ଶତାୟୁ ବୃଦ୍ଧାଙ୍କୁ ଦିଅଁ ଦର୍ଶନ କରାଇଲେ ପୋଲିସ କର୍ମଚାରୀ
ପୁରୀ: ଶ୍ରୀଜିଉଙ୍କ ନବଯୌବନ ଦର୍ଶନ ବେଳେ ପୁରୀରେ ଏକ ନିଆରା ଦୃଶ୍ୟ ଦେଖିବାକୁ ମିଳିଥିଲା । ଜଣେ ଶତାୟୁ ବୃଦ୍ଧାଙ୍କୁ ହାତରେ ଟେକି ଟେକି ନେଇ ଦିଅଁ ଦର୍ଶନ କରାଇଥିଲେ ଜଣେ ପୋଲିସ କର୍ମଚାରୀ । ବୃଦ୍ଧା ଜଣକ ଚାଲି ପାରୁନଥିଲେ । ତେଣୁ ଶ୍ରୀମନ୍ଦିର ଭିତରକୁ ବୃଦ୍ଧାଙ୍କୁ ହାତରେ ଟେକି ଟେକି ନେଇ ଦିଅଁ ଦର୍ଶନ କରାଇଥିଲେ ପୋଲିସ କର୍ମଚାରୀ । ପ୍ରବଳ ଭିଡ଼ ଭିତରେ ମହାପ୍ରଭୁଙ୍କୁ ଦର୍ଶନ କରିବାର ସୁଯୋଗ ପାଇଥିବାରୁ ବେଶ୍ ସନ୍ତୋଷ ପ୍ରକାଶ କରିଥିଲେ ବୃଦ୍ଧା ।
ଦର୍ଶନ କରି ଆତ୍ମାଶାନ୍ତି ହୋଇଛି ବୋଲି ସେ କହିଛନ୍ତି । ଜଗତ କଲ୍ୟାଣ ପାଇଁ ସେ ମହାପ୍ରଭୁଙ୍କ ନିକଟରେ ପ୍ରାର୍ଥନା କରିଥିଲେ । ପୁଅ ଭଳି ପୋଲିସ କର୍ମଚାରୀ ଜଣକ ତାଙ୍କୁ ସାହାଯ୍ୟ କରିଥିବାରୁ କଲ୍ୟାଣ ଅଜାଡ଼ି ଦେଇଥିଲେ ବୃଦ୍ଧା । ପୋଲିସ କର୍ମଚାରୀଙ୍କ ଏଭଳି ସେବା ମନୋବୃତ୍ତିକୁ ସବୁ ଆଡୁ ପ୍ରଶଂସା କରାଯାଉଛି ।
