ଆଗେଇ ଚାଲିଛି ପୋଲାଭରମ ପ୍ରକଳ୍ପ, ହାତ ଟେକିଦେଇଛନ୍ତି ରାଜ୍ୟ ସରକାର

ଭୁବନେଶ୍ୱର : ପୋଲାଭରମ ପ୍ରସଙ୍ଗକୁ ନେଇ ପୁଣି ହରଡ଼ଘଣାରେ ରାଜ୍ୟ ବିଜେପି ସରକାର। ପ୍ରକଳ୍ପ ଦ୍ୱାରା ଆନ୍ଧ୍ର ଲାଭବାନ ହେବାକୁ ଥିବା ବେଳେ ଯେଉଁ କିଛି ଅଞ୍ଚଳ ପ୍ରଭାବିତ ହେବ ସେମାନଙ୍କ ପାଇଁ ମଧ୍ୟ ଚିନ୍ତା କରୁଛନ୍ତି ଆନ୍ଧ୍ର ସରକାର। ପ୍ରଭାବିତ ହେବାକୁ ଥିବା ଆନ୍ଧ୍ରର ୯ ଟି ଗ୍ରାମରେ ଗ୍ରାମସଭା ହୋଇଛି। ଜମି ଅଧିଗ୍ରହଣ ତଥା ଥଇଥାନ ପାଇଁ ପ୍ରକଳ୍ପ ଦ୍ୱାରା ପ୍ରଭାବିତ ହେବାକୁ ଥିବା ପରିବାରଙ୍କ ସହମତି ନିଆଯିବ। ସେମାନଙ୍କ ସୁବିଧା ପାଇ ମତାମତ ନିଆଯାଇଛି। ସର୍ବାଧିକ କ୍ଷତି ସହିବାକୁ ଥିବା ଓଡିଶାର ଆଦିବାସୀ ମାନେ କିନ୍ତୁ କେବେ ବୁଡିବେ ତାକୁ ଅପେକ୍ଷା କରିଛନ୍ତି। ଓଡିଶାର କୌଣସି ଲାଭ ହେବ ନାହିଁ। ହଜାର ହଜାର ଆଦିବାସୀ କ୍ଷତିଗ୍ରସ୍ତ ହେବା ସହ ବହୁ ଜଙ୍ଗଲ ଜମି ଓ ଆଦିବାସୀ ଅଞ୍ଚଳ ବୁଡିଯିବ। ନା ହେଉଛି ଗ୍ରାମସଭା ନା କୌଣସି ସର୍ଭେ। ଯାହାକୁ ନେଇ ଆମ ଜନତା ଅଧିକାର ସରକାରଙ୍କ ଉପରେ ବର୍ଷିଛି। ଆନ୍ଧ୍ର ନିଜ ଲୋକଙ୍କ ପାଇଁ କେତେ ତତ୍ପର ତାହା ସ୍ପଷ୍ଟ ହେଉଛି। ହେଲେ ରାଜ୍ଯ ସରକାର ଶୋଇଛନ୍ତି। ଆନ୍ଧ୍ର ରାଜନୈତିକ ବାର୍ଗେନ କରୁଛି କିନ୍ତୁ ଓଡିଶା ସରକାର ଚୁପ। ଓଡିଶା ବିଜେପି ସରକାର ଓ ୨୦ ବିଜେପି ସାଂସଦଙ୍କୁ ଇତିହାସ କେବେ କ୍ଷମା ଦେବ ନାହିଁ ବୋଲି କୁହାଯାଇଛି। ଏ ପ୍ରସଙ୍ଗରେ ଆମ ଜନତା ଅଧିକାର ପକ୍ଷରୁ କରାଯାଉଥିବା କ୍ଷୟକ୍ଷତି ସମ୍ପର୍କିତ ସର୍ଭେର କାମ ୮୦ ପ୍ରତିଶତ ସରିଛି। ସର୍ଭେ ଶେଷ ହୋଇ ସମ୍ପୂର୍ଣ୍ଣ ତଥ୍ୟ ସଂଗ୍ରହ ପରେ ସଂଗଠନର ପ୍ରତିନିଧି ଦଳ ସରକାରଙ୍କ ସହ ରାଷ୍ଟ୍ରପତିଙ୍କ ନିକଟରେ ବିଧିବଦ୍ଧ ଦାବି ସହ ମାଲକାନଗିରି ବାସୀଙ୍କ ସୁରକ୍ଷା ପାଇଁ ଲଢେଇ ଜୋରଦାର କରିବେ।

