେ।
