ବାଇଡେନ-ମୋଦି ଆଲୋଚନାରେ ବୁଚା ଗଣହତ୍ୟା

ନୂଆଦିଲ୍ଲୀ: ଆମେରିକା ରାଷ୍ଟ୍ରପତି ଜୋ ବାଇଡେନ ଓ ଭାରତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ମଧ୍ୟରେ ହୋଇଛି ହାଇପ୍ରୋଫାଇଲ ଆଲୋଚନା । ସ୍ଥାନ ପାଇଛି ପ୍ରତିରକ୍ଷା, ଋଷ-ୟୁକ୍ରେନ ଯୁଦ୍ଧ ସମେତ ଅନେକ ପ୍ରସଙ୍ଗ । ବିଶେଷ କରି ୟୁକ୍ରେନର ବୁଚା ସହରରେ ହୋଇଥିବା ଗଣହତ୍ୟାକୁ ନେଇ ଦୁଇ ରାଷ୍ଟ୍ରମୁଖ୍ୟଙ୍କ ମଧ୍ୟରେ ଗୁରୁତ୍ବପୂର୍ଣ୍ଣ ଆଲୋଚନା ହୋଇଥିଲା । ବୁଚା ସହରରେ ଗଣହତ୍ୟା ପ୍ରସଙ୍ଗରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଚିନ୍ତା ବ୍ୟକ୍ତ କରିଛନ୍ତି ।

ସେପଟେ ଭାରତ-ଆମେରିକା ଟୁ ପ୍ଲସ ଟୁ ବୈଠକ ଆଜି ଓ୍ବାସିଂଟନରେ ଆରମ୍ଭ ହେଉଛି । ବୈଠକରେ ଯୋଗ ଦେବେ ବୈଦେଶିକ ବ୍ୟାପାର ମନ୍ତ୍ରୀ ଏସ. ଜୟଶଙ୍କର ଓ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ । ଟୁ ପ୍ଲସ ଟୁ ବୈଠକ ପୂର୍ବରୁ ରାଜନାଥ ସିଂହ ଆମେରିକୀୟ ଏରୋସ୍ପେସ ଓ ପ୍ରତିରକ୍ଷା କଂପାନୀ ବୋଇଂ ଏବଂ ରେଥିଓନର ବରିଷ୍ଠ ଅଧିକାରୀଙ୍କ ସହ ଆଲୋଚନା କରିଛନ୍ତି । ବାଇଡେନ ପ୍ରଶାସନ ଅମଳରେ ପ୍ରଥମ ଥର ପାଇଁ ଟୁ ପ୍ଲସ ଟୁ ବୈଠକ ହେଉଛି । ବୈଠକରେ ଆମେରିକା ପକ୍ଷରୁ ବୈଦେଶିକ ସଚିବ ଆନ୍ଥୋନୀ ବ୍ଲିଂକେନ ଓ ପ୍ରତିରକ୍ଷା ସଚିବ ଲୟଡ ଅଷ୍ଟିନ ଯୋଗ ଦେବେ । ପ୍ରତିରକ୍ଷା କ୍ଷେତ୍ରରେ ଦ୍ବିପାକ୍ଷିକ ସଂପର୍କ ବୃଦ୍ଧି ନେଇ ହେବ ଆଲୋଚନା ।