ସାଂସଦଙ୍କ ଲାଗି ଗଙ୍ଗା, ଯମୁନା ଓ ସରସ୍ୱତୀ ବହୁତଳ ବିଶିଷ୍ଟ ପ୍ରାସାଦ ଉଦଘାଟିତ

ନୂଆଦିଲ୍ଲୀ: ସାଂସଦଙ୍କ ଲାଗି ନୂଆ ବଙ୍ଗଳା । ଦିଲ୍ଲୀର ଡା. ବିଡି ମାର୍ଗରେ ସାଂସଦଙ୍କ ଲାଗି ବହୁତଳ ବିଶିଷ୍ଟ ପ୍ରାସାଦକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଉଦଘାଟନ କରିଛନ୍ତି । ବହୁତଳ ବିଶିଷ୍ଟ ବିଲ୍ଡିଂ ଉଦଘାଟନୀ ସମାରୋହରେ ଲୋକସଭା ଅଧ୍ୟକ୍ଷ ଓମ୍ ବିର୍ଲା ଉପସ୍ଥିତ ଥିଲେ । ଓମ୍ ବିର୍ଲା କହିଛନ୍ତି- ବିଡି ମାର୍ଗରେ ନିର୍ମିତ କୋଠା ତିନୋଟି ଟାୱାରରେ ନିର୍ମିତ । ଏହି କୋଠାର ନାମ ଗଙ୍ଗା, ଯମୁନା ଓ ସରସ୍ୱତୀ ରଖାଯାଇଛି । ଏହି ବହୁତଳ ବିଶିଷ୍ଟ ପ୍ରାସାଦ ନିର୍ମାଣ ଲାଗି ୧୭ ମାସ ସମୟ ଲାଗିଥିବା ବେଳେ ୧୮୮ କୋଟି ଟଙ୍କା ଖର୍ଚ୍ଚ କରାଯାଇଛି ।

କଣ କହିଲେ ମୋଦି ?

• ୨୦୧୪ରେ ପରିବର୍ତ୍ତନ ଆରମ୍ଭ ହୋଇଥିଲା । ଦେଶ ଏକ ନୂଆ ଲକ୍ଷ୍ୟ ନେଇ ଆଗକୁ ବଢ଼ିଥିଲା, ପରିବର୍ତ୍ତନ ଆଡ଼କୁ ।
• ଆମ ଲୋକସଭା, ରାଜ୍ୟସଭା ଉଭୟ ଗୃହର ସାଂସଦ ଏକ ନୂଆ ସ୍ଥାନ ପାଇଛନ୍ତି ।
• ଚଳିତଥର ଲୋକସଭାକୁ ସବୁଠୁ ଅଧିକ ମହିଳା ସାଂସଦ ନିର୍ବାଚିତ ହୋଇ ରେକର୍ଡ ସୃଷ୍ଟି କରିଛନ୍ତି । ଦେଶର ନୂଆ ରୂପ ସଂସଦର ଗଠନରେ ଦେଖାଯାଏ । ଦେଶର କାର୍ଯ୍ୟପ୍ରଣାଳୀରେ ଗଭର୍ଣ୍ଣାସ ଏକ ନୂଆ ଚିନ୍ତାଧାରା ଓ ପ୍ରଣାଳୀ ଆଡ଼କୁ ଯାଇଛି ।
• ଷୋଡ଼ଶ ଲୋକସଭାରେ ୬୦ ପ୍ରତିଶତ ବିଲ୍ ପାସ ଲାଗି ପ୍ରାୟତଃ ୨ରୁ ୩ ଘଣ୍ଟା ବିତର୍କ ହୋଇଛି । ଗତ ସଂସଦ ଅଧିବେଶନରେ ଅଧିକ ବିଲ୍ ପାସ୍ କରାଯାଇଥିଲା । କିନ୍ତୁ, ପୂର୍ବାପେକ୍ଷା ଅଧିକ ବିତର୍କ ହୋଇଛି ।