ଏୟାରପୋର୍ଟରେ ଧାରଣାରେ ବସିଲେ ପ୍ରଧାନମନ୍ତ୍ରୀ ମୋଦିଙ୍କ ଭାଇ

ଲକ୍ଷ୍ନୌ: ଉତ୍ତରପ୍ରଦେଶର ଲକ୍ଷ୍ନୌ ଏୟାରପୋର୍ଟରେ ଅନଶନରେ ବସିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଭାଇ ପ୍ରହ୍ଲାଦ ମୋଦି । ହେଲେ ପରବର୍ତ୍ତୀ ସମୟରେ ଦାବି ପୂରଣ ହେବା ପରେ ସେ ଅନଶନରୁ ଓହରିଥିଲେ। ତାଙ୍କ କହିବାନୁଯାୟୀ ବିମାନବନ୍ଦରରେ ତାଙ୍କ ସ୍ୱାଗତ ପାଇଁ ଆସିଥିବା ସମର୍ଥକଙ୍କୁ ଗିରଫ କରାଯାଇଥିଲା । ଯେଉଁଥିପାଇଁ ସେ ପ୍ରତିବାଦରେ ବସିଥିଲେ।

ତାଙ୍କ କହିବାନୁଯାୟୀ ସାମାଜିକ କାର୍ଯ୍ୟକ୍ରମ ଲାଗି ସେ ଉତ୍ତରପ୍ରଦେଶ ଆସିଥିଲେ । ଆଉ ସେଠାରୁ ତାଙ୍କୁ ପ୍ରୟାଗରାଜ, ପ୍ରତାପଗଡ, ସୁଲତାନପୁର ଓ ଜୋନପୁର ଯିବାର ଥିଲା । ହେଲେ ମୋତେ ନେବା ପାଇଁ ଯେଉଁମାନେ ଆସିଥିଲେ, ସେମାନଙ୍କୁ ଲକ୍ଷ୍ନୌ ପୋଲିସ ଗିରଫ କରି ନେଇଥିଲେ ।

ଏହି ଘଟଣା ମୋତେ ମର୍ମାହତ କରିଥିବା ବେଳେ ଲାଗିଲା ଯେ ମୋ ଛୁଆ ମାନେ ଜେଲରେ ଥିବା ବେଳେ ମୁଁ କେମିତି ମୁକ୍ତ ହୋଇ ରହିପାରିବି । ଯେଉଁଥିପାଇଁ ବୁଧବାର ଦିନ ମୁଁ ଏଠାରେ ଅନଶନରେ ବସିବା ସହ ଅନ୍ନ ଜଳ ତ୍ୟାଗ କରିଥିଲି ।

ତେବେ ଏ ଘଟଣା ସମ୍ପର୍କରେ ଯେତେବେଳେ ମୁଁ ପୋଲିସ ଅଧିକାରୀଙ୍କୁ ପଚାରିଲି, ସେମାନେ କହିଥିଲେ ଏଥିପାଇଁ ପିଏମଓଙ୍କ ନିର୍ଦ୍ଦେଶ ରହିଛି । ଯାହା ପରେ ମୁଁ ସେହି ଅର୍ଡର ଦେଖିବାକୁ ମାଗିଥିଲେ ମଧ୍ୟ ପୋଲିସ ପକ୍ଷରୁ ମୋତେ କୌଣସି କପି ଦିଆଯାଇନଥିଲା ।

ଅପରପକ୍ଷରେ ତାଙ୍କ ସମର୍ଥକ ମାନଙ୍କୁ  ୧୪୪ ଧାରା ଅଧିନରେ ଗିରଫ କରାଯାଇଥିବା ଜଣାପଡିଛି । ଆହୁରି ମଧ୍ୟ ପ୍ରହ୍ଲାଦ ଦେଶର ପ୍ରଧାନମନ୍ତ୍ରୀ ମୋଦିଙ୍କ ଭାଇ ହୋଇଥିବାରୁ ତାଙ୍କୁ ବଦନାମ କରିବା ପାଇଁ ଏଭଳି କରାଯାଇଥିବା ସେ ଅଭିଯୋଗ କରିଛନ୍ତି ।