ସେପଟେ ରାଜନୈତିକ ଦଳଗୁଡିକ ମଧ୍ୟ ସରକାରଙ୍କୁ କଡା ନିନ୍ଦା କରିଛନ୍ତି। ଓଡ଼ିଶା ମୁଖ୍ୟମନ୍ତ୍ରୀ ଆଦିବାସୀ। ମାଲକାନଗିରି ଜିଲ୍ଲାର ଆଦିବାସୀ ମାନେ ପୋଲାଭରମ ପ୍ରକଳ୍ପ ଦ୍ବାରା ବ୍ୟାପକ କ୍ଷତିଗ୍ରସ୍ତ ହେବେ। କିନ୍ତୁ ଏ ଯାଏ ସେଠାରେ ପଲ୍ଲୀସଭା, ଗ୍ରାମସଭା ହୋଇନାହିଁ। ବିଧାନସଭାରେ ମଧ୍ୟ ଏ କଥା ଉଠାଯାଇଥିଲା। କିନ୍ତୁ ସରକାର ନିରବ ରହିଲେ। କେନ୍ଦ୍ରରେ ବିଜେପି ସରକାର ଆନ୍ଧ୍ରକୁ ଅହେତୁକ ଅନୁକମ୍ପା ଦେଖାଉଛନ୍ତି। କିନ୍ତୁ ଓଡ଼ିଶାର ଆଦିବାସୀଙ୍କ ସୁରକ୍ଷା ପାଇଁ ରାଜ୍ୟ ବିଜେପି ସରକାରର ଆଦୌ ଚିନ୍ତା ନାହିଁ। କେନ୍ଦ୍ରର ଚାପରେ ଚୁପ ରହିଛି ଓଡିଶା ବିଜେପି ସରକାର। ମାଲକାନଗିରିର ୧୬୩ ଆଦିବାସୀ ଗାଁ ଜଳମଗ୍ନ ହେବ, ତିନି ଚାରୋଟି ନଦୀର ଜଳ ମଧ୍ୟ ନିଷ୍କାସିତ ହେବ ନାହିଁ। ଆଦିବାସୀ ମାନେ ତ୍ରାହି ତ୍ରାହି ଡାକିଲେଣି। କିନ୍ତୁ ବିଜେପି ସରକାର କେନ୍ଦ୍ର ଚାପରେ କାହିଁକି ଚୁପ ବୋଲି ପ୍ରଶ୍ନ କରିଛନ୍ତି କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡାମ। କଂଗ୍ରେସ ଆଦିବାସୀଙ୍କ ସୁରକ୍ଷା ପାଇଁ ଦୁର୍ବାର ଆନ୍ଦୋଳନ କରିବ ବୋଲି ଚେତାଇ ଦେଇଛନ୍ତି କାଡାମ। ସେପଟେ ସିପିଆଇଏମଏଲର କହିବା କଥା ପୂର୍ବ ସରକାର ସମୟରେ ଯେଭଳି ସ୍ୱର ଉତ୍ତୋଳନ ହେଉଥିଲା ଏବେ ତାହା ନାହିଁ। ପୋଲାଭରମ ପ୍ରସଙ୍ଗରେ ଆଦିବାସୀଙ୍କର ଏକ ବଡ଼ ସଂଗ୍ରାମ ହେବ। ୨୦୨୭ ସୁଦ୍ଧା ପୋଲାଭରମ ପ୍ରକଳ୍ପକୁ କାର୍ଯ୍ୟକ୍ଷମ କରିବାକୁ ସବୁ ଶକ୍ତି ଖଟାଇ ଲାଗି ପଡ଼ିଛନ୍ତି ଆନ୍ଧ୍ର ସରକାର। କେନ୍ଦ୍ରର ବିଜେପି ସରକାର ମଧ୍ୟ ଆନ୍ଧ୍ର ପାଇଁ ନିଜର ପେଡି ଖୋଲି ଦେଇଛନ୍ତି। କିନ୍ତୁ ଓଡ଼ିଶାର ଡବଲ ଇଞ୍ଜିନ ସରକାର କିନ୍ତୁ ଆଦିବାସୀଙ୍କ ସ୍ୱାର୍ଥ ସୁରକ୍ଷା ତ ଦୂରର କଥା ପୋଲାଭରମ ଯୋଗୁ କେତେ କ୍ଷୟକ୍ଷତି ହେବ ତାର ଆକଳନ ବି କରୁ ନାହାନ୍ତି।