ନନ୍ଦିଘୋଷ ଟିଭି ପ୍ରଭାବ: ଆକ୍ସନ ମୋଡରେ ଅବକାରୀ ଓ ପୋଲିସ, ୩୦ ଲକ୍ଷରୁ ଊର୍ଦ୍ଧ୍ୱ ଟଙ୍କାର ମଦ ଓ ପୋଚ ଜବତ

ବାଲେଶ୍ୱର: ଆକ୍ସନ ମୋଡରେ ବାଲେଶ୍ୱର ଅବକାରୀ ଓ ପୋଲିସ୍ । ନନ୍ଦିଘୋଷ ଟିଭିରେ ଚୋରା ଦେଶୀମଦ କାରବାର ନେଇ ରିପୋର୍ଟ ପ୍ରକାଶ ପାଇବା ବିଭିନ୍ନ ସ୍ଥାନରେ ମିଳିତ ଚଢାଉ । ୫ ଜଣ ଅଭିଯୁକ୍ତଙ୍କୁ ଗିରଫ କରାଯିବା ସହିତ ୩୦ଲକ୍ଷ ଟଙ୍କାର ପୋଚ ଓ ଦେଶୀମଦ ଜବତ କରାଯାଇଛି । ଏହି ଚଡ଼ାଉରେ ୫ପ୍ଲାଟୁନ ଫୋର୍ସ ସହିତ ଶହେରୁ ଅଧିକ କର୍ମଚାରୀ ନିୟୋଜିତ ଥିଲେ ।

ପୋଖରୀ ଭିତରୁ ବାହାରିଲା ଡ୍ରମ ଭରା ପୋଚ । ଗାତ ଭିତରୁ ଶହ ଶହ ଡ୍ରମ  ଉଦ୍ଧାର । ଘର ଭିତରେ ଅଣ୍ଡରଗ୍ରାଉଣ୍ଡ କରି ରଖାଯାଇଛି ରନ୍ଧା ମଦ । ଚଢାଉବେଳେ ମିଳିଛି ଏସବୁ ଚୋରା ମଦ । ମଦରନ୍ଧା ସାମଗ୍ରୀ ଜବତ ପରେ ମଦ ରନ୍ଧା ଘରକୁ ମଧ୍ୟ ଭାଙ୍ଗି ଦେଇଛି ପୋଲିସ । ବାଲେଶ୍ୱରରେ ଚୋରା ମଦ କାରବାର ନେଇ ଖବର ପ୍ରସାରଣ ପରେ ଆକ୍ସନ ମୋଡକୁ ଆସିଛି ଅବକାରୀ ଓ ପୋଲିସ୍ ।  ପୁରୁଣା ବାଲେଶ୍ୱର ଗାଁରେ ଚଢାଉ କରିଛି ମିଳିତ ଟିମ୍ । ଟିମର ଏପରି ଆକ୍ସନ ପରେ ସ୍ୱାଗତ କରିଛନ୍ତି ବୁଦ୍ଧିଜୀବୀ ।

ସକାଳ ଠାରୁ ଆରମ୍ଭ ହୋଇଥିବା ଏହି ଚଡ଼ାଉ ୬ ଘଣ୍ଟା ଧରି ଚାଲିଥିଲା । ୩ ଜଣ ଡିଏସ୍‌ପିଙ୍କ ନେତୃତ୍ୱରେ ୩ଜଣ ଇନ୍ସପେକ୍ଟର, ୨ଜଣ ସବ୍‌-ଇନ୍ସପେକ୍ଟର, ୫ ପ୍ଲାଟୁନ ଫୋର୍ସ ଚଡ଼ାଉରେ ସାମିଲ ହୋଇଥିଲେ । ଚୋରା ମଦ ଜବତ କରାଯାଇ ନଷ୍ଟ କରାଯିବା ସହ ମାମଲାରେ ୫ ଜଣ ଅଭିଯୁକ୍ତଙ୍କୁ ଗିରଫ କରାଯାଇଛି । ୩୦ ଲକ୍ଷରୁ ଅଧିକ ଟଙ୍କାର ମଦ ଓ ପୋଚ ଜବତ କରାଯାଇଛି । ନିୟମିତ ବ୍ୟବଧାନରେ ଏପରି ଚଢାଉ ଜାରି ରହିବ ବୋଲି ଏସ୍‌ପି ସୂଚନା ଦେଇଛନ୍ତି । ଏହି ଗାଁର ପ୍ରାୟ ସମସ୍ତ ଲୋକେ ଦେଶୀମଦ ରାନ୍ଧି ଜିଲ୍ଲାର ବିଭିନ୍ନ ସ୍ଥାନକୁ ଚୋରା ଚାଲାଣ କରିଥାନ୍ତି । ଏହା ସମସ୍ତଙ୍କୁ ଜଣାଥିଲେ ସୁଦ୍ଧା ଆଗରୁ କାହିଁକି ରୋକା ଯାଇନାହିଁ ତାକୁ ନେଇ ସୃଷ୍ଟି ହୋଇଛି ପ୍ରଶ୍ନବାଚୀ ।