ପୁରୀ: ସରିଗଲା ପ୍ରତୀକ୍ଷା, ହେଲେ ସରିଲାନି ସସପେନ୍ସ । ଅନେକ ପ୍ରଶ୍ନ ଦେଇଗଲେ ବଳଙ୍ଗା ପୀଡ଼ିତା । ବଳଙ୍ଗା ନୂଆ ଗୋପାଳପୁରରୁ ଭୁବନେଶ୍ବର, ଭୁବନେଶ୍ବରରୁ ଦିଲ୍ଲୀ । ଦିଲ୍ଲୀରୁ ପୁଣି ଜନ୍ମମାଟି । ଏହା ଥିଲା ପୀଡ଼ିତାଙ୍କକ ଜୀବନ ମରଣର ସଂଗ୍ରାମ । ବାଲେଶ୍ବର ଏଫଏମ କଲେଜ ଛାତ୍ରୀ ମୃତ୍ୟୁ ଘଟଣା ପରେ ବଳଙ୍ଗା ପୀଡ଼ିତାଙ୍କ ମୃତ୍ୟୁ ଯେତିକି ଦୁଃଖ ଆଣିଛି ତାଠାରୁ ଅଧିକ ସୃଷ୍ଟି କରିଛି ପ୍ରଶ୍ନବାଚୀ । ଦିଲ୍ଲୀ ଏମ୍ସରେ ପୀଡ଼ିତାଙ୍କ ଶବ ବ୍ୟବଚ୍ଛେଦ ହେବା ପରେ ବିମାନରେ ଭୁବନେଶ୍ବର ଅଣଯାଇଥିଲା । ସେଠାରୁ ମରଶରୀରକୁ ନିଆଯାଇଥିଲା ଜନ୍ମମାଟି । ଏବେ ବି ସ୍ପଷ୍ଟ ହୋଇପାରିନି ପୀଡ଼ିତାଙ୍କ ମୃତ୍ୟୁର ରହସ୍ୟ।
ବଳଙ୍ଗା ଘଟଣାକୁ ନେଇ ରାଜ୍ୟ ସରକାରଙ୍କୁ ବିରୋଧୀ କରୁଛନ୍ତି ଟାର୍ଗେଟ । ଏପରିକି ଏହା ଆତ୍ମହତ୍ୟା ନୁହେଁ ବରଂ ଏକ ହତ୍ୟାକାଣ୍ଡ ବୋଲି ଅଭିଯୋଗ କରିଛନ୍ତି ବିରୋଧୀ । ଉପ ମୁଖ୍ୟମନ୍ତ୍ରୀ, ଓଡିଶା ପୋଲିସ ଓ ନାବାଳିକାଙ୍କ ବାପାଙ୍କ ବୟାନ କିପରି ଏକ ହୋଇଥିଲା ବୋଲି ପ୍ରଶ୍ନ କରିଛନ୍ତି ବିରୋଧୀ। ଏପରିକି ବିଜେପି ଅଫିସରେ ସ୍କ୍ରିପ୍ଟ ଲେଖା ହୋଇ ଅଣାଯାଇନିତ ବୋଲି ପ୍ରଶ୍ନ କରିଥିଲେ ବିରୋଧୀ। ସେହିପରି ମୃତ୍ୟୁ ପରେ ପରେ ପୋଲିସର ତରବରିଆ ଟୁଇଟ ବି ସୃଷ୍ଟି କରିଛି ସନ୍ଦେହର ବଳୟ । ଓଡ଼ିଶା ପୁଲିସ ସାମାଜିକ ଗଣମାଧ୍ୟମ ‘ଏକ୍ସ’ରେ ଦେଇଥିବା ସୂଚନାକୁ ନେଇ ଆଲୋଡ଼ନ ସୃଷ୍ଟି ହୋଇଛି। ପୁଲିସ ପକ୍ଷରୁ ସୂଚନା ଦିଆଯାଇଛି ଯେ ବଳଙ୍ଗା ଘଟଣାରେ ପୀଡ଼ିତାଙ୍କ ମୃତ୍ୟୁ ଖବର ଶୁଣି ଆମେ ଅତ୍ୟନ୍ତ ଦୁଃଖିତ। ଏହି ଘଟଣାରେ ପୁଲିସ ପକ୍ଷରୁ ନିଷ୍ଠାର ସହ ତଦନ୍ତ କରାଯାଇଛି। ତଦନ୍ତ ଶେଷ ପର୍ଯ୍ୟାୟରେ ପହଞ୍ଚି ସାରିଛି। ବର୍ତ୍ତମାନ ପର୍ଯ୍ୟନ୍ତ ହୋଇଥିବା ତଦନ୍ତ ଅନୁଯାୟୀ ଅନ୍ୟ କୌଣସି ବ୍ୟକ୍ତିଙ୍କ ସମ୍ପୃକ୍ତି ନ ଥିବା ସ୍ପଷ୍ଟ ହୋଇଛି। ଏଣୁ ସମସ୍ତଙ୍କୁ ଅନୁରୋଧ,ଏହି ଦୁଃଖଦ ମୁହୂର୍ତ୍ତରେ ଏ ସମ୍ବନ୍ଧୀୟ କୌଣସି ସମ୍ବେଦନଶୀଳ ମନ୍ତବ୍ୟ ଦିଅନ୍ତୁ ନାହିଁ। ଏଥିରୁ ଗୋଟିଏ କଥା ସ୍ପଷ୍ଟ ହେଉଛି, ନାବାଳିକା ପୋଡ଼ି ଘଟଣାରେ କାହାର ସମ୍ପୃକ୍ତି ନାହିଁ। ଯେଉଁ ତିନିଜଣ ଅଭିଯୁକ୍ତଙ୍କ କଥା କୁହାଯାଉଥିଲା ତାହା ମିଛ। ତେବେ ଅଭିଯୁକ୍ତ କିଏ ? ପୀଡ଼ିତା କ’ଣ ଆତ୍ମହତ୍ୟା ଉଦ୍ୟମ କରିଥିଲେ, ନା କେହି ତାଙ୍କୁ ଆତ୍ମହତ୍ୟା କରିବାକୁ ବାଧ୍ୟ କରିଥିଲା? ତଦନ୍ତର ଶେଷ ପର୍ଯ୍ୟାୟରେ ଏହି ସବୁ ଲୋକଙ୍କୁ ପୁଲିସ ଖୋଜିବ ବୋଲି ଆଶା କରାଯାଉଛି ।
