ଭୁବନେଶ୍ୱର : ରାଜରାସ୍ତାରେ ପୋଲିସର ଦାଦାଗିରି । ଟ୍ରାଫିକ ଓ ପାର୍କିଂ ନିୟମର ପାଠ ପଢାଇ ଜୋର ଜବରଦସ୍ତ କରୁଛି ଚାନ୍ଦା ଆଦାୟ। ପାର୍କିଂରେ ଗାଡି ଥିଲେ ବି ଜୋର୍ କରି ଚାଲାଣ କାଟି ନେଉଛନ୍ତି ଫାଇନ। ଏଭଳି ସାଂଘାତିକ ଅଭିଯୋଗ କରି ନିଖିଳ ଓଡିଶା ମିନିଟ୍ରକ ମାଲିକ ମହାସଂଘ କରିଛି ସାମ୍ବାଦିକି ସମ୍ମିଳନୀ।
ଗତ ୩ ତାରିଖରେ ଦେବାଶିଶ ମିଶ୍ରଙ୍କ ଗାଡି ୮ ଲକ୍ଷ ଟଙ୍କାର ସାମଗ୍ରୀ ନେଇ ବ୍ରହ୍ମପୁର ୟାଇଥିଲା। ବ୍ରହ୍ମପୁରରେ ଟ୍ରାଫିକ ପୋଲିସ ବେଆଇନ ପାର୍କିଂ ଦର୍ଶାଇ ୧୫ଶହ ଟଙ୍କାର କାଟିଛି ଚାଲାଣ। କିନ୍ତୁ ଗାଡିଟି ମୁଖ୍ଯ ରାସ୍ତା ନୁହେଁ ଗୋଟିଏ ଖୋଳପଡିଆରେ ହୋଇଥିଲା ପାର୍କି। ପ୍ରଥମେ ୫ଶହ ଟଙ୍କା ପୋଲିସ ମାଗିଲେ। ଟଙ୍କା ଦେବାକୁ ମନା କରିବାରୁ ପିସିଆର ଭ୍ଯାନରେ ଡ୍ରାଇଭରକୁ ଜୋର କରି ଉଠେଇ ନେଇ ଚାଲାଣ କାଟିଥିଲେ। ଏହାକୁ ମାଲିକ ଜଣକ ଥାନା ସହ ଯୋଗାଯୋଗ କରିବାରୁ ଥାନାଅଧିକାରୀ ଏ ବିଷୟରେ ଅବଗତ ନଥିବା ସ୍ପଷ୍ଟୀକରଣ ରଖିଥିଲେ ବୋଲି ଗାଡି ମାଲିକ କହିଛନ୍ତି।
କିଛି ପୋଲିସ କର୍ମଚାରୀ ହାତଗୁଞ୍ଜା ନେଇ ପିତାପଲ୍ଲୀ ଠାରେ ଗାଡି ଛାଡୁଛନ୍ତି ବୋଲି ଗୁରୁତର ଅଭିଯୋଗ କରିବା ସହ ମୋବାଇଲରେ ଭିଡିଓ ରେକର୍ଡିଂ କରିଛି ନିଖିଳ ଓଡିଶା ମିନିଟ୍ରକ ମାଲିକ ମହାସଂଘ। ପୋଲିସର ଏଭଳି ଆଚରଣ ପାଇଁ ସଂଘ ରାସ୍ତାକୁ ଓହ୍ଲାଇବ ବୋଲି ଚେତାବନୀ ଦିଆଯାଇଛି।
